លោកស្រី រ៉ូណា ស្មីត នឹងរាយការណ៍សំណុំរឿងសកម្មជនបឹងកក់ទៅ អ.ស.ប
អ្នករាយការណ៍ពិសេសអង្គការសហប្រជាជាតិ កាលពីព្រលប់ថ្ងៃទី១៥ សីហា បានទៅចូលរួមក្នុងកម្មវិធីប្រារព្ធខួបជាប់ពន្ធនាគារមួយឆ្នាំរបស់សកម្មជនសហគមន៍បឹងកក់អ្នកស្រី ទេព វន្នី។ វត្ដមាននៅក្នុងកម្មវិធីនោះ លោកស្រីរ៉ូណា ស្មីត បានជួបកូនៗរបស់អ្នកស្រី ទេព វន្នី និងស្ដាប់ការរាយការណ៍របស់ប្រជាជនរងគ្រោះដីធ្លីក្នុងសហគមន៍បឹងកក់អំពីការឃុំខ្លួនតំណាងរបស់ពួកគេ។ ជាការឆ្លើយតប អ្នករាយការណ៍ពិសេសអង្គការសហប្រជាជាតិ បានសន្យាថា នឹងលើកយករឿងនេះរាយការណ៍ទៅអង្គការសហប្រជាជាតិនៅពេលខាងមុខ។
ចុះផ្សាយនៅថ្ងៃ៖
ស្តាប់ - ០២:៣១
ក្នុងតំបន់បឹងកក់កាលពីល្ងាច ថ្ងៃទី ១៥ សីហា ប្រជាជនរងគ្រោះក្នុងសហគមន៍បឹងកក់បានរៀបចំពិធីតាំងរូបតំណាងរបស់ពួកគេយ៉ាងធំ ព្រមទាំងមានការដុតទាន ចាក់បទចំរៀងឈឺចាប់ និងការបួងសួងអំពាវនាវសុំឲ្យមានការដោះលែងអ្នកស្រី ទេព វន្នី ចេញពីពន្ធនាគារព្រៃសវិញ។
កម្មវិធីកំពុងតែដំណើរការស្រាប់តែលេចចេញវត្តមានគួរឲ្យភ្ញាក់ផ្អើលរបស់លោកស្រី រ៉ូណា ស្មីត អ្នករាយការណ៍ពិសេសអង្គការសហប្រជាជាតិ ដែលកំពុងបំពេញទស្សនៈកិច្ចនៅកម្ពុជា នៅក្នុងកម្មវិធីនោះដែរ។
ក្រោយពេលបានជួបផ្ទាល់នូវកូនៗរបស់អ្នកស្រី ទេព វន្នី សកម្មជនលេចធ្លោកំពុងជាប់ឃុំនៅព្រៃស និងស្ដាប់ការរាយការណ៍របស់តំណាងប្រជាជនសហគមន៍បឹងកក់អំពីដំណើរដើមទងនៃការចាប់ខ្លួន ទេព វន្នី រួចមក លោកស្រី រ៉ូណា ស្មីត បានថ្លែងថា លោកស្រីនឹងលើកយកករណីអ្នកស្រី ទេព វន្នី រាយការណ៍ទៅដល់គណៈកម្មការសិទ្ធិមនុស្សរបស់អង្គការសហប្រជាជាតិ នៅពេលខាងមុខ។
លោកស្រី រ៉ូណា ស្មីត ថ្លែងបន្ដថា វត្តមានរបស់លោកស្រីក្នុងពិធីនេះ គឺជាការរំលឹកដល់ការជាប់ពន្ធនាគាររបស់អ្នកស្រី ទេព វន្នី និង មន្ត្រីសិទ្ធិមនុស្សផ្សេងៗទៀត ដែលលោកស្រីថា ទទួលរងការរំលោភសិទ្ធិមនុស្ស។ បើតាមអ្នករាយការណ៍ពិសេសអង្គការសហប្រជាជាតិរូបនេះដដែល លោកស្រីបានបន្ដតាមដានករណីអ្នកស្រី ទេព វន្នី យ៉ាងដិតដល់បំផុត។
លោកស្រី រ៉ូណា ស្មីត បានបន្ថែមទៀតថា កន្លងមក លោកស្រីក៏ធ្លាប់រាយការណ៍ករណីរបស់ អ្នកស្រី ទេព វន្នី និងបញ្ហាតំបន់បឹងកក់ ទៅក្រុមប្រឹក្សាសិទ្ធិមនុស្សអង្គការសហប្រជាជាតិ ផងដែរ។
ក្រៅពីបានចូលរួមក្នុងកម្មវិធីគម្រប់មួយឆ្នាំនៃការឃុំខ្លួននោះ តំណាងអង្គការសហប្រជាជាតិរូបនេះ ក៏បញ្ជាក់ដែរថា ក្នុងថ្ងៃដដែលនេះ លោកស្រីក៏បានទៅសួរសុខទុក្ខអ្នកស្រី ទេព វន្នី នៅក្នុងពន្ធនាគារព្រៃសដែរ ដោយអ្នកស្រី ទេព វន្នី បានប្រាប់គាត់ថា គាត់នឹកកូនដែលគ្មានអ្នកណាមើលថែ។
គួររម្លឹកថា អ្នកស្រីទេព វន្នី សកម្មជនដីធ្លីដ៏លេចធ្លោរបស់តំបន់បឹងកក់ ត្រូវបានអាជ្ញាធរកម្ពុជាចាប់ខ្លួនកាលពីថ្ងៃទី១៥ ខែសីហា ឆ្នាំ២០១៦ នៅអំឡុងពេលដែលអ្នកស្រី និងសកម្មជនដីធ្លីផ្សេងទៀតបានចូលរួមធ្វើយុទ្ធនាការថ្ងៃចន្ទពណ៌ខ្មៅ ដើម្បីទាមទារឲ្យដោះលែងអ្នកការពារសិទ្ធិមនុស្សអាដហុក និងអគ្គលេខាធិការរងគ.ជ.ប។ កាលពីថ្ងៃទី២៣ ខែកុម្ភៈ ឆ្នាំ២០១៧ កន្លងទៅ អ្នកស្រីទេព វន្នី ត្រូវបានសាលាដំបូងរាជធានីភ្នំពេញផ្តន្ទាទោសដាក់ពន្ធនាគាររយៈពេល២ឆ្នាំ៦ខែពីបទហិង្សាដោយចេតនាមានស្ថានទម្ងន់ទោសដែលប្រព្រឹត្តទៅនៅក្បែរផ្ទះលោកនាយករដ្ឋមន្ត្រីហ៊ុន សែន កាលពីឆ្នាំ២០១៣ បន្ថែមពីលើបទចោទដទៃទៀត។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ