នីតិវិធីនៃការរៀបអាពាហ៍ពិពាហ៍រវាងពលរដ្ឋខ្មែរនិងពលរដ្ឋបរទេស
ចុះផ្សាយនៅថ្ងៃ៖
ស្តាប់ - ០៥:១៩
ដើម្បីឆ្លើយតបទៅនឹងសំណួររបស់អ្នកស្តាប់យើង នៅក្នុងនាទីយល់ដឹងពីច្បាប់នៅថ្ងៃនេះ សេង ឌីណា សូមធ្វើការពន្យល់អំពីការរៀបអាពាហ៍ពិពាហ៍រវាងពលរដ្ឋខ្មែរ និងពលរដ្ឋបរទេស។ តើសាមីខ្លួនទាំងខាងភាគីជាពលរដ្ឋខ្មែរ និងភាគីបរទេស ត្រូវបំពេញនូវលក្ខខណ្ឌអ្វីខ្លះ? តើការសុំរៀបអាពាហ៍ពិពាហ៍នេះត្រូវធ្វើឡើងដោយគោរពទៅតាមនីតិវិធីអ្វីខ្លះ ហើយធ្វើនៅកន្លែងណា?
លក្ខខណ្ឌទាក់ទងនឹងសាមីខ្លួនដែលត្រូវរៀបអាពាហ៍ពិពាហ៍
សាមីខ្លួនទាំងពីរ គឺទាំងភាគីជាពលរដ្ឋខ្មែរ ទាំងភាគីជាពលរដ្ឋបរទេស ចាំបាច់ត្រូវតែបំពេញនូវលក្ខខណ្ឌរួមមួយចំនួន ដែលមានចែងនៅក្នុងក្រមរដ្ឋប្បវេណីខ្មែរ ដូចជាករណីអាពាហ៍ពិពាហ៍ទូទៅ រវាងខ្មែរ និងខ្មែរដែរ គឺ៖
- អាពាហ៍ពិពាហ៍ត្រូវធ្វើឡើងទៅតាមគោលការណ៍ស្ម័គ្រចិត្ត ដែលចេញពីឆន្ទៈផ្ទាល់របស់សាមីខ្លួនទាំងសងខាង ដោយគ្មានការបង្ខំ ឬការបន្លំបោកប្រាស់ (មាត្រា ៩៥៨)
- បុរស និងនារី ដែលត្រូវរៀបអាពាហ៍ពិពាហ៍មិនមានជាប់ជាសាច់ញាតិនឹងគ្នា ដែលច្បាប់ហាមឃាត់ (មាត្រា ៩៥១ និង ៩៥២)
- មិនមានជាប់ចំណងអាពាហ៍ពិពាហ៍ចាស់ ពីព្រោះក្រមរដ្ឋប្បវេណីខ្មែរចែងថា អ្នកដែលមានប្តី ឬប្រពន្ធរួចហើយ មិនអាចរៀបអាពាហ៍ពិពាហ៍ទៀតបានទេ (មាត្រា ៩៤៩)
- ត្រូវតែជានីតិជន មានន័យថា ត្រូវមានអាយុចាប់ពី១៨ឆ្នាំឡើង (មាត្រា ៩៤៨)
ក្នុងករណីអាពាហ៍ពិពាហ៍ រវាងនារីខ្មែរ និងបុរសបរទេស បុរសបរទេសនេះត្រូវបំពេញទៅតាមលក្ខណ្ឌបន្ថែម ដែលកំណត់ដោយក្រសួងការបរទេសខ្មែរ តាមរយៈកំណត់ទូត ចេញកាលពីថ្ងៃទី១ ខែមីនា ឆ្នាំ២០១១ គឺ៖
- អាយុមិនត្រូវឲ្យលើសពី ៥០ឆ្នាំ
- ត្រូវមានប្រាក់ចំណូលយ៉ាងតិច ២៥០០ដុល្លារ ក្នុងមួយខែ
ម្យ៉ាងទៀត យោងតាមអនុក្រឹត្យ លេខ ១៨៣ ចុះថ្ងៃ៣ វិច្ឆិកា ២០០៨ ការរៀបអាពាហ៍ពិពាហ៍ ដែលធ្វើឡើងតាមរយៈភ្នាក់ងាររើសគូស្រករ ឈ្មួញកណ្តាល ឬក្រុមហ៊ុនអាជីវកម្ម គឺត្រូវហាមឃាត់ដាច់ខាត។
នីតិវិធី និងសំណុំបែបបទដែលត្រូវបំពេញ
យោងតាមអនុក្រឹត្យ ១៨៣ ខាងលើនេះ ជនបរទេសដែលមានបំណងរៀបអាពាហ៍ពិពាហ៍ជាមួយពលរដ្ឋខ្មែរ ចាំបាច់ត្រូវតែមានវត្តមាន នៅក្នុងប្រទេសកម្ពុជា ដើម្បីរៀបចំបំពេញបែបបទ និងនីតិវិធីនៃការរៀបអាពាហ៍ពិពាហ៍នេះដោយខ្លួនឯង។
សំណុំបែបបទនៃការសុំរៀបអាពាហ៍ពិពាហ៍ ត្រូវដាក់ទៅក្រសួងការបរទេស ដោយត្រូវមានភ្ជាប់នូវ៖
- ពាក្យសុំរៀបអាពាហ៍ពិពាហ៍ ដោយត្រូវបំពេញទៅតាមទម្រង់ដែលមានស្រាប់ ចេញដោយអាជ្ញាធរខ្មែរ
- ឯកសារថតចម្លង នៃលិខិតឆ្លងដែនរបស់សាមីខ្លួនជាជនបរទេស ដោយមានទិដ្ឋាការ (Visa) ចូលក្នុងប្រទេសកម្ពុជា ដែលនៅមានសុពលភាព
- លិខិតបញ្ជាក់ភាពនៅលីវ ឬពោះម៉ាយ ឬម៉េម៉ាយ ចេញដោយសមត្ថកិច្ចប្រទេសរបស់សាមីខ្លួនជាជនបរទេស
- លិខិតបញ្ជាក់សុខភាព ចេញដោយសមត្ថកិច្ចកម្ពុជា
- លិខិតថ្កោលទោស ចេញដោយសមត្ថកិច្ចប្រទេសរបស់សាមីខ្លួនជាជនបរទេស
- លិខិតបញ្ជាក់ពីមុខរបរពិតប្រាកដរបស់សាមីខ្លួនជាជនបរទេស ដោយមានបញ្ជាក់ពីចំនួនប្រាក់ចំណូលប្រចាំខែ ចេញដោយសមត្ថកិច្ចប្រទេសរបស់សាមីខ្លួនជាជនបរទេស
សំណុំឯកសារទាំងអស់នេះ (ក្រៅពីពាក្យសុំរៀបអាពាហ៍ពិពាហ៍ និងលិខិតបញ្ជាក់សុខភាព) គឺត្រូវមានបោះត្រាបញ្ជាក់នីត្យានុកូលភាព ពីស្ថានទូត នៃប្រទេសរបស់សាមីខ្លួនជាជនបរទេស ដែលប្រចាំនៅក្នុងប្រទេសកម្ពុជា។
ម្យ៉ាងទៀត បើតាមកំណត់ទូតរបស់ក្រសួងការបរទេសខ្មែរ ចុះថ្ងៃទី២៣ មីនា ឆ្នាំ២០០៩ សាមីខ្លួនជាជនបរទេសមិនត្រូវទាក់ទង ដាក់សំណុំបែបបទសុំរៀបអាពាហ៍ពិពាហ៍នេះទៅក្រសួងការបរទេសដោយផ្ទាល់ទេ គឺត្រូវដាក់តាមរយៈស្ថានទូត ឬស្ថានកុងស៊ុល នៃប្រទេសរបស់សាមីខ្លួនជាជនបរទេស ដែលប្រចាំនៅកម្ពុជា។
ក្រោយពីទទួលបានសំណុំបែបបទនេះហើយ ក្រសួងការបរទេសមានរយៈពេលយ៉ាងយូរ ៥ថ្ងៃ (ថ្ងៃធ្វើការ) ដើម្បីពិនិត្យ និងសម្រេច។ ប្រសិនបើមើលទៅឃើញថា មានសំណុំឯកសារគ្រប់គ្រាន់ ហើយសាមីខ្លួនជាជនបរទេសបំពេញទៅតាមលក្ខខណ្ឌ ដែលបានកំណត់ហើយ ក្រសួងការបរទេសត្រូវបញ្ជូនសំណុំបែបបទនេះ បន្តទៅឲ្យក្រសួងមហាផ្ទៃ។
ក្រសួងមហាផ្ទៃក៏មានពេលយ៉ាងយូរ ៥ថ្ងៃ ដែរ ដើម្បីពិនិត្យ និងចុះបញ្ជីសំណុំឯកសារសុំរៀបអាពាហ៍ពិពាហ៍នេះ។ ពិនិត្យ និងចុះបញ្ជីចប់សព្វគ្រប់ហើយ ក្រសួងមហាផ្ទៃត្រូវជូនដំណឹង អំពីការសុំរៀបអាពាហ៍ពិពាហ៍នេះ ទៅខាងមន្រ្តីអត្រានុកូលដ្ឋានឃុំ ឬសង្កាត់ នៃលំនៅដ្ឋានអចិន្រ្តៃយ៍របស់សាមីខ្លួនជាពលរដ្ឋខ្មែរ ហើយក៏ត្រូវជូនដំណឹងទៅសាមីខ្លួនជាជនបរទេសដែរ។
ទទួលបានចម្លើយពីក្រសួងមហាផ្ទៃ អំពីការចុះបញ្ជីសំណុំឯកសារសុំរៀបអាពាហ៍ពិពាហ៍នេះហើយ សាមីខ្លួនទាំងពីរ គឺទាំងពលរដ្ឋខ្មែរ និងទាំងជនបរទេស ត្រូវរៀបចំដាក់ពាក្យសុំរៀបអាពាហ៍ពិពាហ៍ ស្របពេលជាមួយគ្នា ទៅឃុំ ឬសង្កាត់ នៅខាងលំនៅរបស់សាមីខ្លួនជាពលរដ្ឋខ្មែរ ទៅតាមនីតិវិធីសុំអាពាហ៍ពិពាហ៍ធម្មតា។
សំណុំបែបបទរបស់សាមីខ្លួនជាពលរដ្ឋខ្មែរ គឺត្រូវមានភ្ជាប់៖
- ពាក្យសុំរៀបអាពាហ៍ពិពាហ៍
- សេចក្តីចម្លងសំបុត្រកំណើត
- លិខិតបញ្ជាក់ភាពនៅលីវ ឬពោះម៉ាយ ឬម៉េម៉ាយ ដែលចេញដោយមេឃុំ ឬចៅសង្កាត់
- លិខិតបញ្ជាក់សុខភាពចេញដោយមន្ទីរពេទ្យ ដែលទទួលស្គាល់ជាផ្លូវការពីក្រសួងសុខាភិបាល
ក្រោយពីពិនិត្យមើលសំណុំឯកសាររបស់សាមីខ្លួនទាំងពីរ ឃើញថា ត្រឹមត្រូវតាមច្បាប់ហើយ មន្រ្តីអត្រានុកូលដ្ឋានឃុំ ឬសង្កាត់ ត្រូវរៀបចំប័ណ្ណប្រកាសអាពាហ៍ពិពាហ៍ ដើម្បីយកទៅបិទផ្សាយ នៅផ្ទះរបស់សាមីខ្លួនជាពលរដ្ឋខ្មែរផង នៅសាលាឃុំ ឬសង្កាត់នេះផង និងនៅស្ថានទូត នៃប្រទេសរបស់សាមីខ្លួនជាជនបរទេសផង។ ១០ថ្ងៃក្រោយពីបិទប័ណ្ណប្រកាសនេះហើយ បើសិនជាមិនមានអ្នកណាប្តឹងតវ៉ា ជំទាស់នឹងការរៀបអាពាហ៍ពិពាហ៍នេះទេ ទើបសាមីខ្លួនអាចរៀបចំពិធីអាពាហ៍ពិពាហ៍បាន។
នៅចុងបញ្ចប់នៃនីតិវិធី ដើម្បីឲ្យអាពាហ៍ពិពាហ៍ មានសុពលភាពពេញលក្ខណៈច្បាប់ សាមីខ្លួនទាំងពីរ ត្រូវទៅចុះបញ្ជីអាពាហ៍ពិពាហ៍ នៅសាលាឃុំ ឬសង្កាត់ គឺនៅកន្លែង ដែលបានដាក់ពាក្យសុំរៀបអាពាហ៍ពិពាហ៍។ ការចុះបញ្ជីអាពាហ៍ពិពាហ៍នេះ ត្រូវមានវត្តមានផ្ទាល់របស់សាមីខ្លួនទាំងពីរ បូករួមជាមួយនឹងសាក្សី ដែលមានអាយុគ្រប់ការ ចំនួន ២រូប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ