មន្ត្រីជំនាញរកឃើញករណីសង្ស័យជំងឺប៉េស្តជ្រូក ក្នុងខេត្តត្បូងឃ្មុំ
មន្ត្រីជំនាញនៃក្រសួងកសិកម្មនៅថ្ងៃព្រហស្បតិ៍នេះ បានបង្ហាញការសង្ស័យពីការរាលដាលនៃជំងឺប៉េស្តជ្រូកអាហ្វ្រិក ដែលកើតមាននៅក្នុងខេត្តត្បូងឃ្មុំ។ ស្របពេលដែលមន្ត្រីជំនាញសង្ស័យពីការរាលដាលនៃជំងឺប៉េស្តជ្រូកកើតមានក្នុងខេត្តត្បូងឃ្មុំ មន្ត្រីជាន់ខ្ពស់វៀតណាមបានជម្រុញឲ្យកម្ពុជាបើកផ្លូវទទួលយកការនាំចូលជ្រូកពីវៀតណាមឡើងវិញ តែសំណើរនេះត្រូវបានបដិសេធដោយរដ្ឋមន្ត្រីក្រសួងកសិកម្ម។
ចុះផ្សាយនៅថ្ងៃ៖
ស្តាប់ - ០២:០៦
ថ្លែងប្រាប់វិទ្យុបារាំងអន្តរជាតិ RFI នៅថ្ងៃពុធនេះ លោក តាន់ ផាន់ណារ៉ា មន្ត្រីជំនាញខាងសុខភាពសត្វនៃក្រសួងកសិកម្មថា ការសង្ស័យពីការរីករាលដាលនៃជំងឺប៉េស្តជ្រូកអាហ្វ្រិកក្រោយមន្ត្រីជំនាញ រកឃើញសត្វជ្រូកមួយចំនួនបានងាប់ នៅខេត្តត្បូងឃុំ។ ប៉ុន្តែមន្ត្រីជំនាញមិនហ៊ានសន្និដ្ឋានថា សត្វជ្រូកដែលងាប់ទាំងនោះបណ្ដាលមកពីជំងឺប៉េស្តជ្រូកអាហ្រ្វិកទាំងស្រុងឡើយដោយរង់ចាំលទ្ធផលវិភាគសិន។
គួររំឭកថាជំងឺប៉េស្តជ្រូកអាហ្វ្រិក បានផ្ទុះឡើងជាលើកដំបូងនៅប្រទេសកម្ពុជា ក្នុងភូមិសោមកានិញ ឃុំសោមធំ ស្រុកអូរយ៉ាដាវ ខេត្តរតនគិរីបន្ទាប់ពីមានសត្វជ្រូកប្រហែល ៤០០ក្បាល ខណៈជ្រូក១៩៣ក្បាលផ្សេងទៀតត្រូវសម្លាប់ក្រោយរកឃើញជំងឺប៉េស្តជ្រូកអាហ្វ្រិក។ ដើម្បីទប់ស្កាត់ជំងឺប៉េស្តជ្រូកអាហ្វ្រិក ក្រសួងកសិកម្មផ្ដល់សិទ្ធិដល់អាជ្ញាធរខេត្តចាត់វិធានការតាមរយៈការដុតបំផ្លាញចោលចំពោះសត្វជ្រូកគ្រប់ប្រភេទ ក្នុងតំបន់ផ្ទុះជំងឺទៅតាមវិធានការបសុព្យាបាល។
ទោះបីជាជំងឺប៉េស្តជ្រូកអាហ្វ្រិកនេះ មិនឆ្លងនិងប៉ះពាល់ដល់មនុស្ស ប៉ុន្តែជំងឺនេះ បណ្តាលឲ្យជ្រូកឈឺ និងងាប់មានអត្រាខ្ពស់ រហូត ១០០ភាគរយ ដែលបង្កការខាតបង់ធ្ងន់ធ្ងរ ដល់អ្នកចិញ្ចឹមជ្រូក។ ក្រសួងកសិកម្មទទួលស្គាល់ថា ការឆ្លងជំងឺនេះមកកម្ពុជា គឺដោយសារតែការលួចនាំជ្រូកចូលពីវៀតណាម។
មន្ត្រីជាន់ខ្ពស់វៀតណាម កាលពីពេលថ្មីៗនេះ បានជម្រុញឲ្យរដ្ឋមន្ត្រីក្រសួងកសិកម្មទទួលការនាំចូលជ្រូកពីវៀតណាមវិញ ដោយធានាបាននូវគុណភាព។ ប៉ុន្តែរដ្ឋមន្ត្រីក្រសួងកសិកម្មបានបដិសេធការនាំចូល ដោយជំរុញឲ្យវៀតណាមវិនិយោគលើការចិញ្ចឹមជ្រួកនៅកម្ពុជាវិញ។ នេះបើតាមលោក តាន់ ផាន់ណារ៉ា មន្ត្រីជំនាញខាងសុខភាពសត្វ នៃក្រសួងកសិកម្ម។
ក្នុងពេលដែលការនាំចូលជ្រូកពីវៀតណាមត្រូវបានផ្អាក កម្ពុជាបានបន្តនាំជ្រូកពីប្រទេសថៃចន្លោះ១០០០ទៅ១៥០០ក្បាលក្នុងមួយថ្ងៃ ខណៈការផលិតក្នុងស្រុក មានក្រុមហ៊ុនក្នុងស្រុកពីរ កំពុងផ្គត់ផ្គង់ការចិញ្ចឹម គឺក្រុមហ៊ុនCPនិងក្រុមហ៊ុន ម៉ុង រិទ្ធី។ វិស័យឯកជនធ្លាប់លើកឡើងថា ពួកគេនៅរួញរាក្នុងការបន្ថែមបរិមាណចិញ្ចឹមជ្រូក ដោយសារតែខ្លាចឆ្លងជំងឺប៉េស្ដជ្រូកអាហ្វ្រិក ដែលបានកើតមានរួចហើយនាពេលកន្លងមក នៅក្នុងស្រុកពីរនៃខេត្តរតនគិរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ