លោកហ៊ុន សែន គ្រោងស្នើលើកលែងទោសសកម្មជនអតីតបក្សប្រឆាំងក្នុងរដូវបុណ្យភ្ជុំបិណ្ឌ
ពីក្នុងវេទិកាសំណេះសំណាលជាមួយក្រុមកម្មករនៅក្នុងខេត្តកណ្តាលនាព្រឹកថ្ងៃព្រហស្បតិ៍នេះ លោកនាយករដ្ឋមន្ត្រីហ៊ុន សែន បានប្រកាសឲ្យដឹងពីគម្រោងស្នើសុំលើកលែងទោសទ្រង់ទ្រាយធំនៅក្នុងឆ្នាំនេះ។ ក្នុងនោះ លោកក៏ចង់ស្នើឲ្យដោះលែងមនុស្ស១២នាក់ ដែលទំនងលោកចង់សំដៅទៅលើសកម្មជនអតីតបក្សសង្គ្រោះជាតិ នៅក្នុងរដូវភ្ជុំបិណ្ឌខាងមុខនេះ។ ប៉ុន្តែលោកមានលក្ខខណ្ឌមួយ គឺមិនឲ្យអ្នកណានិយាយថា ការស្នើនេះ ធ្វើឡើងដោយសារតែការគាបសង្កត់ពីសហគមន៍អន្តរជាតិឡើយ។
ចុះផ្សាយនៅថ្ងៃ៖
ស្តាប់ - ០២:០២
ចំពោះគម្រោងស្នើលើកលែងទោសនេះ លោកនាយករដ្ឋមន្ត្រីហ៊ុន សែន បានដាក់លក្ខខណ្ឌមួយទៅកាន់មន្ត្រីអតីតបក្សប្រឆាំងទាំងអស់ គឺកុំនិយាយថា គម្រោងស្នើលើកលែងទោសនេះកើតចេញពីការគាបសង្កត់ពីសហគមន៍អន្តរជាតិឲ្យសោះ។ លោកអះអាងថា លោកស្អប់ពាក្យនេះខ្លាំងណាស់ ហើយថែមទាំងព្រមាន ពួកគេទាំងនោះ ជាពិសេសលោកសម រង្ស៊ី តែម្តងឲ្យមានការប្រុងប្រយ័ត្នចំពោះការប្រើប្រាស់ពាក្យទាំងអស់នេះមកលើរូបលោក។
សម្រាប់លោកនាយករដ្ឋមន្ត្រី ប្រសិនមានអ្នកណាមួយហ៊ានធ្វើអត្ថាធិប្បាយថា ការស្នើលើកលែងទោសរបស់លោកនេះ បណ្តាលមកពីសំពាធពីបរទេសនោះ លោកនឹងមិនទាន់ធ្វើការស្នើនោះទេ ពោលគឺលោកនឹងទុកពេលឲ្យអ្នកកំពុងជាប់ឃុំទាំង១២នាក់ ធ្វើលិខិតថ្កោលទោសដល់អ្នកហ៊ាននិយាយបែបនេះជាមុនសិន ទើបលោកព្រមស្នើលើកលែងទោសដល់ពួកគេ។
ការប្រកាសឲ្យដឹងពីគម្រោងស្នើលើកលែងទោសដល់មនុស្ស១២នាក់ ពីសំណាក់លោកនាយករដ្ឋមន្ត្រីកម្ពុជានៅថ្ងៃនេះ ត្រូវគេមើលឃើញថា ធ្វើឡើងក្រោយពីលោកបានជួបផ្ទាល់ជាមួយលោកMark Field រដ្ឋលេខាធិការ ទទួលបន្ទុកកិច្ចការអាស៊ី និងប៉ាស៊ីហ្វិកនៃក្រសួងការបរទេសអង់គ្លេសកាលពីថ្ងៃពុធ។ នៅថ្ងៃពុធដដែលនោះ លោក Mark Field ក៏បង្ហាញក្តីសង្ឃឹមថា រដ្ឋាភិបាលកម្ពុជា នឹងបន្តដោះលែងអ្នកនយោបាយរបស់អតីតបក្សប្រឆាំងឲ្យមានសេរីភាពឡើងវិញ ដូចការដោះលែងអតីតអ្នកកាសែត២នាក់ និងសកម្មជនដីធ្លី។
ប៉ុន្តែលោកនាយករដ្ឋមន្ត្រីហ៊ុន សែន បានគូសបញ្ជាក់ម្តងជាពីរដងថា គម្រោងស្នើលើកលែងទោសនេះ មិនជាប់ពាក់ព័ន្ធនឹងសហគមន៍អន្តរជាតិណាមួយឡើយ។ ផ្ទុយទៅវិញ វាគឺជាបំណងដែលកើតចេញពីចិត្តធម៌របស់លោក ចំពោះប្រជាពលរដ្ឋខ្មែរ ដើម្បីឲ្យពួកគេបានទៅជួបជុំក្រុមគ្រួសារឡើងវិញ។ លោកនាយករដ្ឋមន្ត្រីក៏បានអះអាងឲ្យដឹងដែរថា មនុស្សទាំង១២នាក់នោះ គឺបានសរសេរលិខិតសុំទោសរូបលោករួចរាល់ហើយ។
បើទោះបីលោកនាយករដ្ឋមន្ត្រីមិនបានបញ្ចេញឈ្មោះមនុស្សទាំង១២នាក់នោះ តែច្បាស់ណាស់ គឺលោកទំនងចង់សំដៅទៅលើសកម្មជនអតីតបក្សសង្គ្រោះជាតិ។ សកម្មជនអតីតគណបក្សប្រឆាំងទាំងនេះ ត្រូវបានតុលាការក្រុងភ្នំពេញ ផ្ដន្ទាទោសដាក់ពន្ធនាគារចន្លោះពី៧ឆ្នាំទៅ ២០ឆ្នាំ ក្រោមការចោទប្រកាន់ពីបទចូលរួម និងដឹកនាំកុប្បកម្មរំដោះទីលានប្រជាធិបតេយ្យ ដែលបានធ្វើឡើងកាលថ្ងៃទី ១៥ ខែកក្កដា ឆ្នាំ២០១៤កន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ