កម្ពុជាទទួលឈុតគ្រឿងអលង្ការមាសសម័យអង្គរ ពីភ្នាក់ងារលក់វត្ថុបុរាណអង់គ្លេស
តំណាងភ្នាក់ងារលក់វត្ថុបុរាណ Johnathan Tucker Antonia Tozer Asian Art នៅទីក្រុងឡុងដ៍ កាលពីថ្ងៃទី២០ ខែមេសា បានស្មគ្រចិត្តប្រគល់ ឈុតគ្រឿងអលង្ការមាស ចំនួន ១០មុខ របស់ខ្មែរ នាសម័យអង្គរ ជូនរាជរដ្ឋាភិបាលកម្ពុជា តាមរយះស្ថានឯកអគ្គរាជទូតកម្ពុជា ប្រចាំចក្រភពអង់គ្លេស។ បើតាម អ្នកនាំពាក្យក្រសួងវប្បធម៌ និងវិចិត្រសិល្បៈ រាជរដ្ឋាភិបាលកម្ពុជា កំពុងបន្តនីតិវិធីវេចខ្ចប់ ហើយនឹងបញ្ជូនមកប្រទេសកម្ពុជាវិញ ក្នុងពេលឆាប់ៗ ដើម្បីតម្កល់ទុក ឈុតគ្រឿងអលង្ការមាស ទាំងនោះ នៅក្នុងសារមន្ទីរជាតិ នាទីក្រុងភ្នំពេញ។
ចុះផ្សាយនៅថ្ងៃ៖
ស្តាប់ - ០២:៣៩
លោក ថៃ នរៈសត្យា រដ្ឋលេខាធិការ និងជា អ្នកនាំពាក្យ ក្រសួងវប្បធម៌ និងវិចិត្រសិល្បៈ បានបញ្ជាក់ប្រាប់វិទ្យុបារាំង RFI នៅថ្ងៃសុក្រនេះថា ឈុតគ្រឿងអលង្ការមាស នាសម័យអង្គរ ដែល កម្ពុជា ទទួលបានពី ភ្នាក់ងារលក់វត្ថុបុរាណ Johnathan Tucker Antonia Tozer Asian Art កាលពីថ្ងៃទី២០ ខែមេសា នៅទីក្រុងឡុងដ៍ មានចំនួន ១០មុខ រួមមាន ក្រវិលមាស ខ្សែកមាស រង្វង់មាសសម្រាប់ពាក់លម្អព្រះសិរ ដើមដៃ ចន្លោះពោះ-ដើមទ្រូង និងខ្សែក្រវ៉ាត់មាស។ លោក បានបន្ថែមថា ឈុតគ្រឿងអលង្ការមាស ទាំងនេះ នឹងបញ្ជូនមកកម្ពុជា ក្នុងពេលឆាប់ៗបន្ទាប់ពី បញ្ចប់នីតិវិធីវេចខ្ចប់ នៅប្រទេសអង់គ្លេស ដើម្បីយកមកតម្កល់រក្សាទុកនៅក្នុងសារមន្ទីរជាតិ ប្រទេសកម្ពុជា។
លោក ថៃ នរៈសត្យា បានថ្លែងថា កាលពីថ្ងៃទី១៨ ខែវិច្ឆិកា ឆ្នាំ២០១៦ បន្ទាប់ពីទទួលបានព័ត៌មានពីការប្រកាសដាក់តាំងលក់ វត្ថុបុរាណឥណ្ឌា និងអាស៊ីអាគ្នេយ៍ របស់ ភ្នាក់ងារលក់វត្ថុបុរាណ នៅទីក្រុងឡុងដ៍ (ចាប់ពីថ្ងៃទី៣ ដល់ថ្ងៃទី២៥ ខែវិច្ឆិកា ឆ្នាំ២០១៦) ដែលក្នុងនោះ មាន ឈុតគ្រឿងអលង្ការមាសរបស់ខ្មែរ ទើប ក្រសួងវប្បធម៌ និងវិចិត្រសិល្បៈ បានធ្វើការទាមទាឲ្យដកចេញពីបញ្ជីលក់ ហើយផ្តល់សក្ខីកម្មយ៉ាងច្បាស់ថា វត្ថុបុរាណទាំងនោះ ជាកម្មសិទ្ធិរបស់ខ្មែរ តែមួយគត់ ហើយត្រូវបានយកចេញដោយខុសច្បាប់ពីកម្ពុជា។ ការស្មគ្រចិត្តប្រគល់វត្ថុបុរាណទាំងនេះ មកកម្ពុជាវិញ គឺជាកិច្ចប្រឹងប្រែងរបស់ រាជរដ្ឋាភិបាលអង់គ្លេស កម្ពុជា ដើម្បីរួមចំណែកលើកតម្កើងដល់វប្បធម៌នៃជាតិខ្មែរ។
លោកចាត់ទុកថា នេះជាលើកទីពីរហើយ ដែលកម្ពុជា ទទួលបានមកវិញនូវ ទ្រព្យសម្បត្តិមហាសាល ពោលគឺ បន្ទាប់ពីទទួលបាន ព្រះសិរព្រះហរិហរៈ ពី សារមន្ទីរជាតិសិល្បៈអាស៊ីហ្គីមេ ប្រទេសបារាំង ដែលបែកគ្នាពី ព្រះកាយ រក្សានៅកម្ពុជា អស់រយៈពេល ប្រមាណជា ១៣០ឆ្នាំ ហើយទើបត្រូវបានរៀបចំ ពិធីតភ្ជាប់គ្នាឡើងវិញ កាលពីព្រឹកថ្ងៃទី២១ ខែមករា ឆ្នាំ២០១៦។ រូបបដិមាព្រះហរិហរៈ ជាវត្ថុសក្ការៈ និងសិល្បៈដ៏ប្រណីតរបស់ខ្មែរ ក្នុងរចនាប័ទ្ម ភ្នំដា នាសតវត្សរ៍ទី ៦-៧។
គួរជម្រាបថា ចាប់តាំងពីឆ្នាំ២០១៣មក មាន រូបបដិមាចំនួន៦ ហើយ ដែល កម្ពុជា អាចនាំត្រឡប់មកមាតុភូមិកម្ពុជាវិញ ដោយ រូបបដិមា ទាំងនោះ រួមមាន រូបបដិមាទុរយោទ្ធន៍ ដែលបានមកពី សារមន្ទីរស៊ុតប៊ីស៍ (Sotheby) ក្រុងញ៉ូវយ៉ក។ រូបបដិមាភីម មកពីសារមន្ទីរ ន័រតុន ស៊ីមុន (Norton Simon) ក្នុងរដ្ឋកាលីហ្វ័រញ៉ា (California)។ រូបបដិមាពលរាម មកពីសារមន្ទីរ គ្រីសធី (Christie) ក្រុងញីវយ៉ក។ រូបបដិមា ២ទៀត ជា រូបទ្វារបាល ឬឆ្មាំទ្វារលុតជង្គង់ ធ្វើអំពីថ្មភក់ មកពីសារមន្ទីរ ម៉េត្រូប៉ូលីថេន (Metropolitan ) ក្រុងញីវយ៉ក និងបដិមាហនុមាន បានមកពី សារមន្ទីរវិចិត្រសិល្បៈ ក្លីវវឺឡែន (Cleveland) ហើយចុងក្រោយនេះ គឺ ព្រះសិរព្រះហរិហរៈ មកពី សារមន្ទីរសិល្បៈអាស៊ីហ្គីម៉េ ប្រទេសបារាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ