ព្រះសីហនុភ្លៀងធ្លាក់ខ្លាំង តែខេត្តថា មិនប៉ះពាល់ការប្រឡងថ្ងៃស្អែកឡើយ
ពីខេត្តព្រះសីហនុមានសេចក្ដីរាយការណ៍មកថា នៅថ្ងៃនេះមានភ្លៀងធ្លាក់ខ្លាំងដែលមជ្ឈដ្ឋានទូទៅបារម្ភខ្លាចប៉ះពាល់ដល់ដំណើរការប្រឡងបាក់ឌុបនៅថ្ងៃស្អែក។ កង្វល់នេះត្រូវបានលោកអភិបាលខេត្ត យន្ត មីន គូសបញ្ជាក់ប្រាប់វិទ្យុបារាំងនៅមុននេះបន្តិចថា មានផលប៉ះពាល់តិចតួចដែរ តែមិនធំដុំប៉ុន្មានទេ ព្រោះខេត្តបានត្រៀមបង្ការទុកជាមុន។
ចុះផ្សាយនៅថ្ងៃ៖
ស្តាប់ - ០១:៥៨
ខេត្តព្រះសីហនុមានមណ្ឌលប្រឡងចំនួន៤ និងមានបេក្ខជនប្រឡងជាងមួយពាន់ប្រាំពីររយនាក់។ ប្រឈមនឹងស្ថានភាពភ្លៀងធ្លាក់នេះលោក យន្ត មីន អភិបាលខេត្តព្រះសីហនុ ទទួលស្គាល់ថា បេក្ខជនប្រឡងអាចលំបាក់ពេល ធ្វើដំណើរបន្តិច ប៉ុន្តែបើនិយាយពីរូបភាពនៃផលប៉ះពាល់ធំដុំមិនសូវជាធ្ងន់ធ្ងរប៉ុន្មានទេ។ មិនធ្ងន់ធ្ងរដោយសារខេត្តបានត្រៀមបង្ការទុកជាស្រេចដូចជាៈ បន្ទប់ប្រឡងគ្មានការបាក់បែក ឬលេចធ្លាយពីលើដំបូល។ បញ្ហាអគ្គិសនីត្រូវបានតភ្ជាប់ដោយសុវត្ថិភាព ។ ចំណែកបន្ទប់ទឹកក៏មានអនាម័យគ្រប់គ្រាន់។ បើតាម លោក យន្ត មីន តាំងពីព្រឹកព្រលឹមមកភ្លៀងនៅតែបន្តធ្លាក់។ ស្ថានភាពភ្លៀងធ្លាក់នេះកើតមានឡើងតាំងពីថ្ងៃទី១៦សីហាមកម្លេះ។
និយាយពីក្របខណ្ឌទូទាំងប្រទេសចំពោះបញ្ហាអាកាសធាតុនេះដែរ រដ្ឋមន្រ្តីក្រសួងអប់រំលោក ហង់ ជួនណារ៉ុន បានគូសបញ្ជាក់ថា ក្រសួងបានសហការជាមួយខេត្តចុះទៅត្រួតពិនិត្យរួចរាល់ហើយ ចំពោះដំបូលអគារនៃបន្ទប់ប្រឡងកុំឲ្យមានការធ្លុះធ្លាយលិចទឹកដែលបណ្ដាលមកពីទឹកភ្លៀង។ បើតាមលោករដ្ឋមន្ត្រីនៅទូទាំងប្រទេសមានមណ្ឌលប្រឡង១៧០មណ្ឌល។ ក្នុងនោះការជួសជុលនៅ២ឆ្នាំចុងក្រោយនេះសម្រេចបានចំនួន១០០មណ្ឌលហើយ សល់ពីនេះកំពុងធ្វើការជួសជុល។
សូមបញ្ជាក់ថា បេក្ខជនប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) នៅក្នុងឆ្នាំ២០១៧នេះ មានចំនួនសរុប ១០៣,១១២នាក់ ដែលមានការកើនឡើងជាងឆ្នាំមុន ប្រមាណជាង ៩ពាន់នាក់ បើធៀបនឹងឆ្នាំ២០១៦។
ដោយឡែកយាយពីស្ថានភាពទូទៅនៅខេត្តព្រះសីហនុលោក យន្ត មីន បានគូសបញ្ជាក់ថា ប្រជានេសាទបានផ្អាកសកម្មភាពរបស់ខ្លួនមួយរយៈសិន ឬក៏មួយចំនួនទៀតបន្តសកម្មភាពធម្មតាទៅតាមអ្វីដែលអាចធ្វើទៅបាន។ ចំពោះភ្ញៀវទេសចរណ៍វិញ ទាំងជាតិនិងអន្តរជាតិនៅតែមានដំណើរកំសាន្តធម្មតា។ ប៉ុន្តែអាជ្ញាធរបានក្រើនរំលឹកឲ្យពួកគេមានភាពប្រុងប្រយ័ត្នផងដែរ នៅក្នុងចេញដំណើរទៅលេងកោះផ្សេងៗក្នុងខេត្តព្រះសីហនុ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ