មាតុភូមិនិវត្តន៍៖ លោក សម រង្ស៊ី គ្រោងហោះពីប៉ារីសមកបាងកក នៅថ្ងៃព្រហស្បតិ៍
លោក សម រង្ស៊ី គ្រោងចាកចេញពីទីក្រុងប៉ារីស មកកាន់ទីក្រុងបាងកក ប្រទេសថៃ នាថ្ងៃទី០៧វិច្ឆិកាស្អែកនេះ តាមជើងហោះហើររបស់ក្រុមហ៊ុន Thai Airways។ នេះជាអ្វីដែលលោក សម រង្ស៊ី ប្រកាសតាមបណ្ដាញសង្គមហ្វេសប៊ុក នៅយប់ថ្ងៃអង្គារម្សិលមិញ ដោយមានភ្ជាប់ជាមួយនូវរូបថតសំបុត្រយន្តហោះរបស់ខ្លួនផង។ ចំណែក គេហទំព័រក្រុមហ៊ុន Thai Airways បានបញ្ជាក់ពីការកក់សំបុត្ររបស់លោក សម រង្ស៊ី សម្រាប់ជើងហោះហើរ TG 931 ដែលនឹងចាកចេញពីប៉ារីសមកដល់បាងកក នៅថ្ងៃទី០៨ខែវិច្ឆិកា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
ចាកចេញពីអាកាសយានដ្ឋានហ្សាលដឺហ្គោល ទីក្រុងប៉ារីស នៅម៉ោង១២កន្លះថ្ងៃត្រង់ ថ្ងៃទី០៧វិច្ឆិកា, ជើងហោះហើរក្រុមហ៊ុន Thai Airways លេខ TG 931 ដែល លោក សម រង្ស៊ី កក់ នឹងត្រូវមកដល់អាកាសយានដ្ឋានសុវណ្ណភូមិ ក្នុងទីក្រុងបាងកក ប្រទេសថៃ នៅវេលាម៉ោង៦ព្រឹក ថ្ងៃទី០៨វិច្ឆិកា។ លោក សម រង្ស៊ី បានអះអាងនៅលើទំព័រហ្វេសប៊ុករបស់ខ្លួនថា ការធ្វើដំណើរមកកាន់ប្រទេសថៃនាថ្ងៃទី០៨វិច្ឆិកានេះ គឺដើម្បីត្រៀមខ្លួនចូលមកទឹកដីកម្ពុជា នៅថ្ងៃទី០៩វិច្ឆិកា តាមកាលកំណត់។
ការកក់សំបុត្រយន្តហោះនេះ បានបញ្ជាក់ពីភាពច្បាស់លាស់មួយកម្រិតទៀត សម្រាប់ដំណើរមាតុភូមិនិវត្តន៍របស់លោក សម រង្ស៊ី មេដឹកនាំអតីតគណបក្សប្រឆាំង។ យ៉ាងណាក៏ដោយ សំបុត្រយន្តហោះដដែលនេះ មិនទាន់អាចធានាពីការចូលទៅដល់ប្រទេសថៃ ឬមកដល់កម្ពុជារបស់លោកឡើយ។
គេនៅចាំបានថា កាលពីខែមុន លោកស្រី មូរ សុខហួរ មន្ដ្រីជាន់ខ្ពស់អតីតគណបក្សប្រឆាំង បានធ្វើដំណើរទៅដល់អាកាសយានដ្ឋានសុវណ្ណភូមិ ប្រទេសថៃ។ ប៉ុន្តែអាជ្ញាធរប្រទេសថៃមិនអនុញ្ញាតឲ្យលោកស្រី មូរ សុខហួរ ចូលក្នុងប្រទេសខ្លួនឡើយ។
ចំណែកអាជ្ញាធរអាកាសចរណ៍ស៊ីវិលកម្ពុជាវិញ បានអះអាងថា ខ្លួនបានត្រៀមលក្ខណៈរួចរាល់អស់ហើយ ដើម្បីឃ្លាំមើលដំណើរមាតុភូមិនិវត្តន៍របស់លោក សម រង្ស៊ី តាមផ្លូវអាកាស ដោយបានបំពាក់ប្រព័ន្ធបច្ចេកវិទ្យាទំនើប ដែលអាចចាប់បានភ្លាម ប្រសិនបើមានឈ្មោះលោក សម រង្ស៊ី គ្រោងហោះហើរមកកាន់ប្រទេសកម្ពុជា។ មិនត្រឹមតែប៉ុណ្ណោះ អាជ្ញាធរអាកាសចរណ៍ស៊ីវិលកម្ពុជាបានព្រមានថា ក្រុមហ៊ុនហោះហើរ ឬអ្នកបើកបរយន្តហោះដែលហ៊ានដឹកលោក សម រង្ស៊ី មកកម្ពុជា នឹងត្រូវមានទោសពីបទរួមគំនិតក្បត់ថែមទៀត។
ជាការកត់សម្គាល់ ការកក់សំបុត្ររបស់លោក សម រង្ស៊ី មិនមែនធ្វើឡើងតែមួយផ្លូវទេ។ ក្រៅពីកក់សំបុត្រយន្តហោះមកកាន់ទីក្រុងបាងកកហើយ លោក សម រង្ស៊ី ក៏បានកក់សំបុត្រយន្តហោះពីទីក្រុងបាងកក ត្រឡប់ទៅកាន់ទីក្រុងប៉ារីសវិញផងដែរ ដោយកំណត់យកថ្ងៃទី១៥មករា ឆ្នាំ២០២០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ