តុលាការក្រុងភ្នំពេញ កោះហៅលោកប៉ាវ ស៊ីណា ទៅសាកសួរករណីក្លែងលិខិត និងផ្តល់ព័ត៌មានមិនពិត
នៅវេលាម៉ោង៩ ព្រឹកថ្ងៃព្រហស្បតិ៍ស្អែកនេះ លោកប៉ាវ ស៊ីណា ប្រធានសហភាពចលនាកម្មករកម្ពុជា រួមនឹងមេធាវីម្នាក់ នឹងចូលខ្លួនទៅកាន់តុលាការក្រុងភ្នំពេញ ដើម្បីឆ្លើយបំភ្លឺពីដំណើររឿង ក្លែងលិខិត និងផ្តល់ព័ត៌មានមិនពិត តាមការកោះហៅរបស់តុលាការ។ លោកប៉ាវ ស៊ីណា បានថ្លែងបញ្ជាក់ប្រាប់វិទ្យុបារាំងអន្តរជាតិនៅព្រឹកនេះ ថា លោកមិនបានភិតភ័យ និងព្រួយបារម្ភចំពោះការកោះហៅរបស់តុលាការក្រុងភ្នំពេញនេះទេ។
ចុះផ្សាយនៅថ្ងៃ៖
ស្តាប់ - ០១:៣៧
ក្តីក្ដាំជាថ្មីរបស់លោកប៉ាវ ស៊ីណា នៅតុលាការក្រុងភ្នំពេញនេះ បានប្តឹងឡើងដោយថៅកែរោងចក្រកាត់ដេរមួយនៅក្នុងរាជធានីភ្នំពេញកាលពីថ្ងៃទី២ ខែមីនា ឆ្នាំ២០១៦។ និយោជក បានប្តឹងប្រធានសហភាពចលនាកម្មករកម្ពុជារូបនេះ ពីបទក្លែងលិខិត និងផ្តល់ព័ត៌មានមិនពិត បន្ទាប់ពីលោកប៉ាវ ស៊ីណា បានប្រមូលកម្មករនៅក្នុងរោងចក្រនោះ ចងបណ្តាញបង្កើតជាសហជីព។
លោកប៉ាវ ស៊ីណា បានពន្យល់ថា ថៅកែរោងចក្រប្តឹងលោកបែបនេះ ព្រោះតែក្រុមការងាររបស់លោកមានកំហុសឆ្គងបន្តិចបន្តួចលើផ្នែកអក្ខរាវិរុទ្ធ ដោយសរសេរឈ្មោះក្រុមកម្មករខុសនៅក្នុងលិខិតចុះបញ្ជីការសហជីពដាក់ទៅកាន់ក្រសួងការងារ។ ត្រង់ចំណុចនេះ ធ្វើឲ្យថៅកែរោងចក្រចោទប្រកាន់ថា កម្មករទាំងនោះមិនមាននៅក្នុងរោងចក្ររបស់ខ្លួន ដូច្នេះក៏បានប្តឹងលោកប៉ាវ ស៊ីណា ទៅកាន់តុលាការតែម្តង។ បើតាមមេសហជីពរូបនេះ ប្រសិនបើមានកំហុសឆ្គងផ្នែកអក្ខរាវិរុទ្ធណាមួយនៅក្នុងលិខិតចុះបញ្ចីការសហជីពនោះ ក្រសួងការងារតែងតែផ្តល់ព័ត៌មានមកសហជីព ដើម្បីកែតម្រូវ។ ប៉ុន្តែចៅកែរោងចក្រនេះ បែរជាប្រកាន់ហើយប្តឹងទៅវិញ។
សម្រាប់លោកប៉ាវ ស៊ីណា ទង្វើនេះ គឺជាការគម្រាមកំហែង និងមានចេតនាចង់បំបាក់ស្មារតីកម្មករក្នុងការចងក្រងគ្នាបង្កើតជាសហជីព។ លោកក៏បានហៅការប្តឹងផ្តល់នេះ ថាគឺជាការ “វាយមេកំលាចកូន”ផងដែរ។ យ៉ាងណាក៏ដោយ លោកបានគូសបញ្ចាក់ថា លោកមិនមានការភិតភ័យ និងព្រួយបារម្ភអ្វីនោះទេចំពោះបណ្តឹងពីនិយោជកនេះ។
គួរបញ្ជាក់ជូនថា ទាំងបណ្តឹងថ្មីនេះ លោកប៉ាវ ស៊ីណា ទទួលបានបណ្តឹងចំនួន៥ហើយក្នុងបេសសកម្មបំពេញការងារជាអ្នកការពារកម្មករខ្មែរ។ ៤បណ្តឹងរបស់លោកកន្លងទៅ ប្តឹងឡើងដោយនិយោជក និងអាជ្ញាធរនៅក្នុងខេត្តស្វាយរៀង និងខេត្តកំពង់ស្ពឺ។ តែទោះជាយ៉ាងណាក៏ដោយ មេសហជីពរូបនេះ បានអះអាងថា លោកមិនបានបាក់ស្បាត ហើយនៅតែបន្តការងាររបស់លោកទៅមុខជាបន្តទៀត ដើម្បីការពារផលប្រយោជន៍របស់កម្មករ និង ជំរុញឲ្យមានការគោរពសិទ្ធិសេរីភាពកម្មករឲ្យបានពេញលេញនៅក្នុងប្រទេសកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ