OHCHR៖ ការកាត់ទោសដោយមហាជននៅតែកើតមាននៅកម្ពុជា
ការិយាល័យឧត្តមស្នងការទទួលបន្ទុកសិទ្ធិមនុស្សនៅកម្ពុជាហៅកាត់ថា OHCHR បានចេញផ្សាយរបាយការណ៍កម្រាសជិត៤០ទំព័រ ក្រោមចំណងជើងថា តុលាការប្រជាជន ការបង្ការ និងការឆ្លើយតបចំពោះការកាត់ទោសដោយមហាជន។ របាយការណ៍របស់ OHCHR បង្ហាញថា ការកាត់ទោសដោយមហាជននៅតែកើតមាននៅកម្ពុជា។
ចុះផ្សាយនៅថ្ងៃ៖
ស្តាប់ - ០១:៥៧
សំណុំរឿងដែលកាត់ទោសដោយតុលាការប្រជាជនរួមមានៈ បទល្មើសលួច ករណីបង្កគ្រោះថ្នាក់ចរាចរណ៍ និងអំពើអាបធ្មប់ជាដើម។ ក្នុងនោះពីឆ្នាំ២០១០ដល់២០១៨ ការកាត់ទោសដោយតុលាការប្រជាជនមានចំនួន៧៣ករណី ក្នុងនោះ២២ករណីត្រូវបានសម្លាប់បន្ទាប់ពីមហាជនមើលឃើញថា ក្រុមមនុស្សទាំងនោះបានប្រព្រឹត្តបទល្មើសលួច និងបង្កគ្រោះថ្នាក់ចរាចរណ៍ ខណៈ៣៥ករណីត្រូវបានសម្លាប់បន្ទាប់ពីរងការចោទថា ចេះអំពើអាបធ្មប់។ ដោយឡែកចំនួនសេសសល់ពីនេះប្រមាណជា១៦ករណីទៀត គឺជាការរងរបួស និងរងការយាយី។
ក្នុងចំណោមសំណុំរឿងទាំងបី ដែលរងការកាត់ទោសពីតុលាការមហាជន ការិយាល័យឧត្តមស្នងការទទួលបន្ទុកសិទ្ធិមនុស្សនៅកម្ពុជាព្រួយបារម្ភខ្លាំងមែនទែនចំពោះការសម្លាប់ ការវាយដំ និងការយាយីដែលទាក់ទងអំពើអាបធ្មប់។ នេះក៏ដោយសារថា សំណុំរឿងនេះទទួលបានការចាប់អារម្មណ៍តិចតួចនៅឡើយពីសាធារណៈជន ខណៈនិទណ្ឌភាពកើតចេញពីអំពើនេះនៅតែកើតមាន។ ជាក់ស្ដែងករណីមួយក្នុងចំណោមករណីជាច្រើនដែលOHCHR លើកមកបង្ហាញក្នុងរបាយការណ៍របស់ខ្លួននៅពេលនេះគឺ ក្នុងខេត្តកំពង់ស្ពឺពលរដ្ឋមួយក្រុមប្រមាណជាជិត៦០០នាក់ប្រដាប់ដោយដំបងឈើ និងដុំថ្ម គប់និងវាយដំទៅលើបុរសម្នាក់រហូតដល់ស្លាប់ក្រោយអ្នកភូមិសន្និដ្ឋានថា បុរសរូបនោះជាគ្រូខ្មែរចេះអំពើអាបធ្មប់។
សូមជម្រាបជូនថា ការកាត់ទោសដោយតុលាការប្រជាជន ឬមហាជន គឺជាអំពើរបស់មហាជនយកច្បាប់មកអនុវត្តដោយខ្លួនឯង ដូចជា ការសម្លាប់ ការវាយដំលើមនុស្ស ដែលត្រូវបានចោទប្រកាន់ថា បានប្រព្រឹត្តបទល្មើសណាមួយ។ គ្មានទំនុកចិត្តពីមន្ត្រីនគរបាល ប្រព័ន្ធតុលាការនិងប្រព័ន្ធគ្រប់គ្រងពន្ធគារ ទើបជាបច្ច័យជំរុញឲ្យការកាត់ទោសដោយតុលាការមហាជន។
ទោះជាបែបនេះក្ដីនៅចុងបញ្ចប់នៃរបាយការណ៍របស់ខ្លួនOHCHR បានផ្ដល់អនុសាសន៍ដល់រដ្ឋាភិបាលចំពោះមូលដ្ឋានច្បាប់មួយចំនួន ដើម្បីកាត់បន្ថយចលនាកាត់ទោសដោយមហាជនរួមមាន ការពង្រឹងស្ថាប័នយុត្តិធម៌ ការស៊ើបអង្កេត និងចោទប្រកាន់ចំពោះគ្រប់បទល្មើសព្រហ្មទណ្ឌទាំងអស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ