រដ្ឋាភិបាលត្រៀមបញ្ជូនវិសោធនកម្មច្បាប់បក្សនយោបាយទៅប្រមុខរដ្ឋស្តីទីចុះហត្ថលេខាជំនួសព្រះមហាក្សត្រ
បន្ទាប់ពីរដ្ឋសភា និងព្រឹទ្ធសភា បានសម្រេចអនុម័ត និងក្រុមប្រឹក្សាធម្មនុញ្ញបានប្រកាសទទួលស្គាល់កាលពីរសៀលម្សិលមិញ នៅពេលនេះ សេចក្តីស្នើវិសោធនកម្មច្បាប់ស្តីពីគណបក្សនយោបាយបានធ្លាក់ដល់ដៃរដ្ឋាភិបាលកម្ពុជាហើយ។ ជំហានបន្ទាប់ និងចុងក្រោយ រដ្ឋាភិបាលនឹងបញ្ជូនវិសោធនកម្មច្បាប់នេះ ទៅកាន់ប្រមុខរដ្ឋស្តីទី ដើម្បីចុះហត្ថលេខាប្រកាសឲ្យប្រើប្រាស់ជាផ្លូវការ។
ចុះផ្សាយនៅថ្ងៃ៖
ប្រហែលជាមិនផុតពីសប្តាហ៍នេះទេ សេចក្តីស្នើវិសោធនកម្មថ្មីនៃច្បាប់ស្តីពីគណបក្សនយោបាយអាចនឹងត្រូវប្រកាសឲ្យប្រើប្រាស់ជាផ្លូវការ បន្ទាប់ពីការចុះហត្ថលេខាដោយលោកសាយ ឈុំ ដែលកំពុងកាន់តួនាទីជាប្រមុខរដ្ឋស្តីទី។ លោកសាយ ឈុំ ដែលជាអនុប្រធានគណបក្សប្រជាជនកម្ពុជា និងជាប្រធានព្រឹទ្ធសភាផង នឹងប្រកាសឲ្យប្រើប្រាស់ច្បាប់គណបក្សនយោបាយថ្មីដ៏ចម្រូងចម្រាសនេះជំនួសព្រះមហាក្សត្រកម្ពុជាដែលបានយាងចេញទៅពិនិត្យព្រះរាជសុខភាពនៅឯស្រុកចិន។
សេចក្តីស្នើវិសោធនកម្មច្បាប់ស្តីពីគណបក្សនយោបាយ ត្រូវបានរដ្ឋសភាដែលមានតែក្រុមអ្នកតំណាងរាស្រ្តគណបក្សប្រជាជនកម្ពុជា បានសម្រេចអនុម័តកាលពីថ្ងៃទី១០ កក្កដា កន្លងទៅ។ ប៉ុន្មានថ្ងៃក្រោយមក ព្រឹទ្ធសភាកម្ពុជា ក៏បានឯកភាពទាំងស្រុងលើសេចក្តីវិសោធនកម្មថ្មីនេះផងដែរ។ ចំណែកកាលពីរសៀលថ្ងៃអង្គារ ក្រុមប្រឹក្សាធម្មនុញ្ញក៏បានប្រកាសទទួលស្គាល់ថា វិសោធនកម្មនេះ គឺស្របនឹងរដ្ឋធម្មនុញ្ញ និងបានបិទផ្លូវតវ៉ាថែមទៀត។ ប៉ុន្មានម៉ោងក្រោយមក ពោល គឺល្ងាចថ្ងៃដដែល រដ្ឋសភាកម្ពុជា ក៏បានបញ្ជូនសេចក្តីស្នើវិសោធនកម្មច្បាប់នេះទៅកាន់រដ្ឋាភិបាលភ្លាមៗតែម្តង ដើម្បីបញ្ជូនបន្តទៅឲ្យប្រមុខរដ្ឋស្តីទីចុះហត្ថលេខាជំនួសព្រះមហាក្សត្រ។
សេចក្តីស្នើវិសោធនកម្មច្បាប់ថ្មីនេះ ត្រូវបានក្រុមតំណាងរាស្រ្តគណបក្សប្រជាជនកម្ពុជាបានបន្ថែមនូវចំណុចសំខាន់ៗដូចជា ហាមគណបក្សនយោបាយមិនឲ្យឃុបឃិតជាមួយទណ្ឌិតនោះឡើយ សូម្បីតែការប្រើប្រាស់សារជាសំឡេង រូបភាព ឯកសារជាលាយលក្ខណ៍អក្សរ ឬក៏សកម្មភាពរបស់ទណ្ឌិតក៏មិនឲ្យមានជាប់ពាក់ព័ន្ធជាមួយនឹងគណបក្សនយោបាយដែរ។ លោកសម រង្ស៊ី អតីតប្រធានគណបក្សសង្រ្គោះជាតិដែលជាកម្មវត្ថុនៃការកែច្បាប់នេះ បានអះអាងថា ការកែច្បាប់ថ្មីឡើងវិញនេះ គឺដើម្បីកំចាត់ និងផ្តាច់ជីវិតនយោបាយរបស់លោកតែប៉ុណ្ណោះ។
យ៉ាងណាក៏ដោយ កាលពីថ្ងៃអង្គារ គណបក្សសង្រ្គោះជាតិបានប្រាប់ឲ្យសាខាគណបក្សរបស់ខ្លួននៅតាមបណ្តាខេត្តនានា ឲ្យរៀបចំដករូបលោកសម រង្ស៊ី និងលោកកឹម សុខា ចេញពីស្លាកគណបក្សទាំងអស់ ដើម្បីតម្រូវតាមច្បាប់ថ្មី។ គណបក្សប្រឆាំង បានបញ្ជាក់ជាបឋមថា នឹងប្រើប្រាស់រយៈពេលប្រមាណមួយខែ ដើម្បីធ្វើកិច្ចការទាំងនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ