លោកស្រីរ៉ូណា ស្មីត៖ ប្រទេសកម្ពុជាកំពុងខិតទៅជិតចំនុចកំពូលនៃគ្រោះថ្នាក់ហើយ
«មេដឹកនាំដែលចេញពីការបោះឆ្នោតទាំងអស់ មានទំនួលខុសត្រូវក្នុងការធ្វើសកម្មភាព ដើម្បីប្រយោជន៍ដល់អ្នកដែលពួកគេតំណាងឲ្យ។ ទន្ទឹមនឹងមានអំណាច ក៏មាននូវការទទួលខុសត្រូវក្នុងការគោរពសេចក្តីថ្លៃថ្នូរ និងសិទ្ធិមនុស្សទាំងអស់ មិនមែនគ្រាន់តែសិទ្ធិមានជីវិតឯកជននោះទេ។» នេះគឺជាបង្ហាញនូវការព្រួយបារម្ភរបស់លោកស្រីរ៉ូណា ស្មីត អ្នករាយការណ៍ការពិសេសអង្គការសហប្រជាជាតិស្តីពីស្ថានភាពសិទ្ធិមនុស្សនៅកម្ពុជា នៅក្នុងសន្និសីទសារព័ត៌មាន សម្រាប់បញ្ចប់បេសសកម្មរបស់លោកស្រីក្នុងរយៈពេល១០ថ្ងៃនៅកម្ពុជា នៅរសៀលថ្ងៃទី ៣១ មីនានេះ នៅឯស្នាក់ការរបស់អង្គការសហប្រជាជាតិ នៅក្នុងទីក្រុងភ្នំពេញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤០
លោកស្រីរ៉ូណា ស្មីត បានបញ្ជាក់យ៉ាងច្បាស់ៗថា ច្បាប់ទាំងអស់ត្រូវតែបានអនុវត្តដោយស្មើភាពគ្នា និងដោយយុត្តិធម៌ ដល់គ្រប់គណបក្សនយោបាយ និងសមាជិករបស់គណៈបក្សទាំងនោះ ដើម្បីធានាឲ្យមាននូវកិច្ចការពារលំហប្រជាធិបតេយ្យ នៅក្នុងដំណើរការបោះឆ្នោត។ លោកស្រីបានបន្តថា ស្ថានការណ៍នយោបាយដែលរាប់ទាំង ការគំរាមកំហែងជាថ្មី កិច្ចដំណើរការនីតិវិធីរបស់តុលាការ និងសូម្បីតែការវាយដំលើរាងកាយរបស់សមាជិក គណបក្សប្រឆាំង គឺសុទ្ធតែជាការព្រួយបារម្ភ។
ក្រៅពីស្ថានភាពទូទៅនេះ លោកស្រីរ៉ូណា ស្មីតក៏បានបង្ហាញពីបញ្ហាសិទ្ធិស្រ្តី។ ក្នុងអំឡុងពេលបំពេញបេសសកម្ម លោកស្រីបានកត់សម្គាល់ពីនិន្នាការគួរឲ្យភ័យខ្លាចកាន់តែខ្លាំងឡើង នៅក្នុងប្រពៃណី និងប្រព័ន្ធផ្សព្វផ្សាយសង្គម ដែលអំពើហិង្សាលើស្រ្តីត្រូវបានគេរាយការណ៍ថាមិនមានការគោរពចំពោះសេចក្តីថ្លៃថ្នូររបស់មនុស្ស ឬសិទ្ធិជនរងគ្រោះឡើយ។ លោកស្រីលើកឡើងទៀតថា ភាពងាយរងគ្រោះទីពីរ គឺតាមរយៈការខកខានក្នុងការការពារអត្តសញ្ញាណជនរងគ្រោះ រួមទាំងអនីតិជនបានបន្តកើតមានជារៀងរាល់ថ្ងៃ តាមស្ថានភាពបែបនេះ។
ក្រៅពីនេះ អ្នករាយការណ៍ការពិសេសអង្គការសហប្រជាជាតិ ស្តីពីស្ថានភាពសិទ្ធិមនុស្សនៅកម្ពុជានេះ ក៏បានបង្ហាញពីបញ្ហាស្ត្រីនៅក្នុងវិស័យកាត់ដេរ ពលករចំណាកស្រុកជាស្រ្តី និងការចូលរួមរបស់ស្ត្រីនៅក្នុងវិស័យនយោបាយ ជាដើម។
បញ្ហាសិទ្ធិរបស់ជនជាតិដើមភាគតិច ក៏ត្រូវបានលោកស្រីស្មីត លើកយកមកបង្ហាញដែរ ខណៈដែលលោកស្រីបានទៅ បំពេញទស្សនៈកិច្ចនៅក្នុងខេត្តស្ទឹងត្រែង និងព្រះវិហារ។ នៅទីនោះលោកស្រីបានចូលទៅជួបសហគមន៍នានា ដែលរងផលប៉ះពាល់ដោយការតាំងទីលំនៅថ្មីជាក់ស្តែង ហើយក៏បានជួបជាមួយនឹងអភិបាលខេត្ត និងតំណាងក្រុមហ៊ុនពាក់ព័ន្ធនានាផងដែរ។ ការអប់រំសិទ្ធិមនុស្ស និងសិទ្ធិទទួលបានការសិក្សាក៏ត្រូវបានលើកយកមកផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ