កត្តាអាកាសធាតុ ធ្វើឲ្យទិន្នផលម្រេចកំពតធ្លាក់ចុះនាឆ្នាំ២០១៨
នាឆ្នាំ២០១៨កន្លងទៅនេះ ទិន្នផលម្រេចនៅក្នុងខេត្តកំពតប្រមូលផលបានត្រឹមតែប្រមាណ៦៩តោនតែប៉ុណ្ណោះ ប្រៀបធៀបនឹងឆ្នាំ២០១៧ ទិន្នផលម្រេចកំពតបានថយចុះប្រមាណ៣៣តោន ដោយសារកត្តាអាកាសធាតុ។ នេះបើតាមការបញ្ជាក់របស់សមាគមម្រេចកំពត។ ប៉ុន្តែម្រេចកំពតអាចនឹងកើនទិន្នផលឡើងវិញនៅឆ្នាំ២០១៩នេះ។
ចុះផ្សាយនៅថ្ងៃ៖
ស្តាប់ - ០២:០៧
លោក ងួន ឡាយ ប្រធានសមាគមម្រេចកំពត បានបញ្ជាក់ប្រាប់វិទ្យុបារាំងអន្តរជាតិនៅថ្ងៃទី១៤ ខែមករា នេះថា មូលហេតុ ដែលម្រេចកំពតបានធ្លាក់ចុះទិន្នផលនាឆ្នាំ២០១៨កន្លងទៅនេះ គឺដោយសារតែអាកាសធាតុនៅក្នុងប្រទេសកម្ពុជា។ លោកបន្ថែមថានៅឆ្នាំមុនមានភ្លៀងធ្លាក់ខ្លាំង ធ្វើឲ្យជ្រុះផ្កាម្រេច រហូតដល់ចម្ការម្រេចខ្លះធ្លាក់ទិន្នផលពី៥តោន មក៣០០គីឡូក្រោម ប៉ុន្តែក៏មានចម្ការម្រេចខ្លះមិនបានបាត់បង់ទិន្នផលរបស់ខ្លួននោះទេ។
ប្រធានសមាគមម្រេចកំពតរូបនេះលើកឡើងថា នាឆ្នាំ២០១៨ ទិន្នផលម្រេចកំពតប្រមូលផលបានប្រមាណ៦៩តោន និងចរាចរណ៍លើទីផ្សារបានប្រមាណ៥០តោន។ ចំណែកកាលពីឆ្នាំ២០១៧កន្លងទៅ ទិន្នផលម្រេចកំពតប្រមូលបានប្រមាណ១០២តោន និងបានចរាចរណ៍លើទីផ្សារប្រមាណ៦៩តោន។ ទីផ្សារអន្តរជាតិធំជាងគេដែលទិញម្រេចកំពត គឺសហភាពអឺរ៉ុប អាមេរិក និងកាណាដា។
ទោះបីជាម្រេចកំពតមានការថយចុះទិន្នផលមែន ប៉ុន្តែតម្លៃម្រេចកំពតមិនបានឡើងថ្លៃ ឬចុះថ្លៃនោះទេ។ លោក ងួន ឡាយ អះអាងថា កាលពីឆ្នាំ២០១៧តម្លៃម្រេចខ្មៅ របស់ខេត្តកំពតមានតម្លៃ១៥ដុល្លារ, ម្រេចសរបស់ខេត្តកំពតមានតម្លៃ២៨ដុល្លារ, និងម្រេចក្រហមមាន តម្លៃ២៥ដុល្លារ ហើយនៅឆ្នាំ២០១៨កន្លងទៅ តម្លៃម្រេចកំពតស្ថិតក្នុងតម្លៃដូចនឹងឆ្នាំ២០១៧ដែរ។
យោងតាមអគ្គនាយកដ្ឋានជំរុញពាណិជ្ជកម្ម ម្រេច គឺជាផលិតផលមួយ ក្នុងចំណោមផលិតផលសក្តានុពលសំខាន់ៗទាំង១៩មុខ របស់ប្រទេសកម្ពុជា និងត្រូវបានរាជរដ្ឋាភិបាលដាក់បញ្ចូល ក្នុងបញ្ជីមុខទំនិញអាទិភាពសម្រាប់ធ្វើពិពិធកម្ម និងជំរុញការនាំចេញទៅកាន់ទីផ្សារអន្តរជាតិ។ នាពេលបច្ចុប្បន្ន ម្រេចត្រូវបានដាំដុះក្នុងខេត្តចំនួន១៩ ចាប់ពីតំបន់និរតី ភូមិភាគពាយ័ព្យ និងតំបន់ឦសាននៃប្រទេសកម្ពុជា។
បើតាមប្រធានសមាគមម្រេចកំពត នៅឆ្នាំ២០១៩នេះ ទិន្នផលម្រេចកំពតនឹងមានការកើនឡើងវិញ ដោយសារអំណោយផលពីអាកាសធាតុ ម្រេចចាប់ផ្តើមផ្កាដើមរដូវ ហើយនៅដើមខែមិនាខាងមុខនេះការប្រមូលផលម្រេចនឹងចាប់ផ្តើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ