លោក សម រង្ស៊ី៖ «បើខឹងគោ កុំទៅវ៉ៃរទេះ»
លោក សម រង្ស៊ី អតីតប្រធានគណបក្សប្រឆាំងនៅថ្ងៃទី១៥ ខែមករានេះ បានឆ្លើយតបនឹងលោកនាយករដ្ឋមន្ត្រីហ៊ុន សែនថា បើខឹងគោកុំទៅវ៉ៃរទេះ ឬបើខឹងទណ្ឌកម្មពីសហភាពអឺរ៉ុប កុំទៅរករឿងអ្នកគាំទ្រគណបក្សសង្គ្រោះជាតិ រាប់លាននាក់នៅប្រទេសកម្ពុជា។ ជាការលើកឡើងរបស់លោក សម រង្ស៊ី បន្ទាប់ពីលោក ហ៊ុន សែន ព្រមានថាទណ្ឌកម្មរបស់អន្តរជាតិ ស្មើនឹងសម្លាប់បក្សប្រឆាំង។
ចុះផ្សាយនៅថ្ងៃ៖
ស្តាប់ - ០២:០៥
លោក សម រង្ស៊ី តាមរយៈទំព័រហ្វេសប៊ុករបស់លោក បានសរសេរឆ្លើយតបនឹងលោកនាយករដ្ឋមន្ត្រីហ៊ុន សែន ថា បើខឹងទណ្ឌកម្មពីសហភាពអឺរ៉ុប កុំទៅរករឿងអ្នកគាំទ្រគណបក្សសង្គ្រោះជាតិ រាប់លាននាក់ នៅប្រទេសកម្ពុជា។ លោកបញ្ជាក់ថា គឺលោកជាមនុស្សតែម្នាក់គត់ ដែលបានជំរុញយ៉ាងសកម្ម ឲ្យសហគមន៍អន្តរជាតិ ដាក់ទណ្ឌកម្ម មកលើរបបផ្តាច់ការរបស់ហ៊ុន សែន។
លោក សម រង្ស៊ី បន្តថា បើលោក ហ៊ុន សែន ចង់បញ្ចៀសទណ្ឌកម្មទាំងនោះ គ្រាន់តែបញ្ឈប់ នយោបាយគាបសង្កត់មកលើប្រជារាស្ត្រ ហើយចាប់ផ្តើមចរចាជាមួយសហភាពអឺរ៉ុប ដើម្បីបើកផ្លូវឲ្យលទ្ធិប្រជាធិបតេយ្យ រស់ឡើងវិញនៅកម្ពុជាទៅ គឺបានទៅហើយ។
លោកនាយករដ្ឋមន្ត្រីហ៊ុន សែន នៅថ្ងៃទី១៤ ខែមករា បានអះអាងថាលោកមិនចង់ឮតទៅទៀតទេនូវពាក្យគំរាមកំហែង ដាក់ទណ្ឌកម្មមកលើកម្ពុជា ហើយលោកចង់បញ្ជាក់ថាការដាក់ទណ្ឌកម្មមកលើកម្ពុជា មានតម្លៃស្មើនឹងសម្លាប់គណបក្សប្រឆាំង។
លោកនាយករដ្ឋមន្ត្រី ហ៊ុន សែន បានដាក់ជម្រើសពីរសម្រាប់សហគមន៍អន្តរជាតិ ដែលចង់ដាក់ទណ្ឌកម្មកម្ពុជា ថាតើគួររក្សាសមិទ្ធិផល ដែលសហគមន៍អន្តរជាតិ ជួយកសាងនៅកម្ពុជា ហើយបន្តជំរុញដំណើរការកែលំអរ សភាពការណ៍ ដើម្បីឲ្យសេដ្ឋកិច្ចកាន់តែល្អ ឬត្រូវសម្លាប់ចោលត្រឹមហ្នឹង។
ការថ្លែងសាររបស់លោកនាយករដ្ឋមន្ត្រីហ៊ុន សែន គឺ ស្របពេលដែលសហភាពអឺរ៉ុប កំពុងតែរៀបចំនីតិវិធីដាក់ទណ្ឌកម្មលើរដ្ឋាភិបាលកម្ពុជា ដោយផ្តាច់ការអនុគ្រោះពន្ធ ឬEBA ដោយថាការបោះឆ្នោតនៅកម្ពុជាថ្ងៃ២៩កក្កដា២០១៨ កន្លងមក មិនអាចយកជាការបាន ព្រោះមិនមានគណបក្សប្រឆាំងចូលរួម ជាពិសេសគឺការឃុំខ្លួន លោក កឹម សុខា។ ក្រៅពីសហភាពអឺរ៉ុប ព្រឹទ្ធសភាអាមេរិក កាលពីសប្តាហ៍កន្លងទៅ ក៏បានស្នើទៅសភាអាមេរិកឲ្យពិនិត្យសេចក្តីស្នើច្បាប់ ស្តីពី ពាណិជ្ជកម្មកម្ពុជាឆ្នាំ២០១៩។ ជាសេចក្តីស្នើច្បាប់ ដើម្បីឈានទៅដក ឬព្យួប្រព័ន្ធអនុគ្រោះពន្ធ (GSP) ពីកម្ពុជា។
សូមជម្រាបជូនថា រដ្ឋាភិបាលក្រុងភ្នំពេញ ក៏កំពុងបង្កើតយុទ្ធនាការមួយ ដើម្បីពង្រឹងឯករាជ្យភាពសេដ្ឋកិច្ចរបស់ខ្លួន ដើម្បីត្រៀមទប់ទល់នឹងការដកប្រព័ន្ធអនុគ្រោះពន្ធរបស់អឺរ៉ុប និងអាមេរិកដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ