សង្គមស៊ីវិលអបអរទិវាអន្ដរជាតិប្រឆាំងនឹងការស្អប់ខ្ពើមអ្នកស្រឡាញ់ភេទដូចគ្នា
ក្រុមអង្គការសង្គមស៊ីវិល និងសហគមន៍អ្នកស្រឡាញ់ភេទដូចគ្នា នៅថ្ងៃសុក្រទី១២ឧសភា បានសម្ពោធជាផ្លូវការ សប្ដាហ៍មោទកភាព ដើម្បីអបអរទិវាអន្ដរជាតិប្រឆាំងនឹងការស្អប់ខ្ពើមអ្នកស្រឡាញ់ភេទដូចគ្នា ថ្ងៃទី១៧ឧសភា។ សប្ដាហ៍មោទកភាព នឹងរៀបចំធ្វើរហូតដល់ថ្ងៃទី២៣ឧសភា ដោយមានកម្មវិធីជាច្រើនបន្តបន្ទាប់ ដើម្បីអប់រំផ្សព្វផ្សាយ ចែករំលែកព័ត៌មាន និងតស៊ូមតិ ដើម្បីដោះស្រាយបញ្ហារបស់អ្នកស្រឡាញ់ភេទដូចគ្នានៅកម្ពុជា។
ចុះផ្សាយនៅថ្ងៃ៖
ស្តាប់ - ០២:០៦
សប្ដាហ៍មោទកភាពនៃអ្នកស្រឡាញ់ភេទដូចគ្នាឆ្នាំ២០១៧នេះ ធ្វើឡើងក្រោមប្រធានបទ គ្រួសារអ្នកស្រឡាញ់ភេទដូចគ្នា។ ក្រុមអង្គការសង្គមស៊ីវិលនិងសហគមន៍នានាយ៉ាងហោចណាស់៥៧ បានសម្ដែងការគាំទ្រយ៉ាងពេញទំហឹងចំពោះសហគមន៍អ្នកស្រឡាញ់ភេទដូចគ្នា ព្រមទាំងអំពាវនាវដល់រាជរដ្ឋាភិបាលកម្ពុជា ឲ្យចាត់វិធានការជាក់លាក់ណាមួយ ដើម្បីលើកកម្ពស់និងការពារសិទ្ធិរបស់អ្នកស្រឡាញ់ភេទដូចគ្នានៅកម្ពុជា។
នៅក្នុងពិធីសម្ពោធសប្ដាហ៍មោទកភាពឆ្នាំ២០១៧ ថ្ងៃទី១២ឧសភា លោកស្រី Wan-Hea Lee តំណាងការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា បានលើកឡើងថា ប្រទេសកម្ពុជា មានសហគមន៍អ្នកស្រឡាញ់ភេទដូចគ្នាដ៏សកម្មនិងរស់រវើក ប្រសើរជាងប្រទេសមួយចំនួនទៀតនៅលើសកលលោក។ ប្រទេសមួយចំនួន ដែលមិនត្រឹមតែរើសអើង និងស្អប់ខ្ពើមអ្នកស្រឡាញ់ភេទដូចគ្នាទេ គឺថែមទាំងឈានដល់វាយសម្លាប់ពួកគេទៀត។ នេះបើតាមលោកស្រី Wan-Hea Lee។ ខណៈការស្រឡាញ់ភេទដូចគ្នាមិនខុសច្បាប់នៅកម្ពុជា លោកស្រីសង្កេតឃើញថា ការរើសអើងអ្នកស្រឡាញ់ភេទដូចគ្នា ក៏មិនខុសច្បាប់ផងដែរ ដែលនេះគឺជាចន្លោះប្រហោងដែលកម្ពុជាត្រូវលុបបំបាត់ ដើម្បីធានានូវសិទ្ធិរបស់អ្នកស្រឡាញ់ភេទដូចគ្នា។
ដោយឡែក លោកស្រី ចក់ សុភាព នាយិកាប្រតិបត្តិនៃមជ្ឈមណ្ឌលសិទ្ធិមនុស្សកម្ពុជាវិញ បានគូសបញ្ជាក់ថា វាគួរតែដល់ពេលហើយដែលរដ្ឋាភិបាលកម្ពុជា ចាត់វិធានការតាមផ្លូវច្បាប់ ដើម្បីធានាដល់សិទ្ធិស្មើគ្នាសម្រាប់ពលរដ្ឋអ្នកស្រឡាញ់ភេទដូចគ្នា។ ហើយសាធារណជនទូទៅ ក៏គួរតែបើកចិត្តឲ្យបានទូលាយចំពោះអ្នកស្រឡាញ់ភេទដូចគ្នា។ លោកស្រី ចក់ សុភាព ថា សិទ្ធិស្មើគ្នាសម្រាប់អ្នកស្រឡាញ់ភេទដូចគ្នា គួរតែត្រូវទទួលបានដោយពុំចាំបាច់រង់ចាំឡើយ។
សូមជម្រាបជូនថា វិធានការតាមផ្លូវច្បាប់ ដែលអង្គការសង្គមស៊ីវិលស្នើឲ្យរដ្ឋាភិបាលកម្ពុជារៀបចំដើម្បីការពារសិទ្ធិអ្នកស្រឡាញ់ភេទដូចគ្នាមានជាអាថិ៍៖ សិទ្ធិក្នុងការរៀបអាពាហ៍ពិពាហ៍ សិទ្ធិស្មុំកូនសម្រាប់គូស្រករភេទដូចគ្នា និង សិទ្ធិក្នុងការកំណត់យេនឌ័ររបស់បុគ្គលម្នាក់ៗនៅលើឯកសារផ្លូវការនានាជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ