នាយករដ្ឋមន្រ្តីខ្មែរទាត់ចោលព័ត៌មានដែលថាប្រគល់«បឹងយក្ខឡោម»ទៅឲ្យចិន
ប្រមុខរដ្ឋាភិបាលកម្ពុជា នៅព្រឹកថ្ងៃអង្គារនេះ បានទាត់ចោលចំពោះព័ត៌មានដែលចុះផ្សាយថា រដ្ឋាភិបាលនឹងប្រគល់«បឹងយក្ខឡោម» ទៅឲ្យក្រុមហ៊ុនចិនធ្វើការវិនិយោគរយៈពេល៧៥ឆ្នាំ។ ការចេញមកទាត់ចោលព័ត៌មាននេះ បន្ទាប់ពីកាសែតរស្មីកម្ពុជា បានចុះផ្សាយនៅព្រឹកនេះថា ការប្រគល់បឹងធម្មជាតិមួយនេះទៅឱ្យក្រុមហ៊ុនចិន ក្រោមទុនវិនិយោគ៧លានដុល្លារ ដើម្បីបង្កើតទៅជាតំបន់ទេសចរណ៍ខ្នាតអន្តរជាតិ។
ចុះផ្សាយនៅថ្ងៃ៖
ការចេញមកទាត់ចោលព័ត៌មានលក់«បឹងយក្ខឡោម»ទៅឲ្យក្រុមហ៊ុនចិនវិនិយោគនេះ គឺធ្វើឡើងតាមរយៈទំព័រហ្វេសប៊ុករបស់លោកនាយករដ្ឋមន្រ្តី ហ៊ុន សែន។ លោកប្រមុខរដ្ឋាភិបាលបានចោទសួរត្រឡប់ទៅវិញថា តើអ្នកណាបង្កើតរឿងបែបនេះឡើងដើម្បីអ្វី? ប៉ុន្តែក្នុងឋានៈជាប្រមុខរដ្ឋាភិបាល លោកសុំទាត់ចោលទាំងស្រុង នូវការវិនិយោគឯកជនណាមួយមកលើបឹងធម្មជាតិដ៏សំខាន់នេះ ទោះក្រុមហ៊ុននោះមកពីប្រទេសណាក៏ដោយ។
នេះជាការទាត់ចោលនូវព័ត៌មានដែលចុះផ្សាយនៅលើទំព័រកាសែតរស្មីកម្ពុជា។ រស្មីកម្ពុជាដែលបានឡើងចំណងជើងថា រដ្ឋាភិបាលនឹងដាក់«បឹងយក្ខឡោម»ទៅឲ្យក្រុមហ៊ុនចិនវិនិយោគរយៈពេល៧៥ឆ្នាំ។
កាសែតដែលមាននិន្នាការគាំទ្ររដ្ឋាភិបាលបានផ្សាយទៀតថា កាលពីថ្ងៃទី១០ខែមេសាឆ្នាំ២០១៨ លោក សក់ សេដ្ឋា រដ្ឋលេខាធិការក្រសួងមហាផ្ទៃ ក៏បានឯកភាពទៅលើគម្រោងស្នើសុំរបស់ក្រុមហ៊ុនចិនឈ្មោះ ដាសេងហ្វ័រ ឈួន។ ជាគម្រោងវិនិយោគក្នុងតម្លៃទឹកប្រាក់៧លានដុល្លារ ដើម្បីអភិវឌ្ឍតំបន់ទេសចរណ៍ដែលមានស្រាប់នេះទៅជាតំបន់ទេសចរណ៍ខ្នាតអន្តរជាតិ។ នេះបើតាមកាសែតដដែល។
ការលេចចេញព័ត៌មានបែបនេះគឺ បន្ទាប់ពីរដ្ឋាភិបាលកម្ពុជា បានចេញអនុក្រឹត្យមួយកាលពីថ្ងៃទី១៣មិថុនា ស្តីពីការបង្កើតតំបន់ប្រើប្រាស់ច្រើនយ៉ាង «បឹងយក្ខឡោម» ដែលមានផ្ទៃដីសរុប២២៥ហិកតា ស្ថិតក្នុង ក្រុងបានលុង ខេត្តរតនគិរី។ ការដាក់បឹងដែលមានជម្រៅទឹកជ្រៅនេះ ទៅជាតំបន់ប្រើប្រាស់ច្រើនយ៉ាង គឺជាការថែទាំជម្រកសត្វព្រៃ និងប្រព័ន្ធអេកូឡូស៊ី ព្រមទាំងជីវៈចម្រុះ ដើម្បីរក្សាលំនឹងបរិស្ថាន។
ប៉ុន្តែអនុក្រឹត្យដែលចុះហត្ថលេខាដោយលោកនាយករដ្ឋមន្រ្តី ហ៊ុន សែន បានបញ្ជាក់ថា ផ្ទៃដីតំបន់ប្រើប្រាស់ច្រើនយ៉ាង«បឹងយក្ខឡោម»នេះ មិនរួមបញ្ចូលដីកម្មសិទ្ធិឯកជន និងដីប្រើប្រាស់ជាប្រយោជន៍សាធារណៈនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ