មន្ដ្រីអាដហុក និង គ.ជ.ប ត្រូវបានដោះលែងឲ្យនៅក្រៅឃុំបណ្ដោះអាសន្ន
មន្ដ្រីអាដហុក៤រូប និងអគ្គលេខាធិការរង គ.ជ.ប ត្រូវបានដោះលែងពីពន្ធនាគារហើយ នៅយប់ថ្ងៃទី២៩មិថុនានេះ។ ការដោះលែងអ្នកទាំង៥នាពេលនេះ ធ្វើឡើងបន្ទាប់ពីចៅក្រមស៊ើបសួរ បានប្រកាសបិទការស៊ើបសួរកាលពីពាក់កណ្ដាលខែមិថុនាកន្លងទៅ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៩
ការដោះលែងមន្ដ្រីអាដហុក និងអគ្គលេខាធិការរង គ.ជ.ប នាពេលនេះ ធ្វើឡើងតាមរយៈដីកាសម្រេចឲ្យនៅក្រៅឃុំជាបណ្ដោះអាសន្នរបស់ចៅក្រមស៊ើបសួរនៃសាលាដំបូងរាជធានីភ្នំពេញ។ ប៉ុន្តែការអនុញ្ញាតឲ្យនៅក្រៅឃុំដូច្នេះ មិនមែនមានន័យថារឿងក្ដីក្ដាំរបស់ពួកគេត្រូវបញ្ចប់ឡើយ។ លោក អ៊ី រិន្ទ អ្នកនាំពាក្យចៅក្រមនៃសាលាដំបូងរាជធានីភ្នំពេញ បានគូសបញ្ជាក់ថា នីតិវិធីតុលាការនៅតែបន្តដដែល ដោយសវនាការជំនុំជម្រះលើអ្នកទាំង៥ នឹងត្រូវបើកធ្វើក្នុងពេលឆាប់ៗខាងមុខនេះ។
បើទោះបីជាដូច្នេះក្ដី មន្ដ្រីអាដហុក និងអគ្គលេខាធិការរង គ.ជ.ប សរុបទាំង៥រូប បានសម្ដែងក្ដីរំភើបនិងភ្ញាក់ផ្អើល ចំពោះសេរីភាពដែលទើបតែទទួលបានកាលពីយប់មិញនេះ។ លោក យី សុខសាន្ត អនុប្រធានសមាគមអាដហុក ថ្លែងថា លោកមិនបានដឹងជាមុនសោះអំពីការដោះលែងនេះ ខណៈដែលសាលដីកាសុំនៅក្រៅឃុំនឹងត្រូវប្រកាសនៅចុងខែក្រោយឯណោះ។
ចំណែកលោកស្រី លឹម មុន្នី វិញ បានប្ដេជ្ញាចិត្តនៅក្នុងសន្និសីទកាសែតនៅឯសមាគមអាដហុកកាលពីយប់មិញថា លោកស្រីនៅតែបន្តការងាររបស់ខ្លួនតទៅទៀត ដើម្បីការពារសិទ្ធិស្ដ្រីនិងកុមារ។ បើតាមមន្ដ្រីជាន់ខ្ពស់សមាគមអាដហុករូបនេះ ការងារកន្លងមក បូករួមនឹងករណីស្រីមុំដែលធ្វើឲ្យលោកស្រីជាប់ឃុំផង គឺលោកស្រីបានធ្វើត្រឹមត្រូវស្របតាមគោលការណ៍សិទ្ធិមនុស្ស និងគោលការណ៍របស់អាដហុក។ លោកស្រីលឹម មុន្នី បញ្ជាក់ថា លោកស្រីនៅតែពេញចិត្តនឹងការងាររបស់ខ្លួន ដែលជួយដល់សង្គមនិងកុមារខ្មែរ។
ដោយឡែក សម្រាប់លោក នី ចរិយា ដែលជាអគ្គលេខាធិការរង គ.ជ.ប តំណែងរបស់លោកត្រូវបានរក្សាទុកឲ្យដដែល។ ប៉ុន្តែលោក ហង្ស ពុទ្ធា អ្នកនាំពាក្យ គ.ជ.ប នៅមិនទាន់អាចបញ្ជាក់បានទេថា លោក នី ចរិយា អាចចូលធ្វើការវិញបានឬអត់នៅឡើយ។ បើតាមអ្នកនាំពាក្យដដែល គ.ជ.ប នឹងត្រួតពិនិត្យលើទិដ្ឋភាពច្បាប់។
សូមបញ្ជាក់ថា មន្ដ្រីអាដហុកចំនួន៤រូប គឺលោក នី សុខា លោក យី សុខសាន្ត លោក ណៃ រ៉ង់ដា និង លោកស្រី លឹម មុន្នី ត្រូវបានចោទប្រកាន់ពីបទសូកប៉ាន់សាក្សី តាមមាត្រា៥៤៨នៃក្រមព្រហ្មទណ្ឌ។ ដោយឡែក លោក នី ចរិយា អគ្គលេខាធិការរង គ.ជ.ប ត្រូវចោទពីបទសមគំនិតក្នុងអំពើសូកប៉ាន់សាក្សី តាមមាត្រា២៩ និង មាត្រា ៥៤៨ នៃក្រមព្រហ្មទណ្ឌ។ បទចោទទាំងអស់នេះ កើតឡើងបន្ទាប់ពីអ្នកទាំង៥មានជាប់ពាក់ព័ន្ធរឿងរ៉ាវក្ដីក្ដាំរវាងលោក កឹម សុខា ប្រធានគណបក្សសង្គ្រោះជាតិ ជាមួយនាង ខុម ចាន់តារ៉ាទី ហៅស្រីមុំ។ កន្លងមកទាំងមេធាវីការពារក្ដីមន្ត្រីអាដហុកនិងអង្គការអន្តរជាតិនានា បានរិះគន់តុលាការថា ឃុំខ្លួនអ្នកទាំង៥ ដោយមិនទាន់រកភស្តុតាងគ្រប់គ្រាន់ដើម្បីដាក់បន្ទុកនៅឡើយ។ គិតមកដល់ថ្ងៃទី២៩ ខែមិថុនានេះអ្នកទាំង៥បានជាប់ឃុំបណ្តោះអាសន្នរង់ចាំសវនាការក្នុងពន្ធនាគារអស់រយៈពេល ៤២៧ ថ្ងៃមកហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ