សង្គមស៊ីវិល៖ពន្ធនាគារស្រុកខ្មែរផ្ទុកអ្នកទោសលើសចំណុះរហូតត្រូវប្តូរវេនគ្នាដេក!
នៅប៉ុន្មានឆ្នាំចុងក្រោយនេះ អង្គការលីកាដូបានចេញរបាយការណ៍ជាបន្តបន្ទាប់ស្តីពីស្ថានភាពពន្ធនាគារ និងភាពចង្អៀតណែនដោយសារតែផ្ទុកលើសចំណុះពីពីរដងរហូតដល់បីដងឯណោះ។ មន្ត្រីអង្គការលីកាដូបានបញ្ជាក់ថា ការផ្ទុកលើសចំណុះនេះបានធ្វើឲ្យអ្នកទោសនៅក្នុងពន្ធនាគារភាគច្រើនត្រូវតែផ្លាស់វែនគ្នាដេក ហើយកត្តានេះក៏ប៉ះពាល់ដល់សិទ្ធសេរីភាពរបស់អ្នកទោស។
ចុះផ្សាយនៅថ្ងៃ៖
ស្តាប់ - ០២:០០
អង្គការលីកាដូបានចេញរបាយការណ៍របស់ខ្លួនជាបន្តបន្ទាប់ចាប់តាំងពីឆ្នាំ ២០០៩ រហូតមកទល់នឹងបច្ចុប្បន្ននេះ ស្តីពីភាពចង្អៀតណែននៅក្នុងពន្ធនាគារទាំងអស់នៅក្នុងប្រទេសកម្ពុជា។ លោកអំ សំអាត មន្ត្រីស៊ើបអង្កេតជាន់ខ្ពស់អង្គការលីកាដូបញ្ជាក់ប្រាប់ វិទ្យុបារាំងនៅថ្ងៃនេះថា ពន្ធនាគារស្ទើរតែទាំងអស់នៅក្នុងប្រទេសកម្ពុជាផ្ទុកអ្នកទោសលើសចំណុះ រហូតបណ្តាលឲ្យអ្នកទោសទាំងនោះមិនអាចសម្រាកបានក្នុងពេលតែមួយនោះទេ ដោយត្រូវចែកវេនគ្នាដេកថែមទៀតផង។
លោកបានបន្តថាកត្តានេះបានធ្វើឲ្យប៉ះពាល់សិទ្ធសេរីភាពរបស់អ្នកទោស ដែលមិនទទួលបានការរស់នៅសមរម្យ និងគ្មានអនាម័យក្នុងការហូបចុកជាដើម។ កន្លងមកអង្គការលីកាដូក៏ធ្លាប់បានផ្តល់អនុសាសន៍មួយចំនួនទៅដល់រដ្ឋាភិបាលកម្ពុជាទាក់ទងទៅនឹងដំណោះស្រាយផងដែរ។ ប៉ុន្តែលោកបានបញ្ជាក់ថា ការកែលម្អនេះនៅមានកម្រិតនៅឡើយ ដោយមិនទាន់អាចឆ្លើយតបទៅនឹងតម្រូវការនាពេលបច្ចុប្បន្ននេះនៅឡើយ។
ជាក់ស្តែងដូចលោក រស់ សុធា អនុប្រធានពន្ធនាគារខេត្តស្ទឹងត្រែងបានថ្លែងបា្រប់កាសែតនៅក្នុងស្រុកថា លោកពិតជាទទួលស្គាល់ថាអគារពន្ធនាគារពិតជាមានសភាពទ្រុឌទ្រោម និងផ្ទុកអ្នកទោសលើសចំណុះពិតមែន។ លោកបានបន្តថា កន្លងមកលោកធ្លាប់បានធ្វើរបាយការណ៍បញ្ចូនទៅថ្នាក់លើរួចហើយដែរ ទាក់ទងនឹងស្ថានភាពពន្ធនាគារនៅពេលបច្ចុប្បន្ននេះ ហើយអគ្គនាយកដ្ឋានពន្ធនាគារក៏បានចុះមកពិនិត្យផ្ទាល់ នឹងមានគម្រោងដើម្បីអភិវឌ្ឍន៍ថ្មីដែរ។
លោកគុយ ប៊ុនសន អគ្គនាយកនៃអគ្គនាយកដ្ឋានពន្ធដានៃក្រសួងមហាផ្ទៃ បានទទួលស្គាល់ថា ពន្ធនាគារកម្ពុជាសព្វថ្ងៃពិតជាមានភាពចង្អៀតសម្រាប់ផ្ទុកអ្នកទោសមែន។ ប៉ុន្តែលោកមិនបានពន្យល់លម្អិតអំពីស្ថានភាពរបស់ទណ្ឌិតនៅក្នុងពន្ធនាគារនីមួយៗនោះទេ។
បើតាមមន្ត្រីអង្គការលីកាដូបានបញ្ជាក់ថា ពន្ធនាគារនៅទូទាំងប្រទេសកម្ពុជាមានទាំងអស់២៧ ហើយស្ទើរតែគ្រប់ពន្ធនាគារទាំងអស់ផ្ទុកទណ្ឌិតលើសចំណុះ ដោយខ្លះច្រើន និងតិចនៅតាមកន្លែងផ្សេងគ្នា។ របាយការណ៍លីកាដូបានឲ្យដឹងថា គិតត្រឹមចុងឆ្នាំ ២០១៤កន្លងទៅនេះ អ្នកទោសដែលបានកំពុងជាប់ក្នុងពន្ធនាគារទាំងអស់នៅកម្ពុជាមានចំនួនជាង ១ម៉ឺន ៣ពាន់នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ