លោក ហ៊ុន សែន៖ អ្នកសារព័ត៌មានមិនត្រូវស្តាំពេក និងមិនត្រូវឆ្វេងពេក
លោកនាយករដ្ឋមន្ត្រីហ៊ុន សែន កាលពីថ្ងៃទី២១ ខែមករា ក្នុងជំនួបប្រចាំឆ្នាំជាមួយអ្នកកាសែត និងមន្ត្រីព័ត៌មានជាង៣,៤០០នាក់ បានលើកឡើងថា អ្នកសារព័ត៌មានមិនត្រូវប្រកាន់ស្តាំពេក ឬឆ្វេងពេកនោះទេ ហើយត្រូវជ្រើសរើសយកចលនានិយមកណ្តាល ដែលគេអាចទទួលយកបានគ្រប់ៗគ្នា។ ជំនួបប្រចាំឆ្នាំលើកទី២ នេះធ្វើឡើងបន្ទាប់ពីកម្ពុជារងការរិះគន់ថាបានបិទស្ថាប័នសារព័ត៌មានមួយចំនួន។
ចុះផ្សាយនៅថ្ងៃ៖
ស្តាប់ - ០២:២០
បើតាមលោកនាយករដ្ឋមន្ត្រី ហ៊ុន សែន ចលនាឆ្វេងនិយម ឬចលនាស្តាំនិយម គឺសុទ្ធតែជាចលនាខុសទាំងអស់ ដូច្នេះសម្រាប់អ្នកសារព័ត៌មាន ឬស្ថាប័នសារព័ត៌មានមិនត្រូវស្តាំពេក ហើយក៏មិនត្រូវឆ្វេងពេក ហើយត្រូវហ៊ាននិយាយការពិត និងមិនត្រូវធ្វើជាចៅក្រមកាត់សេចក្តីទេ។
លោក ហ៊ុន សែន អះអាងថាលោកចង់បានស្ថាប័នព័ត៌មានទាំងរដ្ឋ និងឯកជន គឺជាកញ្ចក់ថ្លាឆ្លុះបញ្ចាំងការពិត និងមានតម្លាភាពក្នុងសង្គម បច្ចុប្បន្ន ជាពិសេសក្នុងពេលវេលាដែលលោកកំពុងកាន់កាប់តំណែងជានាយករដ្ឋមន្រ្តី។ លោក ហ៊ុន សែន បន្តថាលោកចង់បានព័ត៌មានច្បាស់លាស់ ដែលផ្តល់ព័ត៌មានពិតប្រាកដជឿទុកចិត្តបាន នឹងមានការពន្យល់ច្បាស់លាស់ទៅកាន់ប្រជាពលរដ្ឋអោយបានដឹងពិតប្រាកដគ្រប់ៗគ្នា។
លោកនាយករដ្ឋមន្ត្រីបន្ថែមថា លោកក៏ចង់បានសារព័ត៌មាន ដែលចេះចូលរួមជួយរិះគន់ស្ថាបនាពិតប្រាកដដល់សង្គមជាតិ រួមទាំងគោលនយោបាយរដ្ឋាភិបាលតាមក្រសួងនានា ដែលបានដាក់ចេញ តើបានធ្វើឲ្យមានប្រសិទ្ឋភាពដល់កម្រិតណា និងចូលរួមផ្សព្វផ្សាយពីការរីកចម្រើនរបស់កម្ពុជា។
បើតាមលោកហ៊ុន សែន កម្ពុជាមានសារព័ត៌មាន៣ប្រភេទ ដែលត្រូវបានក្រសួងព័ត៌មានចាត់វិធានការ ក្នុងនោះរួមមានសារព័ត៌មានប្រភេទី១ គឺសារព័ត៌មានជម្រិតទារប្រាក់គេ ទី២ ព័ត៌មានអត់ច្បាប់ មិនគោរពច្បាប់ និងបន្លំប្រាក់មិនបង់ពន្ធ និងទី៣ គឺព័ត៌មានមានតែឈ្មោះតែគ្មានសកម្មភាព។
សូមរំឮកថា នៅក្នុងរបាយការណ៍សេរីភាពក្នុងពិភពលោកឆ្នាំ២០១៨ ចេញផ្សាយនៅថ្ងៃទី១៦មករា អង្គការ Freedom House បានចាត់ទុកប្រទេសកម្ពុជាថា ជាប្រទេសមិនមានសេរីភាព។ ពោល បើតាមរបាយការណ៍ កម្ពុជាទទួលបានពិន្ទុ៣០ពិន្ទុប៉ុនណោះ នៅលើពិន្ទុសរុប១០០ពិន្ទុ ថយចុះ ១ពិន្ទុបើធៀបទៅនឹងចំណាត់ថ្នាក់ឆ្នាំមុន។
Freedom House បានលើកឡើងថាស្ថានភាពសេរីភាពនៅកម្ពុជាទទួលមានទំនោរធ្លាក់ចុះ ដោយសារតែការបង្ក្រាបជាបន្តបន្ទាប់ទៅលើគណបក្សប្រឆាំង ការចោទប្រកាន់លើថ្នាក់ដឹកនាំនៃគណបក្សនោះថាក្បត់ជាតិ ការបិទទ្វារនៃកាសែត The Cambodia Daily និងអវត្តមានវិទ្យុអន្ដរជាតិមួយចំនួននៅលើហ្វ្រេកង់ផ្សាយជាដើម។ ទោះយ៉ាងណា នៅក្នុងជំនួបជាមួយអ្នកសារព័ត៌មាននៅដើមឆ្នាំនេះ ការលើកឡើងនិងការរិះគន់ របស់ ប្រមុខរដ្ឋាភិបាលកម្ពុជាទៅលើចំណុចអវិជ្ជមាន នៃសារព័ត៌មានដែលមិនបំរើសង្គមមួយចំនួន ត្រូវគេមើលឃើញថា ជាផ្នែកមួយនៃការជួយស្រោចស្រង់ធ្វើឲ្យប្រសើរឡើង ទៅលើសេរីភាពសារព័ត៌មាននៅក្នុងប្រទេសកម្ពុជាទៅអនាគតផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ