សាលារចនាថ្មី នឹងចាប់ផ្តើមការសាងសង់នៅដើមខែមេសា
សាលារចនា ឬដើមឡើយហៅថា សាលាសិល្បៈខេមរ ត្រូវបានបង្កើតឡើងតាំងពីឆ្នាំ ១៩១៧ នៅក្នុងរជ្ជកាលរបស់ ព្រះករុណា ព្រះបាទ ស៊ីសុវត្ថិ ដោយមានការជ្រុមជ្រែងពី លោក George Groslier អតីតអភិបាលបារាំងប្រចាំឥណ្ឌូចិន។ សាលារចនា កាលពីពេលថ្មីៗនេះ ទើបតែបានរៀបចំខួបគម្រប់ ១០០ ឆ្នាំ នៃការបង្កើតរបស់ខ្លួន ហើយនៅដើមខែមេសាខាងមុខនេះ សាលានេះ នឹង ក្លាយជាសារៈមន្ទីរជាតិ។ ចំណែកអគារសាលារចនាថ្មី នឹងត្រូវសាងសង់លើផ្ទៃដីប្រមាណ ៤ហិកតា នៅតំបន់អភិវឌ្ឍន៍ជ្រោយចង្វា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
សាកលវិទ្យាល័យភូមិន្ទវិចិត្រសិល្បៈ ស្ថិតនៅភាគខាងជើងព្រះបរមរាជវាំង និងនៅខាងលិចនៃវាលព្រះសុមេរុ ដែលមានសារមន្ទីរសាងបន្តនៅជាប់ពីខាងកើតនៃសាលានេះ។ ទាំងសាលារចនា និង សារមន្ទីរជាតិ មានទំនាក់ទំនងគ្នាយ៉ាងជិតស្និត ខាងវិស័យសិល្បៈខ្មែរបុរាណនិងសិល្បៈខ្មែរសម័យថ្មី។ រីឯគ្រូបង្ហាត់នៅសាលារចនានេះ ទៀតសោត បានមកពីក្រុមសិល្បករនៃព្រះបរមរាជវាំងជាច្រើន រួមជាមួយនឹងសិល្បករចំណានៗ ដែលអញ្ជើញពីទីផ្សេងៗ ទាំងខាងរោងជាងកិច្ចការរចនា ទាំងខាងរបាំព្រះរាជ្យទ្រព្យ និង ក្រុមភ្លេងជាដើម។
សាលារចនា មានមហាវិទ្យាល័យធំៗចំនួនប្រាំ គឺមហាវិទ្យាល័យសូនរូប នាដសាស្រ្ត តូរ្យតន្រ្តី ស្ថាបត្យកម្មនិងនគរោបនីយវិទ្យា និង មហាវិទ្យាល័យបុរាណវិទ្យា។ ការបង្កើតសាលារចនា ឬ សាកលវិទ្យាល័យភូមិន្ទវិចិត្រសិល្បៈ នេះឡើង គឺជាគំនិតផ្តួចផ្តើម របស់ព្រះបាទសម្តេចព្រះស៊ីសុវត្ថិ ដោយមាន លោក George Groslier ជាអ្នករៀបចំ។ លោក ជាបញ្ញាវ័ន្ត ជនជាតិបារាំង ដែលបានចំណាយពេលស្ទើរតែពេញមួយជីវិតរបស់លោក ដើម្បីសិល្បៈវប្បធម៌ខ្មែរ។
នៅសម័យអាណានិគមបារាំង សាលារចនានៅតែចូលរួមយ៉ាងសកម្ម តាំងពីការងារសាងសង់រូបប្រាសាទអង្គរ បាយ័ន ចម្លងរូបក្បាច់រចនា ផ្ទាំងចម្លាក់ បដិមា និង ការសម្តែងសិល្បៈផ្សេងៗ។ នៅក្នុងសម័យសង្គមរាស្រ្តនិយម សាលារចនា ដែលត្រូវបានកសាងតំណាលគ្នានឹងសារមន្ទីរជាតិកម្ពុជាក្នុងឆ្នាំ១៩១៧ ត្រូវបានប្រែក្លាយជាសាកលវិទ្យាល័យភូមិន្ទវិចិត្រសិល្បៈនៅឆ្នាំ១៩៦៥ ក្រោមព្រះរាជកិច្ចដឹកនាំរបស់ព្រះបរមរតនកោដ្ឋ នរោត្តម សីហនុ។ ដោយឡែក នៅសម័យខ្មែរក្រហម សាលារចនា ត្រូវបានបិទទ្វារលែងដំណើការទាំងស្រុង។ យ៉ាងណាមិញ ក្រោយរបបខ្មែរក្រហមដួលរលំ ដោយសារកិច្ចខិតខំប្រឹងប្រែងរបស់សាស្រ្តាចារ្យ សាលានេះ ក៏អាចបន្តដង្ហើមរស់ឡើងវិញ។ ចាប់តាំងពីពេលនោះមក សាលារចនា បានអប់រំបណ្តុះបណ្តាលវិស័យសិល្បៈគ្រប់ផ្នែក និង ការងារស្រាវជ្រាវជាច្រើនរហូតមកដល់បច្ចុប្បន្ន។ ចន្លោះឆ្នាំ ២០១៣ ដល់ឆ្នាំ ២០១៥ មក អគារខ្លះក៏ចាប់ផ្តើមកែលម្អ និង ពង្រីកបន្ថែមតាមទម្រង់រចនាប័ទ្មចាស់ជាបណ្តើរៗ។
កាលពីពេលថ្មីៗនេះ រដ្ឋាភិបាល បានប្រកាសប្តូរទីតាំងសកលវិទ្យាល័យភូមិន្ទវិចិត្រសិល្បៈ ។ ការសាងសង់សាលារចនាថ្មី នឹងបើកការដ្ឋានសាងសង់ នៅថ្ងៃទី២ ខែមសា ខាងមុខ និង គ្រោងចំណាយថវិកាប្រមាណ ១២លានដុល្លារ សង់នៅលើផ្ទៃដីប្រមាណ ៤ហិកតា នៅតំបន់ជ្រោយចង្វារ។ គម្រោងនេះនឹង រួចរាល់ក្នុងរយៈពេល៣ឆ្នាំ ដើម្បីពង្រឹង និងពង្រីក គុណភាពអប់រំផ្នែកវប្បធម៌ និងវិចិត្រសិល្បៈកម្ពុជា ឲ្យកាន់តែល្អប្រសើរ។ ទោះបីជាមានការផ្លាស់ប្តូរទីតាំងយ៉ាងណាក៏ដោយ រដ្ឋមន្រ្តីក្រសួងវប្បធម៌ បានអះអាងថា អគារសាកលវិទ្យាល័យថ្មី នឹងនៅតែរក្សារចនាប័ទ្ម រក្សាអត្តសញ្ញាណវប្បធម៌ និងទម្រង់បែបបទរបស់ខ្មែរដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ