ខួប១ឆ្នាំនៃការចាប់ខ្លួនអ្នកកាសែត RFA៖ អង្គការអ្នកកាសែតគ្មានព្រំដែនស្នើតុលាការទម្លាក់បទចោទ
ថ្ងៃទី១៤ ខែវិច្ឆិកា ម្សិលមិញនេះ គឺជាខួបគម្រប់មួយឆ្នាំនៃការចាប់ខ្លួនអ្នកកាសែតអាស៊ីសេរី២នាក់ គឺលោក យាង សុធារិន ហៅ យាង សុជាមេត្តា និងលោក អ៊ួន ឈិន។ អ្នកទាំងពីរត្រូវបាននគរបាលរាជធានីភ្នំពេញ ចាប់ខ្លួននៅថ្ងៃទី១៤ ខែវិច្ឆិកា ឆ្នាំ២០១៧ និងក្រោយមកត្រូវបានតុលាការចោទប្រកាន់ពីបទប្រគល់ឲ្យរដ្ឋបរទេសនូវព័ត៌មានជាអាទិ៍ ដែលនាំឲ្យអន្តរាយដល់ការការពារជាតិ។ ក្នុងឱកាសនេះ អង្គការអ្នកកាសែតគ្មានព្រំដែន បានចេញផ្សាយវីដេអូចំនួនពីរ ឧទ្ទិសដល់ទុក្ខវេទនារបស់អតីតអ្នកកាសែតទាំងពីររូបដែលចំណាយពេលជាង៩ខែនៅក្នុងពន្ធនាគារ និងអំពាវនាវឲ្យតុលាការ ទម្លាក់បទចោទប្រឆាំងនឹងអ្នកទាំងពីររូបចោល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
នៅក្នុងវីដេអូចំនួនពីរចេញផ្សាយដោយអង្គការអ្នកកាសែតគ្មានព្រំដែន លោក យាង សុធារិន និងលោក អ៊ួន ឈិន បានរំឭកឡើងវិញពីព្រឹត្តិការណ៍ចាប់ខ្លួនអ្នកទាំងពីរនៅថ្ងៃទី១៤ វិច្ឆិកា ឆ្នាំ២០១៧។ បន្ទាប់ពីការចាប់ខ្លួន អតីតអ្នកកាសែតវិទ្យុអាស៊ីសេរីទាំងពីររូប ត្រូវបានឃុំខ្លួនក្នុងពន្ធនាគារ។
តាមរយៈវីដេអូដដែល លោក យាង សុធារិន និងលោក អ៊ួន ឈិន បានរៀបរាប់ពីស្ថានភាពរស់នៅរបស់ពួកគេនៅក្នុងពន្ធនាគារ រាប់ចាប់តាំងពីការស្នាក់នៅណែនណាន់តាន់តាប់នៅក្នុងបន្ទប់ឃុំឃាំង និងកង្វះអនាម័យនៅក្នុងបន្ទប់ឃុំឃាំង ដែលបានបង្កទៅជាជំងឺសើស្បែករ៉ាំរ៉ៃ។ លោក អ៊ួន ឈិន បានអះអាងថា ជំងឺសើស្បែកដែលកើតលើរូបលោកនៅក្នុងពន្ធនាគារ នៅមិនទាន់ជាសះស្បើយនៅឡើយ បើទោះបីជាលោកត្រូវបានដោះលែងចេញពីពន្ធនាគារហើយក៏ដោយ។
អង្គការអ្នកកាសែតគ្មានព្រំដែន បានប្រៀបប្រដូចការឃុំខ្លួនលោក យាង សុធារិន និងលោក អ៊ួន ឈិន នៅក្នុងពន្ធនាគារ ថាជាឋាននរកនៅលើភពផែនដី និងបានទាមទារឲ្យតុលាការទម្លាក់ចោលការចោទប្រកាន់ទាំងអស់ប្រឆាំងនឹងអ្នកទាំងពីរ។
សម្រាប់អង្គការអ្នកកាសែតគ្មានព្រំដែន លោក យាង សុធារិន និងលោក អ៊ួន ឈិន គឺជាជនរងគ្រោះនៃការបង្ក្រាបលើអ្នកកាសែត ពីសំណាក់រដ្ឋាភិបាលលោក ហ៊ុន សែន។ ជាការបង្ក្រាបធ្វើទុក្ខបុកម្នេញ ដែលអង្គការដដែលនេះ ចោទប្រកាន់ថា ធ្វើឡើងដើម្បីបិទបាំងនូវការរិះគន់ទាំងអស់ មុនពេលកម្ពុជារៀបចំការបោះឆ្នោតនៅខែកក្កដា ឆ្នាំ២០១៨។
សូមជម្រាបជូនថា អតីតអ្នកយកព័ត៌មានវិទ្យុអាស៊ីសេរីទាំងពីររូប ត្រូវបានតុលាការចោទប្រកាន់តាមមាត្រា៤៤៥ នៃក្រមព្រហ្មទណ្ឌកម្ពុជា ពីបទប្រគល់ឲ្យរដ្ឋបរទេសនូវព័ត៌មានជាអាទិ៍ ដែលនាំឲ្យអន្ដរាយដល់ការការពារជាតិ ប្រព្រឹត្តនៅប្រទេសកម្ពុជាកាលពីអំឡុង ឆ្នាំ២០១៧ និងបង្គាប់ឲ្យឃុំខ្លួនដាក់ពន្ធនាគារ។ អ្នកទាំងពីរបានជាប់ឃុំអស់រយៈពេល២៧២ថ្ងៃ មុនពេលត្រូវបានដោះលែងឲ្យនៅក្រៅឃុំ នាថ្ងៃទី២១ខែសីហាកន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ