សញ្ញាណនៃការទិញសន្លឹកឆ្នោត ជាក្តីបារម្ភចំពោះការបោះឆ្នោត នាពេលខាងមុខ!
នៅថ្ងៃនេះ អង្គការក្រុមការងារដើម្បីដោះស្រាយទំនាស់ ហៅកាត់ថា ACT បានចេញរបាយការណ៍សិក្សាថ្មីមួយ ស្តីពី ស្ថានភាពមុនការបោះឆ្នោះក្រុមប្រឹក្សាឃុំសង្កាត់ ឆ្នាំ២០១៧ នៅកម្ពុជា។ អង្គការនេះ សម្តែងក្តីបារម្ភចំពោះការបោះឆ្នោតខាងមុខ ព្រោះថាមានការទិញទឹកចិត្តពលរដ្ឋ ឬការទិញសន្លឹកឆ្នោត ជាថ្នូរទៅនឹងប្រាក់កាស និងការសន្យាផ្សេង។ ទន្ទឹមនេះ អ្នកតំណាងបក្សប្រឆាំង និងអ្នកតំណាងគ.ជ.ប. ដែលបានចូលរួមក្នុងពិធីផ្សព្វផ្សាយរបាយការណ៍នេះ បានទទួលស្គាល់ ហើយនឹងយកការរកឃើញនេះ ទៅពិចារណាជាមួយស្ថាប័នរបស់ខ្លួន។
ចុះផ្សាយនៅថ្ងៃ៖
ស្តាប់ - ០២:៤៧
មុនចេញការសិក្សានៅពេលនេះ អង្គការក្រុមការងារដើម្បីដោះស្រាយទំនាស់ បានចុះដើរសម្ភាសមនុស្សខ្មែរ ជាង៧០០នាក់ ដែលរស់នៅទូទាំង២៣ខេត្តក្រុង។ របាយការណ៍រកឃើញភាពអសកម្ម ប្រមាណ១៣ចំណុច ដែលជាក្តីបារម្ភចំពោះការបោះឆ្នោតទៅថ្ងៃមុន។
អង្គការមួយនេះ គូសបញ្ជាក់ថា មានគ្រួសារ ដែលមានកូនង៉ាទើបនឹងកើត ក្រោម១០ថ្ងៃ អាចយកលិខិតបញ្ជាក់ពីពេទ្យ ទៅយកលុយ១០ ឬ២០ម៉ឺនរៀល ពីគណបក្ស តែត្រូវសន្យា និងធានាថា សមាជិកគ្រួសារត្រូវបោះឆ្នោតឲ្យបក្សនោះ។ ហើយមានមន្ត្រីរបស់បក្សទៅពន្យល់ប្រាប់បុគ្គលិកមន្ទីរពេទ្យថែមទៀផង។
លើសពីនេះ គឺមានសន្យាឲ្យអាចចិញ្ចឹមត្រីឆ្តោរបាន ដែលត្រូវត្រីឆ្តោរជាប្រភេទត្រីត្រូវហាមឃាត់។ សមាជិកបក្សខាងថ្នាក់ក្រោម បានអនុញ្ញាតឲ្យពលរដ្ឋចិញ្ចឹមត្រីឆ្តោរ ដោយសន្យាបោះឆ្នោតឲ្យបក្ស បើមិនដូច្នោះទេ មានការចាប់ចង ដាក់គុកជាដើម។ ថែមពីនេះ គឺមានការបង្ខំឲ្យស្បថស្បែបោះឆ្នោតឲ្យបក្ស។
ករណីផ្សេងទៀត ដែលអង្គការ ACT រកឃើញ គឺ មានការកៀងគរយុវជន សិស្សនិស្សិត ដោយឧបត្ថម្ភដល់ទស្សនកិច្ចសិក្សា ការដើរលេងកម្សាន្តនានា រួមទាំងផ្តល់អាហារូបករណ៍ឲ្យពួកគេ និងសន្យាឲ្យពួកគេចូលបម្រើការងារក្នុងស្ថាប័នរដ្ឋបាលឃុំសង្កាត់ ជាថ្នូរនឹងការឲ្យពួកគេបោះឆ្នោតគាំទ្របក្ស។
បក្សនយោបាយខ្លះ បានសន្យាចេញលុយ បង់ដោះបំណុលដែលពលរដ្ឋជំពាក់ធនាគារ ឬមីក្រូហិរញ្ញវត្ថុ ដែលពួកគេជំពាក់ក្រោម១ពាន់ដុល្លារ និងបង្ខំឲ្យផឹកទឹកសម្បថជាដើម។ ចំពោះចំណុចទាំងនេះ ម្ចាស់របាយការណ៍ ចាត់ទុកថា ជាការទិញទឹកចិត្ត និងជាការទិញសន្លឹកឆ្នោត ហើយនេះគឺជាក្តីបារម្ភខ្លាំងចំពោះការបោះឆ្នោតនាពេលខាងមុខ។
មិនតែប៉ុណ្ណោះ គឺមានលើកឡើងដែរពីការបន្លាច បំផិតបំភ័យ បើមិនបោះឆ្នោតឲ្យបក្ស ឬបក្សកាន់អំណាចនោះទេ ហើយបើបក្សចាញ់ នឹងមានសង្គ្រាម។ ចំណែកពលរដ្ឋខ្លះ ផ្តល់សម្ភាសឲ្យអង្គការACTថា ពួកគេលំបាករកអ្នកធានា គ្មានអ្នកធានា ក្នុងការចុះឈ្មោះបោះឆ្នោត។ អ្នកខ្លះ រស់នៅឃុំនេះ ទៅមានឈ្មោះនៅឃុំផ្សេង។
ថែមពីនេះ របាយការណ៍ក៏មាននិយាយដែរ ពីករណីនៃការបាត់សន្លឹកឆ្នោត ការប្រកាន់បក្សពួក គំរាមកំហែង សូកប៉ាន់ ហើយករណីជនជាតិដទៃដែលមានលិខិតស្នាមត្រឹមត្រូវ ហើយចុះឈ្មោះបោះឆ្នោតបាន ក៏ត្រូវលើកឡើងតិចតួចក្នុងរបាយការណ៍នេះដែរ។
ជាមួយគ្នានេះ លោក សោម សូរីដា អគ្គលេខាធិការរង គ.ជ.ប. បានគូសបញ្ជាក់ថា របាយការណ៍នេះ ល្អ ហើយលោកនឹងយកទៅពិចារណា និងដាក់ចូលសេចក្តីណែនាំរបស់គ.ជ.ប.។ ក៏ប៉ុន្តែ លោក សោម សូរីដា បានបដិសេធថា តាំងពីមានការបោះឆ្នោតសកល និងអសកល មានចំនួន ១៤ដងមកហើយ គឺគ្មានរបាយការណ៍ណាមួយដែលសិក្សាច្បាស់លាស់ ថាមានការបាត់សន្លឹកឆ្នោតនោះទេ។ នេះបើតាមអគ្គលេខាធិការរង គ.ជ.ប.៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ