កម្ពុជារំលឹកពីការឈ្លានពានរបស់ថៃមកលើប្រាសាទព្រះវិហារនៅខួប២ឆ្នាំនៃបណ្តឹងបកស្រាយសាលក្រម
នៅថ្ងៃទី១០ខែវិច្ឆិកានេះ គឺខួបពីរឆ្នាំគត់ នៃថ្ងៃជ័យជំនះរបស់កម្ពុជា ក្នុងបណ្តឹងសុំឲ្យតុលាការយុត្តិធម៌អន្តរជាតិ បកស្រាយសាលក្រមឆ្នាំ១៩៦២ ដែលរដ្ឋាភិបាលកម្ពុជាចាត់ទុកថា ជាជ័យជំនះថ្មីក្រោយពីការឈ្លានពានរបស់ភាគីថៃនៅឆ្នាំ២០១១។ នៅថ្ងៃនេះ លោកឧបនាយករដ្ឋមន្រ្តី ហោ ណាំហុង បានរំលឹកឡើងវិញ ពីការឈ្លានពានរបស់ភាគីថៃ និងសាលក្រមឆ្នាំ១៩៦២។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
រដ្ឋាភិបាលកម្ពុជាបានប្រារព្ធពិធីនេះ នៅឯវិទ្យាស្ថានបច្ចេកវិទ្យាកម្ពុជា នៅថ្ងៃទី១០វិច្ឆិកានេះ ដោយមានការចូលរួមពីសិស្សានុសិស្សនិងនិស្សិតរាប់រយនាក់។ លោកឧបនាយករដ្ឋមន្ត្រី ហោ ណាំហុង បានលើកឡើង ពីប្រវត្តិឈ្លានពានរបស់ភាគីថៃ និងពីយុទ្ធសាស្រ្តផ្លូវច្បាប់នានា ដែលកម្ពុជាបានធ្វើឡើងកន្លងទៅ ដើម្បីការពារប្រាសាទព្រះវិហារ ពីការរំលោភឈ្នានពានរបស់ភាគីថៃ។
បថកថារបស់លោកឧបនាយករដ្ឋមន្រ្តី ហោ ណាំហុង នៅថ្ងៃនេះ បានធ្វើឡើង តាមការអញ្ជើញរបស់សហគមន៍មិត្តប្រាសាទព្រះវិហារ នៅមុនមួយថ្ងៃនៃការប្រារព្ធខួប២ឆ្នាំនៃបណ្តឹងបកស្រាយស្រាលក្រមស្តីពីប្រាសាទព្រះវិហារថ្ងៃទី១១ វិច្ឆិកាឆ្នាំ២០១៣-១១វិច្ឆិកា ឆ្នាំ២០១៥។
បើតាមលោក ហោ ណាំហុង កាលណោះ គឺបន្ទាប់ពីការចុះបញ្ជីប្រាសាទព្រះវិហារជាបេតិភណ្ឌពិភពលោកនៅថ្ងៃទី៧កក្កដាឆ្នាំ២០០៨ ភាគីថៃក្រោមការដឹកនាំរបស់រដ្ឋាភិបាលលោកអាប់ភិស៊ីត បានបញ្ជូនកងទ័ពចូលមកឈ្លានពានតំបន់ព្រះវិហារចំនួន៣លើក។
លើកទី១ គឺនៅថ្ងៃទី១៥ តុលា២០០៨ លើកទី២នៅថ្ងៃទី០៣ មេសា ឆ្នាំ២០០៩ និងលើកទី៣ នៅថ្ងៃទី០៤ ដល់ថ្ងៃទី០៧ កុម្ភះ ឆ្នាំ២០១១។ ហើយបន្ទាប់មក ភាគីថៃបានធ្វើការវាយប្រហារនៅតាមបណ្ដោយព្រំដែនកម្ពុជា-ថៃ ក្នុងតំបន់ផ្សេងៗទៀត ពីថ្ងៃទី២២មេសា ដល់ថ្ងៃទី៣០ឧសភា ឆ្នាំ២០១១។
យ៉ាងណាក៏ដោយ ដើម្បីបញ្ចប់ជម្លោះយោធានៅតំបន់ប្រាសាទព្រះវិហារ និងតំបន់ផ្សេងៗទៀតនោះ នៅថ្ងៃទី២៨មេសា ឆ្នាំ២០១១ កម្ពុជាបានដាក់ពាក្យប្តឹងទៅកាន់តុលាការអន្តរជាតិទីក្រុងឡាអេ ដើម្បីស្នើសុំបកស្រាយស្រាលក្រមឆ្នាំ១៩៦២។ សាលក្រមថ្ងៃទី១៥ មិថុនា ឆ្នាំ១៩៦២ ដែលបានសម្រេចថា៖
ទី១ ប្រាសាទព្រះវិហារស្ថិតនៅក្នុងទឹកដីក្រោមអធិបតេយ្យរបស់កម្ពុជា និងទី២ ភាគីថៃមានកាតព្វកិច្ចត្រូវដកកងកម្លាំងនគរបាល, ឆ្មាំ ឬអ្នកយាមទាំងអស់ដែលថៃបានដាក់ក្នុងប្រាសាទ ឬក្នុងតំបន់ក្បែរប្រាសាទដែលស្ថិតនៅក្នុងទឹកដីកម្ពុជា។
គួររំលឹកជូនថា កម្ពុជាបានឈ្នះក្តីលើសំណុំរឿងប្រាសាទព្រះវិហារពីភាគីថៃ នៅថ្ងៃទី១៥ មិថុនា ឆ្នាំ១៩៦២ ហើយនៅថ្ងៃទី៧ ខែកក្កដា ឆ្នាំ២០០៨ ប្រាសាទព្រះវិហាររបស់កម្ពុជានេះ ក៏ត្រូវបានដាក់បញ្ចូលទៅក្នុងបញ្ជីបេតិកភណ្ឌពិភពលោក តាមរយៈកិច្ចប្រជុំមួយនៅទីក្រុងកេបិច ប្រទេសកាណាដា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ