អង្គការអន្តរជាតិ សាទរសភាចំពោះការអនុម័ត ច្បាប់ការពារកុមារ ពីការជាប់ពន្ធនាគារ
នៅថ្ងៃទី ១មិថុនានេះ គឺជាខួបលើកទី ៦៧នៃទិវាកុមារអន្តរជាតិ! នៅក្នុងថ្ងៃនេះដែរ អង្គការដែលធ្វើការលើការការពារសិទ្ធិកុមារ នៅកម្ពុជា បានសម្តែងការសាទរចំពោះសភាជាតិ ដែលបានអនុម័តសេចក្តីព្រាងច្បាប់ស្តីពីយុត្តិធម៌អនីតិជន។ សេចក្តីព្រាងច្បាប់ស្តីពីយុត្តិធម៌អនីតិជន ដែលគេយល់ឃើញថា អាចការពារ និងរក្សាឧត្តមប្រយោជន៍របស់អនីតិជន ដែលប្រព្រឹត្តិបទល្មើស ចៀសផុតពីការជាប់ពន្ធនាគារ។
ចុះផ្សាយនៅថ្ងៃ៖
ស្តាប់ - ០២:៣៣
លោក ស្រីសម្បត្តិ សុគន្ធា អ្នកជំនួយការបច្ចេកទេសផ្នែកសិទ្ធិកុមារ នៃអង្គការភ្លេន អន្តរជាតិប្រចាំកម្ពុជា បានឲ្យដឹងថា ច្បាប់ស្តីពីយុត្តិធម៌អនីតិជន ដែលទើបត្រូវបានសភាជាតិ អនុម័ត កាលពីថ្ងៃទី ៣០ខែឧសភា ឆ្នាំ ២០១៦ កន្លងទៅថ្មីៗនេះ ពិតជាមានសារៈសំខាន់សម្រាប់បម្រើផលប្រយោជន៍របស់កុមារខ្លាំងណាស់។ តាមលោកស្រី សម្បត្តិ សុគន្ធា ប្រសិនបើច្បាប់នេះ ដាក់ឲ្យដំណើរការនៅក្នុងរយៈពេល ៦ខែខាងមុខ វាអាចការពារកុមារដែលមានទំនាស់នឹងច្បាប់ មានន័យថា ជាកុមារ ដែលបានប្រព្រឹត្តិបទល្មើស ឲ្យចៀសផុតពីការជាប់ពន្ធនាគារ ទាំងវ័យក្មេង។ តំណាងអង្គការភ្លេន រូបនេះ យល់ថា កំហុសឆ្គងរបស់កុមារ គឺកើតដោយសារតែភាពក្មេងខ្ចីរបស់ពួកគេ ដូច្នេះពួកគេ គួរតែមានឱកាសទទួលបានការអប់រំកែប្រែខ្លួន ជាជាងការប្រឈមទៅនឹងច្បាប់។
ចំណែកលោកស្រីម៉ប់ សូម៉ាយ៉ា នាយិកាអង្គការមិត្តសម្លាញ់អន្តរជាតិប្រចាំកម្ពុជា ក៏យល់ឃើញថា កុមារជាអនាគតធនធានមនុស្សដ៏សំខាន់សម្រាប់សង្គមជាតិ ដូចនេះពួកគេគួរទទួលបានការគាំទ្រ និងការអធ្យាស្រ័យ នៅពេលដែលពួកគេបានប្រព្រឹត្តិកំហុស។ លោកស្រី ចង់ឲ្យមានការបង្វែរកុមារជាជនល្មើស ពីការដាក់ពន្ធនាគារ មកជាការអប់រំ ក្រោមការគាំទ្រពីភ្នាក់ងារជំនាញផ្សេងៗវិញ។
ក្រៅពីនេះ បើតាមអង្គការអន្តរជាតិទាំងនេះ ច្បាប់នេះ ក៏អាចជួយកុមារអាក្រក់ ឲ្យក្លាយជាកុមារល្អឡើងវិញ ជួយពួកគេឲ្យចៀសវៀងពីការដាក់ទៅក្នុងបញ្ជីខ្មៅ (Blacklist) និងបញ្ចៀសការកកស្ទះក្នុងពន្ធនាគារជាដើម។
គួរជម្រាបជូនថា សេចក្តីព្រាងច្បាប់ស្តីពីយុត្តិធម៌អនីតិជន ដែលមាន ១៦ជំពូក និង ៨៩មាត្រា ត្រូវបានរៀបចំតាក់តែងតាំងពីឆ្នាំ២០០២ ដោយអនុគណៈកម្មការតាក់តែងច្បាប់របស់ក្រុមប្រឹក្សាជាតិកម្ពុជាដើម្បីកុមារ ដោយមានកិច្ចសហការ និងការរួមយោបល់ពីតំណាងក្រសួង ស្ថាប័នពាក់ព័ន្ធ ព្រមទាំងមានការជួយឧបត្ថម្ភគាំទ្រផ្នែកថវិកា និងបច្ចេកទេសពីអង្គការជាតិ និងដៃគូអភិវឌ្ឍនានា។ សេចក្តីព្រាងច្បាប់នេះ ត្រូវបានដាក់ឆ្លងកិច្ចប្រជុំផ្ទៃក្នុងនៅក្រសួងយុត្តិធម៌ ក្រសួងសង្គមកិច្ច កិច្ចប្រជុំក្រុមការងារបច្ចេកទេសអន្តរក្រសួង និងសិក្ខាសាលាពិគ្រោះយោបល់ថ្នាក់ជាតិ ជាច្រើនលើក កាលពីពេលកន្លងទៅ មុននឹងត្រូវដាក់ចូលក្នុងកិច្ចប្រជុំពេញអង្គគណៈរដ្ឋមន្រ្តី។ ក្រោយមក គណៈរដ្ឋមន្ត្រី បានសម្រេចយល់ព្រមដាក់សេចក្តីព្រាងច្បាប់នេះ ក្នុងសម័យប្រជុំពេញអង្គ កាលពីថ្ងៃទី២២ ខែមេសា ឆ្នាំ២០១៦។ បន្ទាប់មក សភាជាតិ បានដាក់សេចក្តីព្រាងច្បាប់នេះ ចូលទៅក្នុងរបៀបវារៈនៃកិច្ចប្រជុំ កាលពីថ្ងៃទី ៣០ខែឧសភា កន្លងទៅ។
គោលបំណងនៃសេចក្តីព្រាងច្បាប់នេះ គឺដើម្បីធានាការពារសិទ្ធិ និងឧត្តមប្រយោជន៍ របស់អនីតិជន ដែលប្រព្រឹត្តិបទល្មើស គាំទ្រដល់ការស្តារនីតិសម្បទា ការធ្វើសមាហរណកម្មអនីតិជន និងការពារផលប្រយោជន៍ ក្នុងសង្គម និងសហគមន៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ