នាយករដ្ឋមន្ត្រីព្រមានដកតួនាទីមុខតំណែងមន្ត្រីរបស់លោក បើមិនលុបបំបាត់រថយន្តខុសបច្ចេកទេស
លោកនាយករដ្ឋមន្ត្រី ហ៊ុន សែន នៅព្រឹកនេះ បានព្រមានជាថ្មីតាមបណ្តាញសង្គម ដកហូតតួនាទីមន្ត្រីរបស់លោក ចាប់ពីរដ្ឋមន្ត្រី ដល់អភិបាលស្រុក បើមិនអនុវត្តវិធានការកណ្តាប់ដៃដែកលុបបំបាត់ការកែច្នៃរថយន្តខុសបច្ចេកទេស។ ជាការព្រមាន បន្ទាប់ពីលោកប្រកាសឲ្យចាត់វិធានការលុបបំបាត់ការកែច្នៃរថយន្តខុសបច្ចេកទេសដឹកទំនិញ ដែលនាំឲ្យមានគ្រោះថ្នាក់ចរាចរណ៍កើតឡើងញឹកញាប់។
ចុះផ្សាយនៅថ្ងៃ៖
ស្តាប់ - ០១:៥៦
លោកនាយករដ្ឋមន្ត្រីថា “ចំពោះរថយន្តតទ្រុង និងកាត់តកែច្នៃទាំងអស់ បើឃើញមានបើកបរនៅខេត្តណា ឬស្រុកណា គឺត្រូវចាប់ទុកទាំងអស់។ ទាំងរដ្ឋមន្រ្តី ទាំងចៅហ្វាយខេត្ត ចៅហ្វាយខណ្ឌ ទាំងចៅហ្វាយស្រុក គឺត្រូវទទួលខុសត្រូវ។ បើមិនចាត់វិធានការទេ គឺប្រឈមនឹងការដកតួនាទីមុខតំណែង។”
បើតាមលោកប្រមុខរដ្ឋាភិបាល គិតត្រឹមថ្ងៃទី១០ ខែកុម្ភៈ ឬមួយថ្ងៃបន្ទាប់ពីការប្រកាស គឺមានរថយន្តកែច្នៃដាក់ទ្រុងសណ្តោងធំៗខុសបច្ចេកទេស៨១គ្រឿងហើយដែលបានកាត់ទ្រុងចេញ និងរថយន្ត៧៦គ្រឿងទៀតត្រូវបានដោះទ្រុងសណ្តោងចេញ ហើយ ៣១០គ្រឿងទៀតកំពុងត្រៀមកាត់ទ្រុងចេញ។
គួរជម្រាបជូនថាកាលពីថ្ងៃទី៩ ខែកុម្ភៈ លោកនាយករដ្ឋមន្ត្រីហ៊ុន សែន បានប្រកាសប្រើកណ្តាប់ដៃដែក ដើម្បីលុបបំបាត់ការកែច្នៃរថយន្តខុសបច្ចេកទេសដឹកទំនិញ ដែលនាំឲ្យគ្រោះថ្នាក់ចរាចរណ៍កើតឡើងញឹកញាប់។
ការប្រកាសដាក់ចេញវិធានការកណ្តាប់ដៃដែកនេះ ដោយលោកប្រមុខរដ្ឋាភិបាលអះអាងថា មកពីគណៈកម្មាធិការជាតិសុវត្ថិភាពចរាចរណ៍ដែលដឹកនាំដោយរដ្ឋមន្រ្តីក្រសួងមហាផ្ទៃ លោក ស ខេង កន្លងមកធ្វើការមិនសូវមានប្រសិទ្ធភាព។
ជាថ្មីម្តងទៀត លោកនាយករដ្ឋមន្ត្រីក៏បានអំពាវនាវឲ្យអ្នកប្រើប្រាស់បណ្តាញសង្គមចូលផ្ញើសារ ឬបញ្ចេញមតិ លើបណ្តាញសង្គមរបស់លោក អំពីមន្ត្រីណា ដែលមិនអនុវត្តនូវវិធានការកណ្តាប់ដៃដែករបស់លោក ហើយពេលនោះលោកនឹងចាត់វិធានការដោយខ្លួនឯង។
អនុប្រធានវិទ្យាស្ថានសុវត្ថិភាពចរាចរណ៍ផ្លូវគោក លោក គង់ រតនៈ បានប្រាប់វិទ្យុបារាំងនៅថ្ងៃទី១១ ខែកុម្ភៈថា មិនឃើញមានរថយន្តខុសបច្ចេកទេស ឬរថយន្ត តទ្រុងទេ ចាប់ពីថ្ងៃ ដែលលោកនាយករដ្ឋមន្ត្រីហ៊ុន សែន បានប្រកាសដាក់ឱសានវាទ។ លោកបន្ថែមថា ការប្រកាសរបស់លោកនាយករដ្ឋមន្ត្រីហ៊ុន សែន គឺមានប្រសិទ្ធភាព ប៉ុន្តែអ្វីដែលលោកនាយករដ្ឋមន្ត្រីប្រកាសច្រើនតែមិនមានប្រសិទ្ធភាពជាដរាបនោះទេ។
លោក គង់ រតនៈ គាំទ្រ ប្រសិនបើលោកនាយករដ្ឋមន្ត្រីហ៊ុន សែន ធ្វើយ៉ាងណាឲ្យមន្ត្រីក្រោមឱវាទរបស់លោកអនុវត្តឲ្យបានយូរអង្វែង បន្ទាប់ពីការប្រកាសរបស់លោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ