តុលាការ បើកសវនាការកាត់ទោសសកម្មជនព្រះសង្ឃការពារសិទ្ធិមនុស្ស ព្រះតេជគុណ លួន សុវាត
ចៅក្រមតុលាការសាលាដំបូងរាជធានីភ្នំពេញ បានបើកសវនាការ កាត់ទោសលើព្រះសង្ឃ ដែលជាអ្នកការពារសិទិ្ធមនុស្សដ៏ល្បីឈ្មោះ គឺព្រះតេជគុណ លួន សុវាត នាព្រឹកថ្ងៃអង្គារ ទី២៥វិច្ឆិកា។ ព្រះតេជគុណលួន សុវាត ត្រូវបានចោទប្រកាន់ពីបទ «ញុះញង់ឲ្យប្រព្រឹត្តិបទឧក្រិដ្ឋ» សម្រាប់ការចូលរួមនិងគាំទ្រការធ្វើបាតុកម្មរបស់ជនរងគ្រោះដីធ្លីពាសពេញប្រទេសកម្ពុជា។ សំណុំរឿងក្តីនោះ ជាប់ពាក់ព័ន្ធនឹងលោក សួន សេរីរដ្ឋា ប្រធានចលនាអំណាចប្រជាពលរដ្ឋខ្មែរ ដែលកំពុងរស់នៅអាមេរិក។ នៅពេលចាប់ផ្តើមសវនាការ ប្រធានក្រុមប្រឹក្សាជំនុំជម្រះបានប្រកាសបំបែកសំណុំរឿងព្រះតេជគុណ លួន សុវាត និងលោក សួនសេរីរដ្ឋា។ បន្ទាប់មក សវនាការលើសំណុំរឿងរបស់ព្រះតេជគុណ លួន សុវាត ត្រូវបានលើកពេល ដោយគ្មានកាលកំណត់។ មូលហេតុ មកពីកំហុសនីតិវិធីរបស់តុលាការ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៧
ក្នុងពេលតុលាការរាជធានីភ្នំពេញ បើកសវនាការ នៅព្រឹកថ្ងៃ២៥វិច្ឆិកានេះ មានសកម្មជនដីធ្លី សមាជិកសមាគមអ្នកប្រជាធិបតេយ្យ អ្នកគាំទ្រគណបក្សសង្គ្រោះជាតិ ក្រុមយុវជន ព្រមទាំងព្រះសង្ឃជាច្រើន បានប្រមូលផ្តុំនៅក្រៅតុលាការ ដើម្បីរង់ចាំស្តាប់លទ្ធផលនៃសវនាការនោះ។ ក្រុមអ្នកប្រមូលផ្តុំ លើកបដា ស្រែកមេក្រូទាំងនោះ ទាមទារឲ្យតុលាការ ទម្លាក់ការចោទប្រកាន់លើសកម្មជនព្រះសង្ឃ។
អង្គការលីកាដូ បានចាត់ទុកសវនាការកាត់ទោសអ្នកការពារសិទិ្ធមនុស្ស ដែលល្បីឈ្មោះ ព្រះតេជគុណ លួន សុវាត ថាជានីតិវិធីក្នុងគោលដៅបំបិទសំឡេងរបស់ព្រះសង្ឃ។ ព្រះតេជគុណ លួន សុវាតត្រូវបានចោទប្រកាន់ពីបទ "ញុះញង់ឲ្យប្រព្រឹត្តិបទឧក្រិដ្ឋ"សម្រាប់ការចូលរួមរបស់ព្រះអង្គ ដែលបានគាំទ្រការធ្វើបាតុកម្មរបស់ជនរងគ្រោះដីធ្លីពាសពេញប្រទេសកម្ពុជា ពិសេសនៅក្នុងជម្លោះដីធ្លីនៅស្រុកជីក្រែង ខេត្តសៀមរាប ដែលជាស្រុកកំណើតរបស់ព្រះតេជគុណ។
ក្នុងពេលចាប់ផ្តើមសវនាការ នៅព្រឹកថ្ងៃទី២៥វិច្ឆិកា ព្រះរាជអាជ្ញា បានស្នើសុំឲ្យប្រធានអង្គជំនុំជម្រះ បង្វិលសំណុំរឿងព្រះតេជគុណ លួន សុវាត ទៅចៅក្រមស៊ើបសួរវិញ។ រីឯប្រធានក្រុមប្រឹក្សាជំនុំជម្រះបានប្រកាសបំបែកសំណុំរឿងព្រះតេជគុណ លួន សុវាត និងលោក សួនសេរីរដ្ឋា ប្រធានចលនាអំណាចប្រជាពលរដ្ឋខ្មែរ ដែលកំពុងរស់នៅអាមេរិក។ លោកសួនសេរីរដ្ឋា ត្រូវបានតុលាការកាត់ទោសកំបាំងមុខ រួចមកហើយ ពីបទក្បត់ជាតិ។
បន្ទាប់មក សវនាការលើសំណុំរឿងរបស់ព្រះតេជគុណ លួន សុវាត ត្រូវបានលើកពេល ដោយគ្មានកាលកំណត់ ដោយសារតែកំហុសនីតិវិធីរបស់តុលាការ ពោលគឺចៅក្រមបានសម្រេចរួចហើយឲ្យបំបែកសំណុំរឿងក្តីព្រះតេជគុណ ចេញពីករណីលោកសួនសេរីរដ្ឋា ក្នុងសវនាការលើកមុន តែមកដល់ថ្ងៃនេះ នៅមិនទាន់បំបែកសំណុំរឿងក្តីនៅឡើយ។
សវនាការកាត់ទោសព្រះតេជគុណ លួន សុវាត មានការចូលរួមតាមដានសវនាការពីអ្នកតំណាងមកពីការិយាល័យឧត្តមស្នងការអង្គការសហប្រជាជាតិ ទទួលបន្ទុកសិទិ្ធមនុស្ស (OHCHR) តំណាងស្ថានទូតស៊ុយអែត អាល្លឺម៉ង់ ស៊្វីស ព្រមទាំងសហគមន៍អឺរ៉ុប ជាដើម។ ក្នុងនោះ ក៏មានតំណាងអង្គការមិនមែនរដ្ឋាភិបាលជាតិ និងអន្តរជាតិ ចូលរួមផងដែរ។
ព្រះតេជគុណ លួន សុវាត បានមានសង្ឃដីកាថា ព្រះអង្គ មិនបានធ្វើអ្វីខុស ដូចការចោទប្រកាន់ទេ ព្រះអង្គក៏មិនភ័យខ្លាចនឹងការចាប់ខ្លួននោះទេ។ ព្រះសង្ឃ មហាជន និងសកម្មជនដីធ្លី បានដើរហែរក្បួនជាមួយព្រះតេជគុណ លួន សុវាត ចេញពីតុលាការ ឆ្ពោះទៅកាន់វត្តសាមគ្គីរង្សី ដែលជាវត្តព្រះសង្ឃខ្មែរកម្ពុជាក្រោម នៅក្នុងខណ្ឌមានជ័យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ