តុលាការកោះហៅលោក ជុន ច័ន្ទបុត្រ ទៅ សាកសួរពីការបន្លំខ្លួនចូលពន្ធនាគារ
អយ្យការអមសាលាដំបូងរាជធានីភ្នំពេញ បានចេញដីកាកោះហៅលោក ជុន ច័ន្ទបុត្រ នាយករងវិទ្យុអាស៊ីសេរី ទៅសាកសួរពីការបន្លំខ្លួនចូលពន្ធនាគារ។ នេះបើតាមដីកាកោះហៅចុះថ្ងៃទី២១មេសា ដែលវិទ្យុបារាំងបានទទួលនៅថ្ងៃសៅរ៍នេះ។ ក្រៅពីលោក ជុន ច័ន្ទបុត្រ តុលាការក៏បានកោះហៅលោក ឡុង រី និងលោកស្រី មួរ សុខហួរ តំណាងរាស្ត្រគណបក្សប្រឆាំង ទៅបំភ្លឺផងដែរ ក្នុងនាមជាសាក្សីនៃសំណុំរឿងតែមួយនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
លោក ហួត ឃីនវុទ្ធី ហៅ ជុន ច័ន្ទបុត្រ ត្រូវបានតុលាការកោះហៅទៅសាកសួរក្នុងនាមជាជនសង្ស័យ នៅថ្ងៃទី០២ ខែឧសភាខាងមុខ វេលាម៉ោង៩ព្រឹក អំពីការប្រកាសដោយភូតភរ បន្លំខ្លួនចូលពន្ធនាគារ។ នៅក្នុងដីកាកោះ ព្រះរាជអាជ្ញារង លោក សៀង សុខ បានបង្គាប់ឲ្យលោក ជុន ច័ន្ទបុត្រ ទៅបំភ្លឺតាមការកោះហៅ និងត្រូវយកលិខិតផ្សេងៗដែលទាក់ទងនឹងសំណុំរឿងនេះទៅជាមួយផង ប្រសិនបើមាន។
សូមរំលឹកជូនថា នាយករងវិទ្យុអាស៊ីសេរី លោក ជុន ច័ន្ទបុត្រ កាលពីថ្ងៃទី១៩ខែមេសាកន្លងទៅ បានចូលទៅក្នុងពន្ធនាគារព្រៃស ជាមួយតំណាងរាស្ត្រគណបក្សសង្គ្រោះជាតិ ដើម្បីសួរសុខទុក្ខអ្នកជាប់ឃុំដែលជាមន្ដ្រីនិងជាសកម្មជនរបស់គណបក្សប្រឆាំង។ ក្នុងដំណើរចូលទៅកាន់ពន្ធនាគារនោះ លោក ជុន ច័ន្ទបុត្រ ពាក់មួកកាតិប បានប្រើប្រាស់ឈ្មោះពិតរបស់លោក គឺ ហួត វុទ្ធី ប៉ុន្តែបានដាក់តួនាទីថាជាជំនួយការរបស់អ្នកតំណាងរាស្ត្រទៅវិញ។
ការដាក់តួនាទីមិនពិតរបស់នាយករងវិទ្យុអាស៊ីសេរីដូច្នេះ ត្រូវបានដីកាកោះរបស់តុលាការចាត់ទុកថា ជាការផ្ដល់សេចក្ដីប្រកាសដោយភូតកុហក បន្លំខ្លួនចូលពន្ធនាគារ។ ប៉ុន្តែ លោក ជុន ច័ន្ទបុត្រ វិញ លោកពន្យល់ថា គោលដៅរបស់លោកទៅកាន់ពន្ធនាគារគឺដើម្បីសួរសុខទុក្ខលក្ខណៈឯកជន ប៉ុន្តែចៃដន់បានជួបតំណាងរាស្ត្របក្សសង្គ្រោះជាតិនៅទីនោះ និងចូលទៅជាមួយគ្នាតែប៉ុណ្ណោះ។ នាយករងវិទ្យុអាស៊ីសេរីរូបនេះអះអាងថា លោកគ្មានចេតនាបន្លំខ្លួនទេ ព្រោះលោកបានដាក់ឈ្មោះពិតរបស់ខ្លួននៅក្នុងបញ្ជីឈ្មោះអ្នកចូលពន្ធនាគារថែមទៀតផង។
គួរកត់សម្គាល់ថា នៅក្នុងសំណុំរឿងនេះ មិនមែនមានតែ លោក ជុន ច័ន្ទបុត្រ ម្នាក់ឯងទេដែលត្រូវតុលាការកោះហៅឲ្យទៅបំភ្លឺ។ លោក ឡុង រី និងលោកស្រី មួរ សុខហួរ តំណាងរាស្ត្រគណបក្សប្រឆាំង ក៏ត្រូវបានកោះហៅទៅបំភ្លឺផងដែរ ក្នុងនាមជាសាក្សី នៅថ្ងៃទី២៧ និង២៨មេសាសប្ដាហ៍ក្រោយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ