លោកនាយករដ្ឋមន្ត្រីហ៊ុន សែន ថាលោកស្រីយីង ឡាក់មិនបានប្រើប្រាស់កម្ពុជាដើម្បីគេចខ្លួនទេ
លោកហ៊ុន សែន នាយករដ្ឋមន្ត្រីកម្ពុជាបានលើកឡើងថាលោកស្រីយីង ឡាក់អតីតនាយករដ្ឋមន្ត្រីថៃ ដែលកំពុងមានទោសនោះ មិនបានប្រើប្រាស់ប្រទេសកម្ពុជា ដើម្បីគេចខ្លួននោះទេ។ នេះបើតាមលោកខៀវ កាញារីទ្ធ រដ្ឋមន្រ្តីក្រសួងព័ត៌មាននៅព្រឹកនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
ការលើកឡើងរបស់លោកនាយករដ្ឋមន្ត្រីកម្ពុជានេះ គឺបន្ទាប់ពីសារព័ត៌មានរបស់ថៃបាងកកប៉ុស្តិ៍បានចុះផ្សាយកាលពីថ្ងៃទី២៦ ខែសីហាថា លោកស្រី យីងឡាក់ ស៊ីណាវ៉ាត ប្អូនស្រីរបស់លោកថាកស៊ីនបានចាកចេញពីប្រទេសថៃ ដើម្បីគេចចេញពីសាលក្រមតុលាការ ហើយបានធ្វើដំណើរមកកាន់ប្រទេសកម្ពុជាមុននឹងបន្តដំណើរទៅកាន់ឌូបៃ។
ប្រភពជិតស្និតនឹងគ្រួសារលោកស្រីយីង ឡាក់បានបញ្ជាក់ប្រាប់សារព័ត៌មានបាងកកប៉ុស្តិ៍ថាលោកស្រីយីងឡាក់បានធ្វើដំណើរតាមយន្តហោះឯកជនទៅកាន់ព្រលានយន្តហោះនៅក្នុងខេត្តត្រាត ជាកន្លែង ដែលលោកស្រីឆ្លងកាត់ព្រំដែនថៃ ចូលមកក្នុងព្រំដែនកម្ពុជាក្នុងខេត្តកោះកុង។ បាងកកប៉ុស្តិ៍បានបន្តថាក្រោយពីធ្វើដំណើរមកដល់កម្ពុជា លោកស្រីបានហោះទៅកាន់សិង្ហបុរី និងស្វែងរកជើងយន្តហោះដើម្បីបន្តទៅឌូបៃ។
កាសែតនេះក៏បានបង្ហាញគំនូរផ្លូវ២ផ្សេងទៀតដែលលោកស្រីយីងឡាក់អាចប្រើ ដើម្បីធ្វើដំណើរទៅកាន់ឌូបៃ។ ក្នុងនោះគឺលោកស្រីអាចធ្វើដំណើរចេញពីបាងកកទៅខេត្តសាកែវ មកភ្នំពេញ និងចាកចេញទៅសិង្ហបុរី ហើយបន្តទៅឌូបៃ។ ម្យ៉ាងទៀតលោកស្រីអាចធ្វើដំណើរចេញពីបាងកកទៅកាន់សិង្ហបុរី និងឆ្ពោះត្រង់ទៅឌូបៃ។
បាងកកប៉ុស្តិ៍បានដកស្រង់ការបញ្ជាក់ពីប្រភពរបស់ខ្លួនថាលោកស្រីយីង ឡាក់ អតីតនាយករដ្ឋមន្ត្រីត្រូវបានគេជួយផ្តល់លិខិតឆ្លងដែនកម្ពុជា មុនពេលលោកស្រីបន្តដំណើរទៅកាន់សិង្ហបុរី និងឆ្ពោះទៅកាន់ឌូបៃ ដើម្បីជួបលោកថាកស៊ីន។
ឆ្លើយតបនឹងការចុះផ្សាយដោយសារព័ត៌មានបរទេសនេះ លោកខៀវ សុភ័ក្រអ្នកនាំពាក្យក្រសួងមហាផ្ទៃកម្ពុជាបានបដិសេធថាមិនមានវត្តមានលោកស្រីយីងឡាក់ធ្វើដំណើរឆ្លងកាត់ប្រទេសកម្ពុជានោះទេ។ លោកខៀវ សុភ័ក្របញ្ជាក់ថាកម្ពុជាមិនមានគំនិតលួចលាក់អ្នកទោសឲ្យឆ្លងកាត់ ដើម្បីយករួចខ្លួនពីច្បាប់ទេ។ លោកបន្ថែមថាប្រសិនបើមានព័ត៌មានពិតប្រាកដដូចការចុះផ្សាយមែន សូមឲ្យផ្តល់ព័ត៌មានទៅសមត្ថកិច្ចដើម្បីចាត់ការ។
សូមជម្រាបជូនថានៅថ្ងៃសុក្រ តុលាការកំពូលថៃ បានចេញដីកាចាប់ខ្លួន ជំនួសឲ្យការប្រកាសសាលក្រម ប្រឆាំងលោកស្រីយីងឡាក់។ លោកស្រីយីងឡាក់ ដែលប្រឈមនឹងទោសជាប់ពន្ធនាគារ ១០ឆ្នាំ ពីបទធ្វេសប្រហែស ក្នុងកម្មវិធីឧបត្ថម្ភអង្ករដល់កសិករ បានអវត្តមាន មិនទៅបង្ហាញខ្លួន នៅថ្ងៃប្រកាសសាលក្រមរបស់តុលាការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ