លោក ខៀវ សុភ័គ៖យុទ្ធនាការតាមបណ្តាញសង្គមណា ដែលប៉ះពាល់សន្តិសុខ អាជ្ញាធរនឹងចាត់វិធានការ
ក្រសួងមហាផ្ទៃនៅថ្ងៃអាទិត្យនេះ បានឲ្យដឹងថា ការធ្វើយុទ្ធនាការអ្វីក៏ដោយតាមបណ្តាញសង្គម មិនថាតែយុទ្ធនាការថ្ងៃចន្ទពណ៌ខ្មៅទេ បើប៉ះពាល់ដល់សន្តិសុខសង្គម នោះអាជ្ញាធរនឹងចាត់វិធានការតាមផ្លូវច្បាប់។ ចំណែកតំណាងសហគមន៍បឹងកក់ ដែលកន្លងមកបានធ្វើយុទ្ធនាការថ្ងៃចន្ទពណ៌ខ្មៅ បានបញ្ជាក់ថាការធ្វើយុទ្ធនាការនេះតាមបណ្តាញសង្គមហ្វេសប៊ុក កំពុងស្ថិតក្នុងការពិចារណានៅឡើយ។
ចុះផ្សាយនៅថ្ងៃ៖
ស្តាប់ - ០២:០៩
លោក ខៀវ សុភ័គ អ្នកនាំពាក្យក្រសួងមហាផ្ទៃ បានឲ្យដឹងថាយុទ្ធនាការថ្ងៃចន្ទពណ៌ខ្មៅនៅតាមបណ្តាញសង្គម មិនមែនក្រសួងមហាផ្ទៃចាត់វិធានការមិនបាននោះទេ។ លោកបានលើកជាឧទាហរណ៍ថាអ្នកអំពាវនាវឲ្យមានបដិវត្តពណ៌កន្លងមកជាប់ពន្ធនាគារមិនទាន់ចេញផង គឺកំពុងតែស្ថិតក្នុងសមត្ថកិច្ចរបស់តុលាការនៅឡើយទេ។
បើទោះបីជាកម្ពុជាមិនទាន់មានច្បាប់គ្រប់គ្រងប្រព័ន្ធអ៊ីនធឺណិតក្តី ប៉ុន្តែអ្នកនាំពាក្យក្រសួងមហាផ្ទៃរូបនេះ បានបញ្ជាក់ថា ធ្វើយុទ្ធនាការអ្វីក៏ដោយ កុំឲ្យតែប៉ះពាល់ដល់សន្តិសុខសណ្តាប់ធ្នាប់សង្គម បើមិនដូច្នេះទេ អាជ្ញាធរនឹងចាត់វិធានការតាមផ្លូវច្បាប់។
អ្នកស្រី ទេព វន្នី តំណាងសហគមន៍បឹងកក់ ដែលកន្លងមកជាអ្នកចូលរួមយុទ្ធនាការថ្ងៃចន្ទពណ៌ខ្មៅ បានឲ្យវិទ្យុបារាំងដឹងថា សហគមន៍របស់អ្នកស្រីមានគំនិតថានឹងធ្វើយុទ្ធនាការថ្ងៃចន្ទពណ៌ខ្មៅតាមប្រព័ន្ធអ៊ឺនធឺណិត ឬតាមបណ្តាញសង្គមហ្វេសប៊ុកដែរ ប៉ុន្តែសហគមន៍របស់អ្នកស្រីមិនទាន់បានធ្វើនៅឡើយទេ។
គួររំលឹកជូនថា យុទ្ធនាការថ្ងៃចន្ទពណ៌ខ្មៅត្រូវបានបង្កើតឡើងភ្លាមៗ ក្រោយពីមានការចាប់ខ្លួនមន្ត្រីសមាគមការពារសិទ្ធិមនុស្សអាដហុក៤នាក់ និងមន្ត្រីគណៈកម្មាធិការជាតិរៀបចំការបោះឆ្នោតម្នាក់។ យុទ្ធនាការថ្ងៃចន្ទពណ៌ខ្មៅ គឺជាយុទ្ធនាការមួយ ដែលអ្នកចូលរួមត្រូវស្លៀកពាក់ខ្មៅ នៅរៀងរាល់ថ្ងៃចន្ទ ដើម្បីទាមទារឲ្យអាជ្ញាធររដ្ឋាភិបាលដោះលែងមន្ត្រីសមាគមការពារសិទ្ធិមនុស្ស និងមន្ត្រី គ.ជ.ប ដែលត្រូវបានចោទប្រកាន់ដោយតុលាការថាមានជាប់ទាក់ទងនឹងករណីអំពើពុករលួយ តាមមាត្រា២៩ និង៥៤៨ នៃក្រមព្រហ្មទណ្ឌ ដែលអាចជាប់ទោសពី៥ ទៅ១០ឆ្នាំ។
នៅថ្ងៃចន្ទទី២៣ ខែឧសភានេះ គឺជាលើកទី៣ហើយ ដែលយុទ្ធនាការថ្ងៃចន្ទពណ៌ខ្មៅនឹងត្រូវធ្វើឡើង ប៉ុន្តែសម្រាប់ថ្ងៃចន្ទ ទី២៣ ខែឧសភានេះ អ្នកស្រីនឹងដឹកនាំធ្វើយុទ្ធនាការនេះក្នុងសហគមន៍បឹងកក់។ នេះបើតាមអ្នកស្រីទេព វន្នី។ តំណាងសហគមន៍បឹងកក់រូបនេះ បានបន្តថាការធ្វើយុទ្ធនាការថ្ងៃចន្ទពណ៌ខ្មៅមិនខុសច្បាប់អ្វីទេ ហើយការធ្វើនេះគឺដើម្បីទាមទាររកយុត្តិធម៌ដល់មន្ត្រីអង្គការសង្គមស៊ីវិល និងមន្ត្រីគ.ជ.ប។
សូមបញ្ជាក់ថា យុទ្ធនាការថ្ងៃចន្ទពណ៌ខ្មៅ បានធ្វើឡើងពីរលើកមកហើយ ប៉ុន្តែត្រូវបានអាជ្ញាធររារាំង នឹងចាប់ខ្លួនអ្នកចូលរួមយកទៅសាកសួរ និងដោះលែងវិញផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ