កម្ពុជា-សង្គម

លោក ប្រាក់ សុខុន៖ កម្ពុជាស្ថិតនៅលើផ្លូវបំបែកនៃការយល់ឃើញខុសគ្នា លើបញ្ហាសិទ្ធិមនុស្សនិងប្រជាធិបតេយ្យ

រដ្ឋមន្ត្រីក្រសួងការបរទេសកម្ពុជា លោក ប្រាក់ សុខុន កាលពីថ្ងៃចន្ទ បានថ្លែងការពារកម្ពុជាពីការរិះគន់នានាលើបញ្ហាសិទ្ធិមនុស្ស និងលទ្ធិប្រជាធិបតេយ្យ នៅចំពោះមុខកិច្ចប្រជុំជាន់ខ្ពស់លើកទី៤០ នៃក្រុមប្រឹក្សាសិទ្ធិមនុស្សអង្កការសហប្រជាជាតិ ដែលប្រព្រឹត្តទៅនៅឯទីក្រុងហ្សឺណែវ ប្រទេសស្វីស។ បើតាមលោក ប្រាក់ សុខុន កម្ពុជាកំពុងស្ថិតនៅលើផ្លូវបំបែកនៃការយល់ឃើញខុសគ្នាទាំងស្រុង អំពីការពិត លើបញ្ហាសិទ្ធិមនុស្សនិងប្រជាធិបតេយ្យ។ ប៉ុន្តែសម្រាប់មន្ត្រីសិទ្ធិមនុស្ស នេះគ្រាន់តែជាការព្យាយាមផាត់ពណ៌លើស្ថានភាពពិតនៅកម្ពុជាតែប៉ុណ្ណោះ។

ចុះផ្សាយនៅថ្ងៃ៖ 27/02/2019 - 07:07

ដោយ៖ វ៉ា សំណព្វ

ផ្សាយពាណិជ្ជកម្ម

បើតាមប្រមុខការទូតកម្ពុជា «សម្រាប់មនុស្សជាច្រើន ពួកគេបានមើលឃើញថា កម្ពុជាមានរឿងជោគជ័យ ក្នុងនាមជាប្រទេសដែលត្រូវបានបំផ្លិចបំផ្លាញ និងដុតកម្ទេចស្ទើរដល់ដីដោយសារភ្លើងសង្គ្រាមនិងអំពើប្រល័យពូជសាសន៍។ ប៉ុន្តែកម្ពុជាបានងើបចេញពីផេះផង់ និងបានផ្សះផ្សាគ្នាក្នុងចំណោមប្រជាជនខ្លួនឯង និងបានសម្រេចនូវការផ្លាស់ប្តូរសេដ្ឋកិច្ចសង្គមដ៏ធំធេង»។ នេះគឺជាការថ្លែងការពាររបស់ប្រមុខការទូតកម្ពុជា លោក ប្រាក់ សុខុន នៅក្នុងកិច្ចប្រជុំជាន់ខ្ពស់លើកទី៤០នៃក្រុមប្រឹក្សាសិទ្ធិមនុស្សអង្គការសហប្រជាជាតិ ដែលបានប្រព្រឹត្តទៅនៅទីក្រុងហ្សឺណែវ ប្រទេសស្វីស ចាប់ពីថ្ងៃទី ២៤ ដល់ ថ្ងៃទី២៦ ខែកុម្ភៈ។

តាមរយៈសុន្ទរកថាជាភាសាបារាំងដែលមានកម្រាស់៦ទំព័រ លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេសកម្ពុជា បានលើកឧទាហរណ៍អំពីការរីកចម្រើនជាច្រើនទៀតនៅកម្ពុជា ពិសេសលើបញ្ហាសេដ្ឋកិច្ច ការកាត់បន្ថយភាពក្រីក្រ អត្រានៃការចូលរៀននៅបឋមសិក្សា និងអាយុជាមធ្យមរបស់ប្រជាជនដែលបានកើនពី៥៤ឆ្នាំនៅឆ្នាំ១៩៩៣ ទៅ៦៩ឆ្នាំនៅឆ្នាំ២០១៦ជាដើម។ មិនតែប៉ុណ្ណោះ កម្ពុជាក៏បានសម្រេចគោលដៅអភិវឌ្ឍសហស្សវត្សរ៍មុនពេលកំណត់ទៅទៀត។ ប៉ុន្តែជាអកុសល សមិទ្ធផលទាំងនេះនិងជាច្រើនផ្សេងទៀត មិនត្រូវបានលើកឡើងនៅក្នុងរបាយការណ៍ជាច្រើន ដែលបានដាក់ជូនក្រុមប្រឹក្សាសិទ្ធិមនុស្សអង្គការសហប្រជាជាតិនោះទេ។ ហើយជាលទ្ធផល ការរិះគន់ដែលមានលក្ខណៈបុរេវិនិច្ឆ័យខ្លាំង អំពីរដ្ឋាភិបាលកម្ពុជា បានបន្តធ្លាក់មកឥតស្រាកស្រាន្ត ដោយសារតែរបាយការណ៍លម្អៀង និងព័ត៌មានមិនពិត។

ប៉ុន្តែលោក អំ សំអាត ប្រធានគ្រប់គ្រងការិយាល័យឃ្លាំមើលសិទ្ធិមនុស្សនៃអង្គការលីកាដូបានច្រានចោលចំពោះការចោទប្រកាន់នេះ និងបានអះអាងថា របាយការណ៍ស្រមោលរបស់ក្រុមអង្គការសិទ្ធិមនុស្សជាតិ និងអន្តរជាតិ គឺជារបាយការណ៍ពិត ដោយផ្អែកលើទិដ្ឋភាពជាក់ស្តែងដែលបានកើតឡើងនៅកម្ពុជា និងមិនមែនជារបាយការណ៍ដែលផ្អែកលើគណបក្សប្រឆាំងនោះទេ។ បន្ថែមលើនេះ លោក អំ សំអាត មិនបង្ហាញការភ្ញាក់ផ្អើលចំពោះការថ្លែងការពាររបស់ប្រមុខការទូតកម្ពុជានេះទេ ប៉ុន្តែលោកថា កម្ពុជាគួរទទួលយកនូវចំណុចខ្វះខាតដែលបានលើកឡើងដោយអង្គការសិទ្ធិមនុស្សជាតិនិងអន្តរជាតិ តាមរយៈរបាយការណ៍ទាំងនោះ។

តាមរយៈសុន្ទរកថាកម្រាស់៦ទំព័រនេះ ប្រមុខការទូតកម្ពុជា ក៏បានថ្លែងការពារសេចក្តីសម្រេចក្នុងការរំលាយគណបក្សប្រឆាំងនៅកម្ពុជាផងដែរថា «នៅពេលមេដឹកនាំបក្សប្រឆាំងប្រកាសជាសាធារណៈថា គាត់និងគណបក្សរបស់គាត់បានទទួលការគាំទ្រផ្នែកហិរញ្ញវត្ថុ និងបច្ចេកទេសពីបរទេស ដើម្បីផ្តួលរំលំដោយខុសច្បាប់លើរដ្ឋាភិបាលស្របច្បាប់ដែលកើតចេញពីការបោះឆ្នោតនោះ យើងមិនមានជម្រើសអ្វីផ្សេងទេ ក្រៅពីចាត់វិធានការចាំបាច់ ដើម្បីការពារស្ថាប័នជាតិ សន្តិភាព និងស្ថិរភាពនៃប្រទេសរបស់យើង»។ ប៉ុន្តែយ៉ាងណាក៏ដោយ លោករដ្ឋមន្ត្រីបានអះអាងថា ក្រោយពេលរដ្ឋាភិបាលបានចាត់វិធានការការពារនេះរួចមក នៅពេលនេះ កម្ពុជាបានត្រៀមខ្លួនរួចរាល់ហើយ ក្នុងការចរចាជាមួយអ្នកដែលគាំទ្រសន្តិប្រជាធិបតេយ្យ និងអ្នកប្រឆាំងពិតប្រាកដ ដើម្បីរកផ្លូវផ្សះផ្សាប្រជាធិបតេយ្យជាមួយនឹងស្ថិរភាពនយោបាយ ពហុនិយមនយោបាយ និងសន្តិភាពសាធារណៈ៕