ក្លិបអ្នកកាសែតកម្ពុជាស្វាគមន៍ដែលរដ្ឋាភិបាលចង់ឲ្យសារព័ត៌មានបរទេសបើកការិយាល័យឡើងវិញ
ម្សិលមិញ រដ្ឋាភិបាលកម្ពុជាបានចេញសេចក្តីថ្លែងការណ៍មួយ ស្តីពីវិធានការនានា ដើម្បីពង្រឹងលទ្ធិប្រជាធិបតេយ្យ និងលំហរនយោបាយនៅក្នុងប្រទេសកម្ពុជា។ ក្នុងចំណោមវិធានការទាំងនោះ រដ្ឋាភិបាលកម្ពុជាបានបង្ហាញពីចេតនាចង់ឲ្យវិទ្យុអាស៊ីសេរី និងកាសែត The Cambodia Daily បើកការិយាល័យរបស់ខ្លួនឡើងវិញនៅក្នុងប្រទេសកម្ពុជា។ ចំពោះចេតនានេះ ក្លិបអ្នកកាសែតកម្ពុជា បានសម្តែងនូវការស្វាគមន៍។
ចុះផ្សាយនៅថ្ងៃ៖
ស្តាប់ - ០២:០០
លោកឆាយ សុផល នាយកប្រតិបត្តិក្លិបអ្នកកាសែតកម្ពុជា បានសម្តែងនូវការអបអរសាទ និង ស្វាគមន៍ចំពោះសេចក្តីថ្លែងការណ៍របស់រដ្ឋាភិបាលកម្ពុជាដែលបង្ហាញពីចេតនាចង់ឲ្យកាសែត The Cambodia Daily និង វិទ្យុអាស៊ីសេរី បើកការិយាល័យផ្សព្វផ្សាយរបស់ខ្លួនឡើងវិញនៅក្នុងប្រទេសកម្ពុជា។ កាសែតThe Cambodia Daily បានបិទការិយាល័យរបស់ខ្លួនកាលពីថ្ងៃទី០៤ ខែកញ្ញា ឆ្នាំ២០១៧។រីឯវិទ្យុអាស៊ីសេរីវិញ បានបិទការិយាល័យនៅភ្នំពេញកាលពីថ្ងៃទី១២ ខែកញ្ញា ឆ្នាំ២០១៧។ សម្រាប់លោកឆាយ សុផល សេចក្តីថ្លែងការណ៍របស់រដ្ឋាភិបាលនេះ គឺជា “ភ្លើងខៀវ” សម្រាប់សារព័ត៌មានបរទេសទាំងពីរនេះ។
សូមរំលេចឲ្យដឹងថា នៅក្នុងសេចក្តីថ្លែងការណ៍កាលពីថ្ងៃចន្ទ រដ្ឋាភិបាលកម្ពុជាបានបកស្រាយពីបញ្ហាកាសែត The Cambodia Daily ថា កាសែតនេះ បានបិទការបោះពុម្ភផ្សាយដោយខ្លួនឯង ព្រោះគេចវេសមិនបំពេញកាតព្វកិច្ចពន្ធដារស្របតាមច្បាប់កម្ពុជា។ ត្រង់ចំណុចនេះ រដ្ឋាភិបាលគូសបញ្ជាក់ថា ក្នុងករណីដោះស្រាយបំណុលពន្ធដាររួចរាល់ កាសែត The Cambodia Daily អាចចាប់ផ្តើមប្រតិបត្តិការរបស់ខ្លួនឡើងវិញ។ ចំណែកវិទ្យុអាស៊ីសេរីវិញ រដ្ឋាភិបាលកម្ពុជា បានអះអាងថា បានផ្តួចផ្តើមគំនិតបិទការិយាល័យតំណាងដោយខ្លួនឯងដែរ។ ដូច្នេះ វិទ្យុនេះមានសេរីភាពបើកការិយាល័យរបស់ខ្លួនវិញបានដែរនៅកម្ពុជា។
មកដល់ពេលនេះ តំណាងសារព័ត៌មានបរទេសទាំងពីរមិនទាន់បញ្ចេញការអត្ថាធិប្បាយ ថាតើនឹងមកបើកការិយាល័យនៅកម្ពុជាឡើងវិញឫយ៉ាងណានោះទេ។ ប៉ុន្តែក្លិបអ្នកកាសែតកម្ពុជាចង់ឲ្យសារព័ត៌មានទាំងនេះដោះស្រាយបញ្ហាឲ្យបានចប់សព្វគ្រប់និងមកបើកការិយាល័យរបស់ខ្លួនឡើងវិញ។ នេះបើតាមការបញ្ជាក់របស់លោកឆាយ សុផល។ សម្រាប់លោកឆាយ សុផល ប្រសិនបើកាសែត The Cambodia Daily និង វិទ្យុអាស៊ីសេរី បើកការិយាល័យផ្សព្វផ្សាយឡើងវិញនោះ នឹងកាន់តែធ្វើឲ្យមានការប្រកួតប្រជែងលើការផ្តល់ព័ត៌មាន។ ការប្រកួតប្រជែងលើការផ្តល់ព័ត៌មាន ដែលលោកឆាយ សុផល អះអាងថា នឹងធ្វើឲ្យព័ត៌មានកាន់តែសម្បូរបែប និង ផ្តល់ជម្រើសបានរឹតតែច្រើនដល់ប្រជាពលរដ្ឋ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ