អំណាចសន្លឹកឆ្នោតកំពុងចាប់បង្ខំឲ្យមន្ត្រីបម្រើរាស្ត្រ
ចុះផ្សាយនៅថ្ងៃ៖
ស្តាប់ - ០៤:២៩
លោកនាយករដ្ឋមន្ត្រី ហ៊ុន សែន តែងតែបានណែនាំជាញឹកញាប់ឲ្យមន្ត្រីក្រោមឱវាទបម្រើប្រជាពលរដ្ឋឲ្យបានល្អ និងត្រូវចាត់ទុកពួកគេជាចៅហ្វាយរបស់ខ្លួន។ ប៉ុន្តែ នៅក្នុងឆាកនយោបាយកម្ពុជា រហូតមកដល់ពេលនេះ ពាក្យថា«មន្ត្រីជាអ្នកបម្រើរាស្ត្រ» គ្រាន់តែជាទ្រឹស្តីតែប៉ុណ្ណោះ។ ទាំងក្នុងការអនុវត្តជាក់ស្តែង ក៏ដូចជាក្នុងផ្នត់គំនិតមនុស្សជាទូទៅដែរ ប្រជារាស្ត្រតែងគោរពឬកោតខ្លាចមន្ត្រី និងចាត់ទុកពួកគេជាចៅហ្វាយនាយរបស់ខ្លួនទៅវិញ។ ប៉ុន្តែ អំណាចសន្លឹកឆ្នោតកំពុងចាប់បង្ខំឲ្យមន្ត្រីធ្វើការបម្រើរាស្ត្រ។ អ្នកដែលដើរមិនទាន់សភាពការណ៍នេះទំនងជាគ្មានទីតាំងឈរជើងទៀតឡើយ។
នៅក្នុងរបបប្រជាធិបតេយ្យសេរី ប្រជាពលរដ្ឋត្រូវបានគេចាត់ទុកថាជាម្ចាស់ប្រទេសនិងម្ចាស់របស់អ្នកដឹកនាំគ្រប់លំដាប់ថ្នាក់ ពីព្រោះពួកគេមានអំណាចពិសេសមួយគឺសន្លឹកឆ្នោតដែល អាចធ្វើឲ្យមន្ត្រីទាំងនោះឡើងបុណ្យស័ក្តិឬក៏ធ្លាក់ចេញពីតំណែងបាន។ ដោយសារអំណាចសន្លឹកឆ្នោតនេះហើយបានជាមានទ្រឹស្តី«មន្ត្រីបម្រើរាស្ត្រ»។
ក៏ប៉ុន្តែ នៅកម្ពុជា ទ្រឹស្តីនេះហាក់នៅឆ្ងាយពីការពិតនៅឡើយ។ ជាទូទៅ មន្ត្រីខ្មែរភាគច្រើនមិនដែលចាត់ទុកខ្លួនឯងថាជាអ្នកបម្រើប្រជាពលរដ្ឋទេ ផ្ទុយទៅវិញ ពួកគេតែងប្រើឥទ្ធិពលដើម្បីឲ្យប្រជាពលរដ្ឋគោរពនិងកោតខ្លាចអំណាចរបស់ខ្លួនទៅវិញ។ ផ្នត់គំនិតបែបនេះហាក់បានកើតចេញជាស្វ័យប្រវត្តិពីអ្នកមានអំណាចដោយពួកគេច្រើនតែតាំងខ្លួនជាអ្នកដែលមានឋានៈខ្ពង់ខ្ពស់ហួសពីប្រជាជនសាមញ្ញ។
ចំណែកឯប្រជាពលរដ្ឋវិញក៏ហាក់ដូចជាព្រមទទួលយកដោយស្វ័យប្រវត្តិនូវអំណាចគ្រប់គ្រងរបស់អ្នកនយោបាយនិងបានប្រគល់វាសនារបស់ខ្លួនទាំងស្រុងទៅលើមន្ត្រីដែលមានអំណាចបុណ្យស័ក្តិ។ ជាក់ស្តែង ប្រជាជនខ្មែរគ្រប់ជំនាន់ច្រើនតែចាត់ទុកអ្នកដឹកនាំឬមន្ត្រីអាជ្ញាធរថាជាមេកើយនិងជាអ្នកសម្រេចជោគវាសនារបស់ប្រទេសជាតិ។ ចំណែកខ្លួនឯងជាប្រជាជនសាមញ្ញត្រូវគិតគូរតែពីបញ្ហាក្រពះតែមួយមុខប៉ុណ្ណោះ។
ដោយសារផ្នត់គំនិតសង្គមបែបនេះហើយបានជាអ្នកនយោបាយច្រើនតែដឹកនាំប្រទេសតាមទំនើងចិត្តដោយមិនខ្វល់ខ្វាយពីសេចក្តីត្រូវការរបស់ប្រជាពលរដ្ឋប៉ុន្មានឡើយ។ សង្គ្រាមស៊ីវិលអស់រយៈពេលជាច្រើនទសវត្សរ៍រហូតរុញច្រានប្រទេសឲ្យធ្លាក់ក្នុងរបបខ្មែរក្រហមគឺជាផលវិបាកជាក់ស្តែងបំផុតនៃការដឹកនាំប្រទេសទៅតាមមហិច្ឆតាគ្មានព្រំដែនរបស់អ្នកនយោបាយ។ ទីបំផុត អ្នករងគ្រោះខ្លាំងជាងគេគឺប្រជាពលរដ្ឋខ្មែរខ្លួនឯង។
ប៉ុន្តែ បច្ចុប្បន្ននេះ ប្រទេសកម្ពុជាកំពុងស្ថិតក្នុងរបត់ថ្មីនៃប្រជាធិបតេយ្យសេរីពហុបក្សដែលប្រជាពលរដ្ឋមានអំណាចធ្វើជាម្ចាស់ប្រទេស និងម្ចាស់ជោគវាសនារបស់ខ្លួន។ អំណាចរបស់ពួកគេដែលបានមកពីសន្លឹកឆ្នោតកំពុងមានឥទ្ធិពលកាន់តែខ្លាំងឡើង។ អំណាចសន្លឹកឆ្នោតកំពុងចាប់បង្ខំឲ្យអ្នកនយោបាយត្រូវតែធ្វើការបម្រើប្រជាពលរដ្ឋបានល្អជាងមុន។ ទោះជាយ៉ាងនេះក្តី ក៏នៅមានប្រជាពលរដ្ឋខ្មែរជាច្រើននៅតែមិនទាន់យល់ដឹង និងមិនទាន់ចេះប្រើពីអំណាចនេះឲ្យមានប្រសិទ្ធភាពនៅឡើយទេ។ ស្ថានភាពនេះគឺជាឱកាសដែលបើកដៃឲ្យអ្នកនយោបាយនិងមន្ត្រីមានបុណ្យស័ក្តិមួយចំនួននៅតែប្រើអំណាចបំពានទៅលើអ្នកទន់ខ្សោយ។
ការក្រើនរម្លឹកជាញឹកញាប់របស់លោកនាយករដ្ឋមន្ត្រីហ៊ុន សែន ដែលចង់ឲ្យមន្ត្រីធ្វើខ្លួនជាអ្នកបម្រើរាស្ត្រគឺជាសារដ៏សំខាន់មួយសម្រាប់ពញ្ញាក់ស្មារតីមន្ត្រីមួយចំនួនដែលនៅតែលង់លក់ក្នុងទស្សនៈចាស់គំរឹលនោះឲ្យភ្ញាក់រលឹកឡើងហើយប្រញាប់រត់ឲ្យទាន់សភាពការណ៍នយោបាយថ្មីដែលកំពុងតែវិវឌ្ឍ៍ទៅមុខជាលំដាប់។ សភាពការណ៍នយោបាយថ្មីបច្ចុប្បន្នគឺ «មន្ត្រីគឺជាអ្នកបម្រើរាស្ត្រ»។ ដូច្នេះ ការបន្តលង់លក់ក្នុងផ្នត់គំនិតចាស់ហើយមិនព្រមទទួលយកវប្បធម៌នយោបាយថ្មីនេះ មិនត្រឹមតែជាគ្រោះថ្នាក់សម្រាប់មន្ត្រីទាំងនោះតែប៉ុណ្ណោះទេ តែវាក៏បង្កគ្រោះថ្នាក់ធំធេងដល់រដ្ឋាភិបាលផងដែរ។
ម្យ៉ាងទៀត សាររបស់ប្រមុខរដ្ឋាភិបាលក៏អាចពញ្ញាក់ស្មារតីប្រជាពលរដ្ឋម្ចាស់ឆ្នោតឲ្យភ្ញាក់រលឹក និងចេះប្រើអំណាចរបស់ខ្លួនឲ្យបានត្រឹត្រូវផងដែរ។ ពីព្រោះសូមកុំភ្លេចថា សន្លឹកឆ្នោតមួយសន្លឹកពិតជាអាចផ្លាស់ប្តូរស្ថានភាពមន្ត្រីមួយចំនួនដែលចង់តែធ្វើចៅហ្វាយរាស្ត្រនោះឲ្យមកជាមន្ត្រីដែលធ្វើការបម្រើរាស្ត្រវិញ។ ទោះជាយ៉ាងនេះក្តី ក៏មន្ត្រីខ្មែរមួយចំនួននៅតែមិនព្រមផ្លាស់ប្តូរឥរិយាបថចាស់គំរឹលដើម្បីក្លាយខ្លួនជាមន្ត្រីសម័យក្នុងបរិបទប្រជាធិបតេយ្យសេរីនៅឡើយទេ។
យ៉ាងណាក៏ដោយ ការវិវឌ្ឍនៃផ្នត់គំនិតរបស់ប្រជាពលរដ្ឋខ្មែរចុងក្រោយនេះគឺជានិន្នាការមួយដែលបញ្ជាក់ថា អំណាចសន្លឹកឆ្នោតកាន់តែមានឥទ្ធិពលខ្លាំងជាងមុន ហើយអំណាចនេះក៏កាន់តែរឹងមាំជាលំដាប់។ ក្នុងន័យនេះ ទោះចង់ឬមិនចង់ ស្ថានការណ៍នយោបាយទំនងជាមិនអនុគ្រោះឲ្យមន្ត្រីដែលចូលចិត្ត«កន្ទេលធំបន្លំដេក»អាចឈរជើងបានយូរតទៅទៀតឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ