អ្នករាយការណ៍ពិសេសUN អំពាវនាវឲ្យស្តារប្រជាធិបតេយ្យនិងសង្គមស៊ីវិលឡើងវិញ
កម្ពុជាគួរតែត្រលប់ទៅដើរលើផ្លូវដែលមានពហុបក្សនយោបាយ ដើម្បីស្តារលទ្ធិប្រជាធិបតេយ្យ និងពង្រឹងសេរីភាពសម្រាប់សង្គមស៊ីវិល និងអ្នកសារព័ត៌មាន ដែលកំពុងប្រតិបត្តិការនៅក្នុងប្រទេសវិញ។ នេះគឺជាការលើកឡើងរបស់លោកស្រី រ៉ូណា ស្មីត អ្នករាយការណ៍ពិសេសអង្គការសហប្រជាជាតិផ្នែកសិទ្ធិមនុស្សប្រចាំកម្ពុជា។ សេចក្តីថ្លែងការណ៍របស់លោកស្រី ស្មីត បានធ្វើឡើងស្របពេលដែលពិភពលោកប្រារព្ធទិវាអន្តរជាតិស្តីពីសិទ្ធិមនុស្សខួបលើកទី៦៩ កាលពីថ្ងៃទី១០ធ្នូ។
ចុះផ្សាយនៅថ្ងៃ៖
ពីទីក្រុងហ្សឺណែវ និងដើម្បីអបអរទិវាសិទ្ធិមនុស្សអន្តរជាតិ១០ធ្នូផងនោះ លោកស្រី រ៉ូណា ស្មីត បានលើកឡើងបន្ថែមក្នុងសេចក្តីថ្លែងការណ៍ជាង២ទំព័រ ដោយសម្តែងនូវការព្រួយបារម្ភចំពោះស្ថានការណ៍នយោបាយនៅកម្ពុជា នាពេលបច្ចុប្បន្ន រាប់តាំងពីការរំលាយគណបក្សសង្គ្រោះជាតិ ការហាមឃាត់សិទ្ធិធ្វើនយោបាយចំពោះសមាជិកគណបក្សនេះ ចំនួន ១១៨រូប និងផ្តល់អាសនៈជាប់ឆ្នោតរបស់គណបក្សប្រឆាំង ទៅឲ្យគណបក្សដទៃជាដើម។
តាមលោកស្រី រ៉ូណា ស្មីត នេះគឺជាសកម្មភាពមួយ ដែលឆ្លុះបញ្ចាំងពីការប្រឆាំងទៅនឹងឆន្ទៈ និងសិទ្ធិសេរីភាពរបស់ពលរដ្ឋ ក្នុងការជ្រើសរើសអ្វីដែលពួកគេពេញចិត្ត។ ជាមួយគ្នានោះ លោកស្រី រ៉ូណា ស្មីត ក៏បានលើកឡើងពីការចាប់ឃុំខ្លួនមេដឹកនាំបក្សប្រឆាំង តាំងពីខែកញ្ញា និងការដាក់សម្ពាធទៅលើសកម្មជនបក្សនេះជាច្រើននាក់ រហូតដល់ពួកគេត្រូវបង្ខំចិត្តភៀសខ្លួនចេញពីប្រទេស និងសេចក្តីរាយការណ៍ពីការគាបសង្កត់ពីអាជ្ញាធរមូលដ្ឋានថាគឺជារូបភាពមិនល្អមួយ សម្រាប់ការបោះឆ្នោតនៅឆ្នាំ ២០១៨ខាងមុខ។
ជាមួយគ្នានេះ លោក កត្តា អ៊ន អ្នកនាំពាក្យគណៈកម្មការសិទ្ធិមនុស្សកម្ពុជា បានហៅការលើកឡើងរបស់លោកស្រី រ៉ូណា ស្មីត ថាគ្រាន់តែជាកង្វល់របស់បុគ្គល ដែលមិនឆ្លុះបញ្ជាំងនូវទិដ្ឋភាពជាក់ស្តែង។ អ្នកនាំពាក្យរូបនេះបន្តថា សេចក្តីថ្លែងរបស់តំណាងសិទ្ធិមនុស្សអង្គការសហប្រជាជាតិ គឺបានធ្វើឡើងបែបតក់ក្រហល់ខ្វះការពិនិត្យលើអង្គហេតុនិងអង្គច្បាប់ លោកថាអ្វីៗមិនអាក្រក់ដូចការលើកឡើងនោះទេ។
ក៏ប៉ុន្តែ នៅក្នុងសេចក្តីថ្លែងការណ៍របស់ខ្លួនលោកស្រីសាស្ត្រាចារ្យរ៉ូណា ស្មីត បានសង្កត់ធ្ងន់ថា រាល់ការរិះគន់ និងការជជែកដេញដោលផ្នែកនយោបាយ ព្រមទាំងការទទួលបាននូវប្រភពព័ត៌មានផ្សេងៗ គឺមានសារៈសំខាន់ខ្លាំងណាស់ ដើម្បីធានាថា អ្នកបោះឆ្នោតអាចយល់ដឹងពីគោលនយោបាយ និងគោលបំណងរបស់តំណាងរបស់ពួកគេ។
ទោះយ៉ាងណា លោកស្រី រ៉ូណា ស្មីត បានសរសើរដែរថា ការឈប់ស៊ើបអង្កេតលើមជ្ឈមណ្ឌលសិទ្ធិមនុស្សកម្ពុជា ឲ្យអាចត្រលប់ទៅរកការងាររបស់ខ្លួនវិញ គឺជាជំហានមួយក្នុងទិសដៅត្រឹមត្រូវ។ លោកស្រី ចង់ឲ្យកម្ពុជា មានភាពប្រសើរឲ្យស្របតាមសេចក្តីប្រកាសសកលស្តីពីសិទ្ធិមនុស្ស ដែលបានចែងពីចក្ខុវិស័យសកលអំពីសន្តិភាព ការអភិវឌ្ឈ និងស្ថិរភាព ដោយផ្អែកលើសេរីភាពរួចផុតពីភាពភ័យខ្លាច និងទុគ៌ត។ ទាំងពីរនេះ ផ្សារភ្ជាប់គ្នាយ៉ាងស្អិតរមួត ហើយមិនអាចលេចចេញជារូបរាង ដោយគ្មានអ្វីមួយបាននោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ