កម្ពុជាគ្មានគម្រោងបើកច្រកទ្វារប្រាសាទព្រះវិហារពីខាងទឹកដីថៃ
ក្រសួងការពារជាតិកម្ពុជាបានច្រានចោលចំពោះព័ត៌មាន ដែលចុះផ្សាយដោយកាសែតបាងកកប៉ុស្តិ៍របស់ថៃថា កម្ពុជាកំពុងពិចារណាក្នុងការបើកច្រកទ្វារប្រាសាទព្រះវិហារពីខាងទឹកដីថៃ។ ការចុះផ្សាយនេះ ត្រូវបានច្រានចោលដោយមន្រ្តីជាន់ខ្ពស់ក្រសួងការពារជាតិកម្ពុជា បន្ទាប់ពីបានចូលរួមនៅក្នុងកិច្ចប្រជុំ គណៈកម្មាធិការព្រំដែនទូទៅកម្ពុជា-ថៃ (GBC 11th) លើកទី១១ នៅទីក្រុងបាងកកប្រទេសថៃនៅក្នុងសប្តាហ៍នេះ។
ចុះផ្សាយនៅថ្ងៃ៖
ស្តាប់ - ០២:២៥
ការច្រានចោលបានធ្វើឡើងនៅ២៤ម៉ោងក្រោយពីកាសែតបាងកកប៉ុស្តិ៍បានចុះផ្សាយ ថា ភាគីកម្ពុជាកំពុងតែពិចារណាអនុញ្ញាតឲ្យជនជាតិថៃ ចូលមកកាន់ប្រាសាទព្រះវិហារមកពីខាងទឹកដីថៃដោយផ្ទាល់ ពោលគឺដោយមិនចាំបាច់ធ្វើដំណើរចូលទៅកាន់ទឹកដីកម្ពុជាដូចសព្វថ្ងៃនោះទេ។ កាសែតដែលបានចុះផ្សាយដោយស្រង់សំដីរដ្ឋមន្រ្តីការពារជាតិកម្ពុជា លោកឧបនាយករដ្ឋមន្រ្តី ទៀ បាញ់ ថា មានការត្រៀមបើកច្រកផាម័រ-អ៊ីឌែង នៅខាងទឹកដីថៃ ដើម្បីចូលទៅកាន់ប្រាសាទព្រះវិហារនេះ។ នៅក្នុងការចុះផ្សាយនេះ លោករដ្ឋមន្រ្តីបានអះអាងថា នោះគឺជាវិធានការដើម្បីជួយជំរុញឲ្យកំណើនវិស័យទេសចរណ៍រវាងប្រទេសទាំងពីរ។ ប៉ុន្តែលោកនាង ផាត រដ្ឋលេខាធិការក្រសួងការពារជាតិកម្ពុជា បានច្រានចោលព័ត៌មាននេះ។
បើតាមលោកនាង ផាត លោករដ្ឋមន្រ្តី ទៀ បាញ់ បានមានប្រសាសន៍ត្រឹមតែថា អ្នកទេសចរណ៍ថៃអាចចូលមកទស្សនាប្រាសាទព្រះវិហារបាន តាមរយៈច្រកទ្វារផ្សេងទៀត តួយ៉ាងដូចជា តាមរយៈច្រកអានសេះក្នុងខេត្តព្រះវិហារជាដើម។ ប៉ុន្តែកម្ពុជា គ្មានគម្រោងសោះឡើយក្នុងការបើកទ្វារប្រាសាទព្រះវិហារ ដែលបានបិទចាប់តាំងពីមានជម្លោះប្រដាប់អាវុធ តាំងពីខែកក្កដាឆ្នាំ២០០៨មកនោះទេ។
គួរជម្រាបជូនថា រដ្ឋមន្រ្តីការពារជាតិកម្ពុជា-ថៃ ទើបតែបានបិទបញ្ចប់កិច្ចប្រជុំគណៈកម្មាធិការព្រំដែនទូទៅកម្ពុជា-ថៃ លើកទី១១ (GBC 11th) ដែលបានរៀបចំធ្វើឡើងនៅទីក្រុងបាងកកប្រទេសថៃ ចាប់ពីថ្ងៃទី ២១ដល់ថ្ងៃទី២៤ មីនាឆ្នាំ២០១៦។ កិច្ចប្រជុំដែលបានផ្តោតទៅលើការពង្រឹងកិច្ចសហប្រតិបត្តិការរវាងកងទ័ពនៃប្រទេសទាំងពីរលើវិស័យ សន្តិសុខ និងការថែរក្សាសន្តិភាពតាមតំបន់ព្រំដែន, បញ្ហាប្រយុទ្ធប្រឆាំងអំពើភេរវកម្ម, បញ្ហាឧក្រិដ្ឋកម្មមិនប្រពៃ, បញ្ហាសន្តិសុខលម្ហសមុទ្រ, បញ្ហាគ្រោះមហន្តរាយធម្មជាតិ, និងលើវិស័យផ្សេងៗទៀត។ លោកឧបនាយករដ្ឋមន្រ្តី ទៀ បាញ់ ដែលបានដឹកនាំគណៈប្រតិភូកម្ពុជាទៅចូលរួមកិច្ចប្រជុំនេះ ទើបតែបានត្រឡប់មកដល់ប្រទេសកម្ពុជាវិញកាលពីរសៀលថ្ងៃទី២៤មីនា។
គួររម្លឹកឡើងវិញថា ច្រកទ្វារប្រាសាទព្រះវិហារ ត្រូវបានបិទតាំងពីថ្ងៃទី១៥កក្កដាឆ្នាំ២០០៨មក បន្ទាប់ពីភាគីថៃ បានបញ្ជូនយោធាចំនួន៥០នាក់មកកាន់វត្តកែវសិក្ខាគីរីស្វារៈ ប៉ុន្មានថ្ងៃ បន្ទាប់ពីកម្ពុជាបានដាក់ប្រាសាទព្រះវិហារជាសម្បត្តិបេតិកភណ្ឌពិភពលោកនៅថ្ងៃទី៨ ខែកក្កដា ឆ្នាំ២០០៨។ ជម្លោះដែលឈានទៅដល់ការផ្ទុះអាវុធដាក់គ្នារហូតដល់មានការស្លាប់ទាហានទាំងសងខាង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ