សំណុំរឿង លោក កឹម សុខា៖ តុលាការកំណត់យកថ្ងៃទី១៥មករាឆ្នាំ២០២០ ដើម្បីបើកសវនាការជំនុំជម្រះ
«១៥មករា២០២០» គឺជាកាលបរិច្ឆេទដែលសាលាដំបូងរាជធានីភ្នំពេញកំណត់យក ដើម្បីបើកសវនាការជំនុំជម្រះលើសំណុំរឿងលោក កឹម សុខា។ លោក កឹម សុខា ដែលជាប់ចោទពីបទសន្ទិដ្ឋិភាពជាមួយបរទេស តាមមាត្រា៤៤៣ នៃក្រមព្រហ្មទណ្ឌកម្ពុជា។ បើតាមសេចក្ដីប្រកាសព័ត៌មានរបស់អ្នកនាំពាក្យសាលាដំបូងរាជធានីភ្នំពេញ សវនាការជំនុំជម្រះលើសំណុំរឿងលោក កឹម សុខា នេះ នឹងប្រព្រឹត្តធ្វើនៅសាលសវនាការទី១ នៃសាលាដំបូងរាជធានីភ្នំពេញ ចាប់ពីម៉ោង៨កន្លះព្រឹកតទៅ។
ចុះផ្សាយនៅថ្ងៃ៖
ស្តាប់ - ០២:២៣
តើលោក កឹម សុខា ប្រធានអតីតគណបក្សសង្គ្រោះជាតិ ពិតជាបានប្រព្រឹត្តអំពើសន្ទិដ្ឋិភាព ដូចការចោទប្រកាន់មែនឬក៏យ៉ាងណា? តុលាការសាលាដំបូងរាជធានីភ្នំពេញនឹងកាត់សេចក្ដីលើសំណុំរឿងនេះ នៅថ្ងៃទី១៥ខែមករា ដើមឆ្នាំ២០២០ខាងមុខ។ សូមជម្រាបជូនថា ការប្រកាសបើកសវនាការជំនុំជម្រះលើអង្គសេចក្ដីក្នុងសំណុំរឿងលោក កឹម សុខា នេះ ធ្វើឡើងបន្ទាប់ពីចៅក្រមស៊ើបសួរនៃសាលាដំបូងរាជធានីភ្នំពេញ បិទបញ្ចប់ការស៊ើបសួរនៅថ្ងៃទី១៥ខែវិច្ឆិកាកន្លងទៅ។
នៅចំពោះមុខសវនាការជំនុំជម្រះដែលនឹងឈានចូលមកដល់នាពេលខាងមុខ ក្រុមមេធាវីការពារក្ដីឲ្យលោក កឹម សុខា នៅតែបញ្ជាក់ពីជំហរបស់ខ្លួនដដែល។ នោះគឺចង់ឲ្យតុលាការទម្លាក់ចោទបទចោទប្រកាន់ទាំងស្រុង ដោយសំអាងថា លោក កឹម សុខា ជាមនុស្សស្អាតស្អំ ពោលគឺមិនមានជាប់ពាក់ព័ន្ធនឹងការឃុបឃិតជាមួយបរទេសដើម្បីផ្ដួលរំលំរដ្ឋាភិបាលកម្ពុជា ដូចការចោទប្រកាន់របស់តុលាការនោះទេ។ និងថា នៅក្នុងការស៊ើបអង្កេតអស់រយៈពេលជាង២ឆ្នាំកន្លងទៅនេះ តុលាការហាក់មិនបានរកឃើញភស្តុតាងណាមួយដែលបង្ហាញអំពីទង្វើក្បត់ជាតិរបស់លោក កឹម សុខា ឡើយ។
គួររំឭកជូនថា លោក កឹម សុខា ប្រធានអតីតគណបក្សសង្រ្គោះជាតិ ត្រូវបានសមត្ថកិច្ចចាប់ខ្លួន នៅគេហដ្ឋានរបស់លោក ស្ថិតនៅសង្កាត់បឹងកក់២ ខណ្ឌទួលគោក រាជធានីភ្នំពេញ កាលពីយប់ថ្ងៃទី០២ ឈានចូលថ្ងៃទី០៣កញ្ញាឆ្នាំ២០១៧ ពីបទក្បត់ជាតិ។ ការចាប់ខ្លួននេះ ធ្វើឡើងក្រោយមានការចុះផ្សាយ និងចែករំលែកតៗគ្នានូវវីឌីអូឃ្លីបខ្លីរបស់ លោក កឹម សុខា ថ្លែងទៅកាន់ពលរដ្ឋរស់នៅបរទេសមួយក្រុម។ ក្នុងវីឌីអូនោះ លោក កឹម សុខា បានលើកឡើង អំពីយុទ្ធសាស្ដ្រនយោបាយរបស់លោក ដែលលោកថាមានការគាំទ្រពីសហរដ្ឋអាមេរិក។ អ្វីដែលលោក កឹម សុខា ថ្លែងទាំងអស់នោះ ត្រូវបានរដ្ឋាភិបាលកម្ពុជាយកជាមូលដ្ឋានចោទលោក កឹម សុខា ថា មានផែនការប៉ុនប៉ងផ្តួលរំលំរដ្ឋាភិបាល។ ហើយប្រសិនបើរកឃើញថាបានប្រព្រឹត្តដូចការចោទប្រកាន់មែននោះ លោកកឹម សុខា អាចប្រឈមនឹងការជាប់ពន្ធនាគារពី១៥ទៅ៣០ឆ្នាំ តាមមាត្រា៤៤៣នៃក្រមព្រហ្មទណ្ឌកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ