ប្រជាប្រិយភាពស្ថិតនៅលើទង្វើមិនមែននៅលើពាក្យសម្តី
ចុះផ្សាយនៅថ្ងៃ៖
ស្តាប់ - ០៤:៤៥
ការបោះឆ្នោតទើបតែកន្លងទៅជាងមួយឆ្នាំប៉ុណ្ណោះ ប៉ុន្តែ យុទ្ធនាការរកប្រជាប្រិយភាពហាក់បានចាប់ផ្តើមហើយ។ បក្សប្រឆាំងចុះមូលដ្ឋានគ្រប់ទិសទីទាំងក្នុងនិងក្រៅប្រទេសដើម្បីពង្រឹងជំនឿចិត្តអ្នកគាំទ្រ។ ចំណែកបក្សកាន់អំណាចវិញបានផ្តើមចាត់វិធានការជាក់ស្តែងមួយចំនួនដើម្បីផ្គាប់ចិត្តម្ចាស់ឆ្នោត។ នេះសបញ្ជាក់ឲ្យឃើញថា អ្នកនយោបាយបានផ្តើមយល់អំពីតម្លៃរបស់ប្រជាពលរដ្ឋកាន់តែខ្លាំងជាងមុន។ ប៉ុន្តែ សូមកុំភ្លេចថា អំណឹះតទៅប្រជាប្រិយភាពស្ថិតនៅលើទង្វើគឺមិនមែននៅលើសម្តីនោះទេ។
ជាធម្មតា រដូវបោះឆ្នោតគឺជាពេលវេលាដែលអ្នកនយោបាយនាំគ្នាសកម្មក្នុងការចុះជួប ប្រជាពលរដ្ឋម្ចាស់ឆ្នោត។ ជាពិសេសគឺអំឡុងពេលប៉ុន្មានខែមុនពេលបោះឆ្នោត និងជាពិសេសក្នុងពេលយុទ្ធនាការឃោសនាបោះឆ្នោតតែម្តងដែលអ្នកនយោបាយតែង យកចិត្តអ្នកបោះឆ្នោតខ្លាំងជាងគេ។ ក្រោយពេលបោះឆ្នោត សកម្មភាពក៏ស្ងប់ស្ងាត់ទៅវិញជាធម្មតា។ នេះជាព្រឹត្តិការណ៍ដដែលៗក្នុងរយៈពេលពីរទសវត្សរ៍ចុងក្រោយនេះ។
ប៉ុន្តែ ក្រោយការបោះឆ្នោតអាណត្តិទី៥នេះ ស្ថានការណ៍បានផ្លាស់ប្តូរ។ យុទ្ធសាស្ត្រនយោបាយក៏ត្រូវផ្លាស់ប្តូរទៅតាមនោះដែរ។ ទាំងគណបក្សកាន់អំណាច ទាំងគណបក្សប្រឆាំងហាក់ដូចជាខិតខំប្រឹងប្រែងក្នុងការចុះកៀកជាមួយ ប្រជាពលរដ្ឋម្ចាស់ឆ្នោតតាំងពីដើមអាណត្តិ។ គណបក្សសង្គ្រោះជាតិបានផ្តើមចុះជួបជាមួយអ្នកបោះឆ្នោតរបស់ខ្លួននៅ គ្រប់ទិសទីដើម្បីស្តាប់សំណូមពរផងនិងដើម្បីពង្រឹងទំនុកចិត្តរបស់ ម្ចាស់ឆ្នោតផង។
គណបក្សប្រជាជនកម្ពុជាក៏បានម្នីម្នាចាត់វិធានការមួយចំនួនដោយមិន បង្អន់យូរដែរ។ វេទិកាសាធារណៈ និងគណៈកម្មការចម្រុះចុះមូលដ្ឋានត្រូវបានបង្កើតឡើងតាំងពីដើមអាណត្តិ ដើម្បីស្តាប់សំណូមពរនិងដោះស្រាយបញ្ហាជូនប្រជាពលរដ្ឋម្ចាស់ឆ្នោត។ ចំណាត់ការបញ្ចុះតម្លៃអគ្គិសនីដល់អ្នកជួលផ្ទះ និងការដំឡើងប្រាក់ខែជូនមន្ត្រីរាជការនិងកម្មករជាដើមក៏ជាចំណែកមួយ ក្នុងកិច្ចខិតខំស្តារប្រជាប្រិយភាពរបស់ខ្លួនដែរ។ នេះសបញ្ជាក់ថា តម្លៃប្រជាពលរដ្ឋខ្មែរក្នុងក្រសែភ្នែកអ្នកនយោបាយកាន់តែឡើងខ្ពស់ជាង មុន។
ជាការពិតណាស់ វត្តមាននៅឯមូលដ្ឋានរបស់មន្ត្រីនយោបាយមិនមែនជារឿងថ្មីទេ។ ប៉ុន្តែ អ្វីដែលសំខាន់នោះគឺវិធីរកប្រជាប្រិយភាពដែលត្រូវផ្លាស់ប្តូរថ្មី។ កន្លងទៅ គណបក្សនយោបាយច្រើនតែប្រើវិធីចែកអំណោយ ការសន្យានិងការវាយប្រហារគ្នាដើម្បីទាក់ទាញម្ចាស់ឆ្នោត។ ជាក់ស្តែង គណបក្សកាន់អំណាចច្រើនតែផ្តោតលើការសំណេះសំណាលនិងចែកអំណោយ។ នៅក្នុងពិធីទាំងនោះទៀតសោត ពួកគេចូលចិត្តនិយាយឲ្យម្ចាស់ឆ្នោតស្តាប់ តែមិនចូលចិត្តស្តាប់ម្ចាស់ឆ្នោតនិយាយទេ។
ម្យ៉ាងទៀត អ្នកដែលចូលរួមក្នុងពិធីសំណេះសំណាលត្រូវបានមេភូមិឬមេឃុំកេណ្ឌឲ្យ មកអង្គុយស្តាប់លោកធំនិយាយ។ ពួកគេខិតខំប្រមូលមនុស្សឲ្យបានច្រើនតាមដែលអាចធ្វើបានដើម្បីឲ្យ គណៈអធិបតីសប្បាយចិត្ត។ នៅពេលឃើញមនុស្សច្រើនមកចូលរួម មន្ត្រីថ្នាក់លើទៅពីភ្នំពេញក៏រីកមុខហើយក៏យល់ច្រឡំថាពួកគេ សុទ្ធតែជាអ្នកបោះឆ្នោតឲ្យខ្លួន។ បន្ទាប់ពីចែកអំណោយនិងហៅទូរទស្សន៍ទៅថតដើម្បីទុកបង្អួត នាយករដ្ឋមន្ត្រីហើយនោះ ពួកគេក៏វិលមកភ្នំពេញវិញហើយបូកលេខចំនួនអ្នកចូលរួមដើម្បីរាយការណ៍ ជូនថ្នាក់លើដោយមិនបានស្វែងយល់និងដោះស្រាយបញ្ហារាប់រយជំពូកដែល ម្ចាស់ឆ្នោតកំពុងជួបប្រទះនោះឡើយ។
របៀបធ្វើការគ្មានប្រសិទ្ធភាពទាំងនេះហើយដែលត្រូវផ្លាស់ប្តូរ។ អំណឹះតទៅ មន្ត្រីពង្រឹងមូលដ្ឋាន គួរប្តូរទម្លាប់ពីនិយាយឲ្យរាស្ត្រស្តាប់ ទៅជាស្តាប់មតិរាស្ត្រវិញម្តង។ ប្តូរពីទម្លាប់ស្តាប់របាយការណ៍របស់មេភូមិនិងមេឃុំទៅជាស្តាប់ របាយការណ៍ផ្ទាល់ពីម្ចាស់ឆ្នោតនិងប្តូរពីទម្លាប់ធ្វើការដើម្បី ផ្គាប់ចិត្តតែថ្នាក់លើទៅជាទម្លាប់ផ្គាប់ចិត្តពលរដ្ឋម្ចាស់ឆ្នោតវិញ។ នេះជាកំណែទម្រង់ស៊ីជម្រៅនឹងជាកត្តាស្លាប់រស់របស់បក្សកាន់អំណាច។
ចំណែកគណបក្សប្រឆាំងក៏ត្រូវផ្លាស់ប្តូរយុទ្ធសាស្ត្រមួយចំនួនដែរ។ ការរិះគន់បរិហារចំណុចខ្សោយបក្សកាន់អំណាចហើយសន្យាធ្វើបានល្អជាង គឺជារឿងធម្មតាទេ ប៉ុន្តែ សង្គ្រាមពាក្យសម្តីធ្ងន់ៗគួរត្រូវបានកាត់បន្ថយ ចំណែកឯការសន្យាក៏គួរតែគិតពីលទ្ធភាពដែលអាចធ្វើបានផងដែរពីព្រោះ ការមិនគោរពពាក្យសន្យានឹងទទួលទណ្ឌកម្មពីម្ចាស់ឆ្នោតជាមិនខាន។ អ្វីដែលគណបក្សសង្គ្រោះជាតិឆ្លងកាត់ចុងក្រោយនេះគឺជាឧទាហរណ៍ស្រាប់។ សូមកុំភ្លេចថា អ្នកបោះឆ្នោតសម័យនេះឆ្លាតជាងមុនដោយពួកគេចង់ឃើញទង្វើជាក់ស្តែង ច្រើនជាងការសន្យា។
សរុបមកវិញ មកដល់ដំណាក់កាលនេះ ការផ្តល់តម្លៃដល់រាស្ត្រម្ចាស់ឆ្នោតឲ្យបានខ្លាំងនិងឲ្យបាន ត្រឹមត្រូវគឺជាកត្តាកំណត់ជោជ័យរបស់អ្នកនយោបាយ។ ក្នុងន័យនេះ គ្រប់គណបក្សទាំងអស់ត្រូវផ្តោតលើប្រសិទ្ធភាពការងារជាជាងវោហាសាសន៍ ពោលគឺ អំណឹះតទៅ ប្រជាប្រិយភាពស្ថិតនៅលើទង្វើជាងនៅលើពាក្យសម្តី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ