អ្នកវិភាគសង្គម៖ មានច្បាប់ជួលផ្ទះល្អ តែសំខាន់លើយន្តការអនុវត្តន៍
អ្នកវិភាគសង្គម បានលើកឡើងចំពោះការបង្កើតច្បាប់ស្តីពីភតិសន្យាពិសេស ឬច្បាប់ជួលផ្ទះ ថាល្អតែត្រូវមានយន្តការអនុវត្តន៍ច្បាប់ឲ្យល្អដែរ។ ការលើកឡើងរបស់អ្នកវិភាគសង្គមបានធ្វើឡើង ក្រោយពីសេចក្តីស្នើច្បាប់ភតិសន្យាពិសេស ឬច្បាប់ជួលផ្ទះ នឹងត្រូវពិភាក្សា និងអនុម័តនៅថ្ងៃទី៦ ខែកក្កដា ខាងមុននេះ ក្នុងសម័យប្រជុំលើកទី៤ នីតិកាលទី៥។
ចុះផ្សាយនៅថ្ងៃ៖
ស្តាប់ - ០២:១៣
ការបង្កើតច្បាប់ស្តីពីការជួលផ្ទះ ត្រូវបានលោក កែម ឡី អ្នកវិភាគសង្គម បានលើកឡើងថា ជាច្បាប់ល្អសម្រាប់គ្រប់គ្រងបញ្ហាផ្សេងៗ ដែលអាចកើតមានឡើងរវាងអ្នកជួលផ្ទះ និងម្ចាស់ផ្ទះជួល។ លោកបន្ថែមថាកន្លងមកធ្លាប់មានភាពមិនស្មើគ្នារវាងអ្នកជួលផ្ទះ នឹងម្ចាស់ផ្ទះជួល ដោយសារតែពេលដីឡើងថ្លៃ ម្ចាស់ផ្ទះជួល ឬដីជួល តែងរំលោភកិច្ចសន្យា ហើយដំឡើងថ្លៃស្រេចតែនឹងចិត្ត ដែលបញ្ហានេះប៉ះពាល់ដល់អ្នកមកពីជនបទ ស្នាក់នៅក្នុងទីក្រុង។ ច្បាប់នេះអាចទប់ស្កាត់ការរំលោភកិច្ចសន្យាផងដែរ។
យ៉ាងណាមិញ លោកបានសម្តែងការព្រួយបារម្ភថា បើទោះបីជាមានច្បាប់ក៏ដោយ តែបើយន្តការនៃការអនុវត្តន៍ច្បាប់ ដែលរួមមានអាជ្ញាធរដែនដី ក្រុមប្រឹក្សាអាជ្ញាកណ្តាល និងតុលាការជាដើមនោះ នៅមានអំពើពុករលួយ ប្រើប្រាស់អំណាចលើច្បាប់ នោះអ្នកដែលជួលផ្ទះគេនៅតែមិនមានភាពស្មើគ្នាដដែលចំពោះមុខច្បាប់។ ដូច្នេះ មានតែការពង្រឹកការអនុវត្តច្បាប់ បូករួមនឹងយន្តការអនុវត្តន៍ទេ ដែលអាចជាជម្រើសធ្វើឲ្យច្បាប់មានប្រសិទ្ធភាព។
លោក ប៉ាវ ស៊ីណា ប្រធានសហព័ន្ធសហជីពចលនាកម្មករបានឲ្យដឹងថា លោកស្វាគមន៍ចំពោះច្បាប់នេះ ដោយសារតែច្បាប់នេះគឺជាច្បាប់ ដែលសហជីពចង់បាន។ ការចង់បានច្បាប់នេះ គឺដោយសារតែកន្លងមកម្ចាស់ផ្ទះជួលតែងតែដំឡើងថ្លៃតាមការឡើងប្រាក់ឈ្នួលរបស់កម្មករដែរ ដែលការដំឡើងនោះមិនសមាមាត្រនឹងការចំណាយប្រចាំថ្ងៃ ឬប្រចាំខែរបស់អ្នកជួលផ្ទះ។
លោក ប៉ាវ ស៊ីណា យល់ឃើញថាការអនុវត្តច្បាប់នេះ អាចនឹងមានឧបសគ្គមួយចំនួន ដូចជាម្ចាស់ផ្ទះជួលខ្លះបានចំណាយលុយ ដើម្បីសាងសង់ផ្ទះជួល ដោយសារតែយល់ឃើញថាអាចនឹងបានផលចំណេញ។ ប៉ុន្តែនៅពេលដែលមានច្បាប់ហាមមិនឲ្យមានការដំឡើងថ្លៃរហូតដល់២ឆ្នាំ នោះពួកគេអាចនឹងបាត់បង់ការចំណេញ។ ហើយម្ចាស់ផ្ទះជួលមួយចំនួនទៀត អាចនឹងលុបចោលគំរោងសាងសង់ផ្ទះជួលបន្ថែមផងដែរ។ លោកបន្ថែមថាអ្នក ដែលចំណេញច្រើនពីច្បាប់នេះ គឺជាអ្នកជួលផ្ទះ។
សូមបញ្ជាក់ថាសេចក្តីស្នើច្បាប់ភតិសន្យាពិសេស មាន៤ជំពូក ចែកចេញ១១មាត្រា។ ហើយសភានឹងពិភាក្សា និងអនុម័ត សេចក្តីស្នើច្បាប់ស្តីពី ភតិសន្យាពិសេស ឬច្បាប់ផ្ទះជួល នៅថ្ងៃចន្ទ ទី៦ ខែកក្កដា ឆ្នាំ២០១៥ ក្នុងសម័យប្រជុំរដ្ឋសភាលើកទី៤ នីតិកាលទី៥។ នេះបើតាមសេចក្តីប្រកាសព័ត៌មានស្តីពីលទ្ធផលនៃកិច្ចប្រជុំគណៈកម្មាធិការអចិន្ត្រៃយ៍នៃរដ្ឋសភា កាលពីថ្ងៃទី៣ ខែកក្កដាម្សិលមិញនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ