មនុស្សជាង៣០០នាក់មកពីតំបន់អាស៊ី ចូលរួមសន្និបាតអ្នកស្រឡាញ់ភេទដូចគ្នានៅកម្ពុជា
មនុស្សជាង៣០០នាក់មកពីជាង៣០ប្រទេសនៅអាស៊ី នឹងចូលរួមសន្និបាតប្រចាំឆ្នាំស្ដីពីអ្នកស្រឡាញ់ភេទដូចគ្នានៅទីក្រុងភ្នំពេញ ដែលនឹងចាប់ផ្ដើមនៅថ្ងៃស្អែកនេះរហូតដល់ថ្ងៃទី៨ខែធ្នូ។ កម្មវិធីនេះរៀបចំឡើងដោយសហគមន៍ឥន្ទធនូកម្ពុជាហៅកាត់ថា ROCK ដោយមានការគាំទ្រពីស្ថាប័នរដ្ឋមួយចំនួនដូចជា៖ គណៈកម្មាធិការសិទ្ធិមនុស្សកម្ពុជា ក្រសួងវប្បធម៌ និងក្រសួងកិច្ចការនារី។
ចុះផ្សាយនៅថ្ងៃ៖
ស្តាប់ - ០២:១២
សន្និបាតប្រចាំឆ្នាំស្ដីពីសហគមន៍ស្រឡាញ់ភេទដូចគ្នា ឬហៅកាត់ថា អ៊ីលហ្គាអាស៊ីលើកទី៧នេះ បានរៀបចំជាលើកដំបូងនៅក្នុងប្រទេសកម្ពុជា ក្នុងគោលបំណងជួបជុំអ្នកជំនាញ សហគមន៍អ្នកស្រលាញ់ភេទដូចគ្នា អ្នកស្រាវជ្រាវ តំណាងរដ្ឋាភិបាល ភ្នាក់ងារអភិវឌ្ឍន៍ ជាពិសេសសមាជិករបស់អ៊ីលហ្គា ដើម្បីចែករំលែកបទពិសោធន៍ផ្លាស់ប្ដូរគំនិត រួមទាំងបញ្ហា និងដំណោះស្រាយរួមគ្នា។
បើតាមសហគមន៍ឥន្ទធនូកម្ពុជា សហគមន៍អ្នកស្រឡាញ់ភេទដូចគ្នានៅកម្ពុជាត្រូវបានបែងចែករវាង បុរសស្រឡាញ់បុរស ស្ត្រីស្រឡាញ់ស្ត្រី អ្នកស្រឡាញ់ទាំងពីរភេទ អ្នកប្ដូរយេនឌ័រ និងអ្នកមានភេទកំណើតពីរឬអន្តរភេទ។ អ្វីដែលសហគមន៍អ្នកស្រឡាញ់ភេទដូចគ្នានៅកម្ពុជាចង់បាននាពេលនេះ គឺបញ្ឈប់ការរើសអើង សិទ្ធិស្មុំកូន ការទទួលស្គាល់នៅលើឯកសារផ្លូវការ និងចង់បានអាពាពិពាហ៍ស្របច្បាប់ជាដើម។
កញ្ញា លី ពិសី ប្រធានសម្របសម្រួលរបស់សហគមន៍ឥន្ទធនូកម្ពុជាហៅកាត់ ROCKថ្លែងនៅក្នុងសន្និសីទកាសែតនៅរសៀលថ្ងៃអាទិត្យនេះថា កម្ពុជាគឺជាប្រទេសដែលសាកសមបំផុតក្នុងការទទួលស្វាគមន៍អ្នកស្រឡាញ់ភេទដូចគ្នាមកពីប្រទេសជុំវិញតំបន់អាស៊ី។ កញ្ញាបញ្ជាក់ថា មិនមែនមានតែកម្ពុជាទេ ដែលមានក្រុមអ្នកស្រឡាញ់ដូចគ្នានោះប្រទេសដទៃក៏មានដែរ។ ដូច្នេះ អ្នកស្រឡាញ់ភេទដូចគ្នានៅកម្ពុជាមិនឯកាឡើយ។ នេះបើតាមកញ្ញា លី ពិសី។
សូមបញ្ជាក់ថា សន្និបាតស្ដីពីក្រុមអ្នកស្រឡាញ់ភេទដូចគ្នានេះ បានរៀបចំឡើង៦លើករួចមកហើយ នៅទីក្រុងនៃប្រទេសផ្សេងៗគ្នារួមមាន៖ ទីក្រុងម៉ុមបាយ សេប៊ូ ឈៀងម៉ៃ ស៊ូរ៉ាប៉ាយ៉ា បាងកក និងថ្មីៗនេះនៅតៃប៉ិ។ បច្ចុប្បន្នបើតាមទិន្នន័យចងក្រងដោយសហគមន៍ឥន្ទធនូ សហគមន៍អ្នកស្រឡាញ់ភេទដូចគ្នាដែលហ៊ានបញ្ចេញអត្តសញ្ញាណមានចំនួន១០០០នាក់ គិតចាប់តាំងឆ្នាំ២០០៩ដល់សព្វថ្ងៃ ខណៈមជ្ឈមណ្ឌលសិទ្ធិមនុស្សកម្ពុជា CCHR ធ្លាប់ប៉ាន់ប្រមាណថា ចំនួនអ្នកស្រឡាញ់ភេទដូចគ្នានៅកម្ពុជា អាចមានរហូតដល់ទៅ១០ភាគរយ នៃចំនួនប្រជាជនសរុប ពោលគឺប្រមាណ១លាននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ