ទោះថ្លៃសាំងធ្លាក់ចុះតែថ្លៃដឹកអ្នកដំណើរនៅខ្ពស់ដដែល
ថ្លៃឈ្នួលដឹកជញ្ជូនរថយន្តក្រុង ក៏ដូចជារថយន្តតាក់ស៊ីពីភ្នំពេញទៅតាមបណ្តាខេត្ត ពីខេត្តមកទីក្រុង នៅតែមិនមានការធ្លាក់ចុះ ខណៈដែលប្រេងឥន្ធនៈនៅក្នុងប្រទេសកម្ពុជាបានធ្លាក់ថ្លៃជិតមួយខែទៅហើយ។ ការមិនចុះថ្លៃដឹកជញ្ជូននៅពេលដែលសាំងចុះថ្លៃនេះ ត្រូវបានគេរិះគន់ថា អ្នកប្រកបរបរដឹកជញ្ជូនបានឆ្លៀតឱកាស កេងយកចំណេញដោយយកលេសមិនសមហេតុផល។
ចុះផ្សាយនៅថ្ងៃ៖
ស្តាប់ - ០២:០១
ប្រេងឥន្ធនៈបានចុះថ្លៃអស់រយៈពេលជាច្រើនសប្តាហ៍មកហើយ។ ការចុះថ្លៃនេះយោងទៅលើស្ថានភាពទីផ្សារប្រេងឆៅពិភពលោក។ ក៏ប៉ុន្តែអ្វីដែលជាប់ទាក់ទងគ្នាទៅនឹងការចុះថ្លៃប្រេងនេះនៅក្នុងប្រទេសកម្ពុជាដូចជាតម្លៃសេវាដឹកជញ្ជូន មិនមានការប្រែប្រួលតាមទីផ្សារប្រេងឥន្ធនៈឡើយ។
ប្រជាពលរដ្ឋដែលបានធ្វើដំណើរតាមរថយន្តក្រុងក៏ដូចជារថយន្តតាក់ស៊ី បានលើកឡើងថា
តម្លៃធ្វើដំណើរពីខេត្តទៅក្រុងនិងពីក្រុងទៅខេត្តនៅតែថ្លៃដដែលនៅពេលដែល តម្លៃសាំងបានធ្លាក់ចុះក្រោមមួយដុល្លារក្នុងមួយលីត្រឬស្មើមួយដុល្លារ។
លោកសន ជ័យ តំណាងសម្ព័ន្ធគណនេយ្យភាពសង្គម អាស៊ីបូព៌ា និងប៉ាស៊ីហ្វិក បានចាប់អារម្មណ៍ថាកន្លងមកការដំឡើងថ្លៃលើមធ្យោបាយដឹកជញ្ជូនមានរថយន្តក្រុងនិងរថយន្តតាក់ស៊ីជាដើមបានធ្វើឡើងដោយសំអាងថាតម្លៃប្រេងសាំងឡើងថ្លៃ។ ក៏ប៉ុន្តែពេលនេះសាំងបានចុះថ្លៃច្រើនថ្ងៃ តែសេវាដឹកជញ្ជូនមិនបានចុះថ្លៃតាមប្រេងសាំងទេ។ លោកសន ជ័យ បានផ្ទាន់ថានេះគ្រាន់តែជាលេសរបស់ក្រុមហ៊ុនរកស៊ីលើសេវាដឹកជញ្ជូនប៉ុណ្ណោះ ដែលជាការរកស៊ីដឹងតែពីយកចំណេញ គ្មានការយោគយល់។
ជាមួយគ្នានេះ លោកឡុង ឌីម៉ង់ អ្នកនាំពាក្យសាលារាជធានីភ្នំពេញបានបញ្ជាក់ផងដែរថា សាលារាជធានីមិនមានគម្រោងធ្វើការអំពាវនាវដល់ដល់ក្រុមហ៊ុនដឹងជញ្ជូនឲ្យមានការចុះថ្លៃអ្វីទេ ដោយសារមិនមែនជាសមត្ថកិច្ចរបស់ខ្លួន។ ទោះជាយ៉ាងនេះក្តី អ្នកនាំពាក្យរូបនេះយល់ថា ដើម្បីផលប្រយោជន៍ប្រជាពលរដ្ឋគួរតែក្រុមហ៊ុនបញ្ជុះតម្លៃណាមួយឲ្យសមាមាត្រទៅនឹងស្ថានភាពតម្លៃប្រេងសាំងបច្ចុប្បន្ន។
សូមបញ្ជាក់ថាកន្លងមកប្រមុខរដ្ឋាភិបាលកម្ពុជា លោកនាយករដ្ឋមន្ត្រី ហ៊ុន សែន អង្គការសហជីព តែងធ្វើការអំពាវនាវទៅដល់ក្រុមហ៊ុនដឹកជញ្ជូនក៏ដូចជារថយន្តតាក់ស៊ី កុំឲ្យឆ្លៀតដំឡើងតម្លៃឡាននៅក្នុងឱកាសមានបុណ្យទានម្តងៗ ក៏ប៉ុន្តែមិនមានប្រសិទ្ធភាពទេតម្លៃនៅតែឡើងដល់ទៅពីរដង ដោយសារតែយកលេសថាតម្លៃសាំងឡើងថ្លៃឬទីផ្សារសេរីជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ