អ្នកជំនាញការ អ.ស.ប អំពាវនាវឲ្យចាត់វិធានការបន្ថែមទៀត ដើម្បីការពារសិទ្ធិមនុស្សនៅកម្ពុជា
លោកស្រី រ៉ូណា ស្មីត (Rhona Smith) អ្នករាយការណ៍ពិសេសរបស់អង្គការសហប្រជាជាតិ ស្តីពីស្ថានភាពសិទ្ធិមនុស្សនៅកម្ពុជា បានអំពាវនាវឲ្យអាជ្ញាធរកម្ពុជា ធ្វើកិច្ចការឲ្យបានច្រើនថែមទៀត ដើម្បីការពារសិទ្ធិមនុស្សនៅក្នុងប្រទេសនេះ។ ការអំពាវនាវនេះ បានធ្វើឡើងនៅក្នុងរបាយការណ៍របស់លោកស្រីនៅក្នុងកិច្ចប្រជុំក្រុមប្រឹក្សាសិទ្ធិមនុស្សរបស់អង្គការសហប្រជាជាតិដែលប្រព្រឹត្តទៅនៅទីក្រុងសឺណែវ ប្រទេសស្វីស កាលពីថ្ងៃទី ២៦ កញ្ញា។
ចុះផ្សាយនៅថ្ងៃ៖
ស្តាប់ - ០២:៤៨
អ្នករាយការណ៍ពិសេសរបស់អង្គការសហប្រជាជាតិ លោកស្រី រ៉ូណា ស្មីត (Rhona Smith) បានកត់សំគាល់ថា ស្ថានភាពនយោបាយនៅកម្ពុជានៅតែតានតឹងនៅឡើយ ជាពិសេស គឺភាពតានតឹងរវាងគណបក្សប្រជាជនកម្ពុជាដែលកំពុងកាន់អំណាច និងគណបក្សសង្រ្គោះជាតិដែលជាគណបក្សប្រឆាំង។
នៅក្នុងរបាយការណ៍មួយថ្លែងទៅកាន់ក្រុមប្រឹក្សាសិទ្ធិមនុស្សអង្គការសហប្រជាជាតិលើកទី៣៦ នៅទីក្រុងសឺណែវ ប្រទេសស្វីស លោកស្រី រ៉ូណា ស្មីត បានកោតសរសើរចំពោះដំណើរការបោះឆ្នោត ឃុំ-សង្កាត់ នៅកម្ពុជា ដែលបានធ្វើឡើងកាលពីថ្ងៃទី ៤ មិថុនា ឆ្នាំ២០១៧ថា ហាក់បានធ្វើឡើងដោយសន្តិវិធីសមល្មមដែរ។ ប៉ុន្តែលោកស្រីបានកត់សំគាល់បន្ថែមថា នៅប៉ុន្មានសប្តាហ៍មុនការបោះឆ្នោត ហើយជាពិសេសនៅក្រោយការបោះឆ្នោតនោះ រដ្ឋមន្រ្តីមួយចំនួននៃរដ្ឋាភិបាលកម្ពុជា បានធ្វើសេចក្តីថ្លែងការណ៍ជាសាធារណៈដោយបានប្រើប្រាស់វោហារស័ព្ទដែលមានចរិតលក្ខណៈហិង្សា និងគំរាមកំហែង ហើយមិនតែប៉ុណ្ណោះក៏មានការកែប្រែបទប្បញ្ញត្តិមួយចំនួននៃច្បាប់ស្តីពីការបោះឆ្នោត ដែលធ្វើឲ្យប៉ះពាល់ជាអវិជ្ជមានដល់គណបក្សនយោបាយមួយចំនួន។ លោកស្រីបានថ្លែងថា “ការធ្លាក់ចុះនៃលំហប្រជាធិបតេយ្យ និងសេរីភាពក្នុងការបញ្ចេញមតិនៅកម្ពុជា គឺជាកង្វល់ដ៏ចម្បងមួយ ដោយសារតែមានអង្គការមិនមែនរដ្ឋាភិបាល និងអ្នកការពារសិទ្ធិមនុស្សជាច្រើន បានទទួលរងនូវការគំរាមកំហែង ការយាយីរំខាន ការចាប់ខ្លួន និងការឃុំខ្លួនបណ្តោះអាសន្នក្នុងរយៈពេលយូរជាដើម។ បន្ថែមលើនេះ លោកស្រី រ៉ូណា ស្មីត បានរិះគន់រដ្ឋាភិបាលទៅលើការចាប់ខ្លួនប្រធានគណបក្សសង្រ្គោះជាតិ លោក កឹម សុខា រួមទាំងតំណាងរាស្រ្តគណបក្សប្រឆាំង ដែលលោកស្រី ចាត់ទុកថា គឺជាលើកទីបួនហើយ ក្នុងរយៈពេល២ឆ្នាំមកនេះ ដែលយុទ្ធសាស្រ្តបែបនេះត្រូវបានគេប្រើប្រាស់ដើម្បីចាប់ខ្លួនអ្នកតំណាងរាស្រ្តនៅកម្ពុជា ហើយជាអ្វីដែលលោកស្រីបានដាក់ការមន្ទិលសង្ស័យពីភាពត្រឹមត្រូវនិងយុត្តិធម៌នៃការបោះឆ្នោតជាតិខាងមុខ។
ឆ្លើយតបនឹងរបាយការណ៍នេះ លោក កាតា អន អ្នកនាំពាក្យគណៈកម្មាធិការសិទ្ធិមនុស្សរដ្ឋាភិបាលកម្ពុជាបានច្រានចោលចំពោះរបាយការណ៍នេះ និងបានគាំទ្រ ការថ្លែងការពាររបស់តំណាងកម្ពុជាប្រចាំនៅអង្គការសហប្រជាជាតិ។ លោក ណី សំអុល ឯកអគ្គរាជទូតកម្ពុជាប្រចាំនៅអង្គការសហប្រជាជាតិបានចាត់ទុកការលើកឡើងរបស់លោកស្រី រ៉ូណា ស្មីត ថាលម្អៀងដែលមិនត្រឹមតែធ្វើឲ្យប៉ះពាល់ដល់ការប្តេជ្ញាចិត្តរបស់រដ្ឋាភិបាលកម្ពុជាប៉ុណ្ណោះទេ ប៉ុន្តែវាក៏បង្កឲ្យមានហានិភ័យយ៉ាងធ្ងន់ធ្ងរ ដល់ភាពជឿជាក់លើប្រព័ន្ធសិទ្ធិមនុស្សរបស់អង្គការសហប្រជាជាតិទាំងមូលផង។
ទោះជាយ៉ាងនេះក្តី លោកស្រីនៅក្នុងរបាយការណ៍របស់ខ្លួន អ្នកស្រី រ៉ូណា ស្មីត បានផ្តល់ក្តីសង្ឃឹមថា អាជ្ញាធរកម្ពុជានឹងខិតខំពង្រឹងកិច្ចការពារ និងលើកកម្ពស់សិទ្ធិមនុស្សនៅទូទាំងប្រទេសបន្ថែមទៀត ដោយលោកស្រីរំពឹងថា សេចក្តីថ្លែងការណ៍បែបហិង្សានឹងមិនមានទៀតឡើយនៅក្នុងពេលបោះឆ្នោតជាតិខាងមុខ ហើយថា សមិទ្ធិផលក្នុងកិច្ចការពារសិទ្ធិមនុស្សដែលកម្ពុជាសម្រេចបានតាំងឆ្នាំ១៩៩៣មក នឹងមិនត្រូវអន្តរាយនោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ