លោក ឱម យ៉ិនទៀង៖ អ្នកអង្គេតការណ៍ជាង ៣ ពាន់នាក់ នឹងធ្វើអធិការកិច្ចនៅក្នុងការប្រលងបាក់ឌុប
ការប្រឡងសញ្ញាប័ត្រមធ្យមសិក្សាទុតិយភូមិឬបាក់ឌុបឆ្នាំ ២០១៥ ដែលប្រព្រឹត្តទៅនៅថ្ងៃទី ២៤ ខែ សីហា ខាងមុខនេះ នឹងមានការចូលរួមអង្កេតការណ៍ពីក្រុមនិស្សិតប្រមាណជា ៣ ពាន់នាក់ និងអង្គការសង្គមស៊ីវិលមួយចំនួន ទៀត។ នេះបើតាមការបញ្ជាក់របស់ លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ។
ចុះផ្សាយនៅថ្ងៃ៖
ស្តាប់ - ០១:៥៥
គិតត្រឹមថ្ងៃទី ១៤ កក្កដា នេះ មានការចុះឈ្មោះចូលរួមពីនិស្សិត ដើម្បីចូលរួមសង្កេតការណ៍ ការប្រលងសញ្ញាប័ត្រមធ្យមសិក្សាទុតិយភូមិ ប្រមាណ ជា ៣ ពាន់ នាក់ហើយ ដែលរួមបញ្ចូលទាំង សមាគម អង្គការសង្គមស៊ីវិល មួយចំនួនផង។ ប៉ុន្តែ លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ បញ្ជាក់ថា បរិមាណនៃអ្នកអង្កេតការណ៍ អាចនឹងមានចំនួនច្រើនជាងឆ្នាំមុនបន្តិចបន្តួច។
លោក បានសង្កត់ធ្ងន់ថា សន្ទុះនៃការចូលរួមរបស់យុវជន សមាគម អង្គការក្រៅរដ្ឋាភិបាល ជាចំណុចវិជ្ជមានមួយ ដែលអាចធានាថា ការប្រលងឆ្នាំនេះនឹងប្រព្រឹត្តិទៅកាន់តែមាន ប្រសិទ្ធិភាព តម្លាភាព យុត្តិធម៌ ដូចអ្វីដែលលោក ហុងជួនណារ៉ុន បញ្ជាក់រួចហើយថា អ្នកចេះពិតច្បាស់លាស់ ប្រាកដជាជាប់។
យ៉ាងណាក៏ដោយ លោក ឱម យិនទៀន មិនបានបញ្ចេញយោបល់អ្វី ពាក់ព័ន្ធនឹងលទ្ធផលដែលថាឆ្នាំនេះនឹងមានបេក្ខជនប្រលងជាប់ច្រើនជាងឆ្នាំមុន ឬ យ៉ាងណានោះទេ។ មិនបញ្ចេញយោល់ ដោយសារតែ លោក អះអាងថា លទ្ធផលនៃការជាប់ធ្លាក់ វាគឺជាការទទួលខុសត្រូវរបស់ សិស្សម្នាក់ៗ និង កិច្ចខិតខំប្រឹងប្រែងរបស់ ក្រសួងអប់រំយុវជននិងកីឡា។ ប៉ុន្តែ អង្គភាពប្រឆាំងអំពើពុករលួយ គ្រាន់តែមានតួនាទី ធានា ថា ការប្រលងនឹងប្រព្រឹត្តិទៅដោយស្របច្បាប់ និង មានសុក្រិត្យភាព។
ដោយឡែក លោក រស់ សាលីន អ្នកនាំពាក្យក្រសួងអប់រំ យុវជននិងកីឡា បានឲ្យដឹងថា សម្រាប់ការប្រឡងបាក់ឌុបឆ្នាំនេះ ខាងក្រសួងនៅតែបន្តអនុវត្តន៍វិធានការណ៍ដដែល ដូចជា ផ្នែកបច្ចេកទេស រដ្ឋបាល និង កិច្ចសហការណ៍ជាមួយនឹងស្ថាប័នពាក់ព័ន្ធ។
លើសពីនេះទៅទៀត លោកមានសុទិដ្ឋិនិយមថា នៅឆ្នាំនេះ នឹងមានបេក្ខជនប្រឡងជាប់ច្រើនជាងឆ្នាំមុន។ បេក្ខជនជាប់ច្រើន ដោយសារតែ ការផ្តល់ពត៌មានទាក់ទងនឹងការប្រលងទៅដល់សាធារណៈជនទូទៅ ជាពិសេស បេក្ខជនផ្ទាល់ គឺមានទូលំទូលាយ។ ទីពីរ ក្រសួងអប់រំយុវជន បានរៀបចំជាឯកសារ ទាកទងនឹងមុខវិជ្ជាវិទ្យាសាស្ត្រ គណិតវិទ្យា រូបវិទ្យា គីមីវិទ្យា និង ជីវៈវិទ្យា ចែកជូនឲ្យគ្រូបង្រៀន នៅគ្រប់រាជធានីខេត្ត ដើម្បីបង្រៀនសិស្ស។ និង ទីបី ក្រសួងអប់រំ បានបង្កើតឲ្យមានថ្នាក់បំប៉ន រយៈពេលមួយថ្ងៃពេញ នៅថ្ងៃអាទិត្យ ដោយមិនគិតថ្លៃដល់ បេក្ខជនផងដែរ។
គួរជម្រាបជូនថា នៅក្នុងឆ្នាំសិក្សា ២០១៤-២០១៥ នេះមានបេក្ខជនប្រឡងចំនួន ៨៨ ៤៨៨នាក់ និងមានមណ្ឌលប្រឡង១៤៩មណ្ឌល ចែកជា ៣ ៥៧៦បន្ទប់ នៅរាជធានីខេត្ដទាំង ២៥ ។ បេក្ខជនធ្លាក់បាក់ឌុបឆ្នាំមុនជាង ១ម៉ឺននាក់ ក៏នឹងចូលរួមប្រឡងក្នុងឆ្នាំ ២០១៥ម្តងទៀតដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ