ទស្សនកិច្ចថ្ងៃទី១៖ សង្គមស៊ីវិលប្រាប់លោកស្រីរ៉ូណា ស្មីតពីការបន្តរឹតត្បិតសិទ្ធិសេរីភាពជួបជុំនៅកម្ពុជា
នៅថ្ងៃចន្ទ ទី២៩ ខែមេសានេះ លោកស្រីរ៉ូណា ស្មីត អ្នករាយការណ៍ពិសេសអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជាបានចាប់ផ្តើមធ្វើទស្សនកិច្ចជាផ្លូវការដោយផ្តោតសំខាន់ទៅលើស្ថានភាពសិទ្ធិមនុស្សនាពេលបច្ចុប្បន្ន។ នៅថ្ងៃទីមួយនៃដំណើរទស្សនកិច្ចនេះ លោកស្រីរ៉ូណា ស្មីតបានជួបជាមួយក្រុមអង្គការសង្គមស៊ីវិល។ ក្រុមអង្គការសង្គមស៊ីវិល បានរាយការណ៍ប្រាប់លោកស្រីរ៉ូណា ស្មីតពីបញ្ហារឹតត្បិតសិទ្ធិសេរីភាពដែលនៅតែបន្តកើតមាននៅកម្ពុជា។
ចុះផ្សាយនៅថ្ងៃ៖
លោកនី សុខា ប្រធានផ្នែកស៊ើបអង្កេតសិទ្ធិមនុស្ស និង ដីធ្លីនៃសមាគមការពារសិទ្ធិមនុស្សអាដហុក បានអះអាងប្រាប់វិទ្យុបារាំងអន្តរជាតិនៅព្រឹកថ្ងៃចន្ទនេះថា នៅក្នុងជំនួបជាថ្មីជាមួយលោកស្រីរ៉ូណា ស្មីត ក្រុមអង្គការសង្គមស៊ីវិលប្រមាណជា១០ បានរាយការណ៍ប្រាប់លោកស្រីពីបញ្ហាចម្បងៗពាក់ព័ន្ធនឹងសិទ្ធិសេរីភាពនៅកម្ពុជា។ ទីមួយ ពួកគេបានប្រាប់លោកស្រីរ៉ូណា ស្មីតពីការព្រួយបារម្ភរបស់ពួកគេចំពោះការរឹតត្បិតសេរីភាពនៃការជួបជុំនៅតាមមូលដ្ឋាន។ បើតាមលោកនី សុខា បើទោះបីក្រសួងមហាផ្ទៃបានប្រកាសបើកទូលាយដល់ការជួបជុំរបស់អង្គការសង្គមស៊ីវិលក៏ដោយ ក៏ការជួបជុំនៅតែស្ថិតក្រោមការឃ្លាំមើលពីអាជ្ញាធរដែលខ្លះស្លៀកពាក់ជាស៊ីវិលក៏មានដែរ។
ទីពីរ ក្រុមអង្គការសង្គមស៊ីវិលបានលើកឡើងពីបញ្ហាក្រុមអតីតគណបក្សប្រឆាំង ជាពិសេស អ្នកនៅតាមមូលដ្ឋាន គឺនៅតែស្ថិតក្រោមការតាមដានពីអាជ្ញាធរ គ្មានសេរីភាពក្នុងការជួបជុំបញ្ចេញមតិ និង ខ្លះទៀតរងការធ្វើទុក្ខបុកម្នេញថែមទៀត។ ទីបី ក្រុមអង្គការសង្គមស៊ីវិលក៏បានរាយការណ៍ប្រាប់លោកស្រីរ៉ូណា ស្មីត ពីការរឹតត្បិតលំហសេរីភាពនៃការបញ្ចេញមតិ និង រិះគន់ទៅលើរដ្ឋាភិបាល។ លោកនី សុខា បានគូសបញ្ជាក់ថា អ្នករិះគន់មួយចំនួនត្រូវបានចាប់ខ្លួនដោយសារតែការបញ្ចេញមតិ និងរិះគន់ប្រមុខរដ្ឋាភិបាលកម្ពុជា។ សម្រាប់សកម្មជនការពារសិទ្ធិមនុស្សរូបនេះ ទាំងអស់នេះ ធ្វើឱ្យមានភាពភ័យខ្លាចក្នុងការបញ្ចេញមតិ និងរិះគន់លើបញ្ហាអ្វីមួយ។
ចំពោះបញ្ហាទាំងអស់នេះ លោកស្រីរ៉ូណា ស្មីត មិនបានឆ្លើយតបយ៉ាងណានោះទេ ដោយលោកស្រីគ្រាន់តែកត់ត្រាទុកតែប៉ុណ្ណោះ។ ទោះជាបែបនេះក្តី ក្រុមអង្គការសង្គមស៊ីវិល បានស្នើឱ្យលោកស្រីរ៉ូណា ស្មីត លើកយកបញ្ហាទាំងអស់នេះទៅជជែកជាមួយមន្រ្តីជាន់ខ្ពស់របស់រដ្ឋាភិបាលកម្ពុជាដែលលោកស្រីគ្រោងនឹងជួបនាពេលខាងមុខ។ តាមគម្រោង នៅថ្ងៃទី៣០ ខែមេសាស្អែកនេះ លោកស្រីរ៉ូណា ស្មីត នឹងជួបពិភាក្សាអំពីបញ្ហាសិទ្ធិមនុស្សនៅកម្ពុជាជាមួយលោកកែវ រ៉េមី ប្រធានគណៈកម្មាធិការសិទ្ធិមនុស្សកម្ពុជា។
សូមបញ្ជាក់ថា អ្នករាយការណ៍ពិសេសអង្គការសហប្រជាជាតិទទួលបន្ទុកសិទ្ធិមនុស្សប្រចាំនៅកម្ពុជា លោកស្រី រ៉ូណា ស្មីត នឹងស្នាក់នៅកម្ពុជារយៈពេល១១ថ្ងៃចាប់ពីថ្ងៃទី ២៩ មេសា ដល់ថ្ងៃទី ០៩ ខែឧសភា។ បេសកកម្មរបស់លោកស្រីនៅកម្ពុជាលើកនេះ គឺ ផ្តោតសំខាន់ទៅលើស្ថានភាពសិទ្ធិមនុស្សនាពេលបច្ចុប្បន្ន ក៏ដូចជាពិនិត្យទៅលើវិស័យសិទិ្ធមនុស្សទាក់ទងនឹងគោលដៅអភិវឌ្ឍន៍ប្រកបដោយចីរភាព។ លោកស្រីគ្រោងនឹងជួបជាមួយមន្រ្តីជាន់ខ្ពស់របស់រដ្ឋាភិបាលកម្ពុជា និងសមាជិកសហគមន៍ការទូតនានា ក្រោយពីជួបជាមួយក្រុមអង្គការសង្គមស៊ីវិល។ ប៉ុន្តែលើកដូចនេះក៏ដូចលើកមុនដែរ លោកស្រីរ៉ូណា ស្មីត បានបរាជ័យក្នុងការស្នើសុំជួបជាមួយលោកកឹម សុខា ប្រធានអតីតគណបក្សសង្រ្គោះជាតិដែលកំពុងជាប់ឃុំនៅក្នុងផ្ទះរបស់លោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ