«ឆ្នេរស្អាត បរិស្ថានស្រស់បំព្រង សេវាកម្មល្អ» គ្មានន័យទេប្រសិនបើគ្មាន «សុវត្ថិភាព»
ចុះផ្សាយនៅថ្ងៃ៖
ស្តាប់ - ០៤:៥៦
គ្រាន់តែខេត្តព្រះសីហនុមួយ ចំនួនអ្នកស្លាប់ដោយសារលង់ទឹកគិតដោយត្រួសៗ មានប្រមាណជា១០នាក់ទៅហើយ ក្នុងរយៈត្រឹមតែ៨ខែប៉ុណ្ណោះ។ គេអាចប៉ាន់ប្រមាណថាមានច្រើនជាងនេះ ប្រសិនបើគិតពីគ្រោះថ្នាក់ដោយសារងូតទឹកលេងនៅតំបន់ទេសចរណ៍មាត់សមុទ្រនៃខេត្តដទៃទៀត និងតំបន់រមនីយដ្ឋានទឹកសាបនៅទូទាំងប្រទេសផងដែរ។ បញ្ហានេះចាំបាច់ត្រូវតែមានការដោះស្រាយ ដើម្បីសក្តិសមកេរ្តិ៍ឈ្មោះជាព្រះរាជាណាចក្រ ដែលមានឆ្នេរស្អាតជាងគេលើពិភពលោក។
តាមរយៈតួលេខខាងលើ បង្ហាញថាសុវត្ថិភាពនៅកន្លែងកំសាន្ត ជាពិសេសនៅតំបន់ទេសចរណ៍ឆ្នេរសមុទ្រ ត្រូវបានគេកត់សម្គាល់ថាមានភាពផុយស្រួយ និងនៅតែមានការព្រួយបារម្ភជាប់ជានិច្ចពីសំណាក់អ្នកទេសចរជាតិ និងអន្តរជាតិ ដែលទៅងូតទឹកលេងនៅទីនោះ។
មានហេតុផលចំបងៗមួយចំនួន ដែលធ្វើឲ្យហេតុការណ៍គ្រោះថ្នាក់ដោយសារលង់ទឹកកើតមានឡើង ដដែលៗ ជាអ្វីដែលគេនឹកស្មានដល់ ហើយមិនឃើញមានចំណាត់ការការពារជាមុនណាមួយគួរឲ្យកក់សម្គាល់ឡើយ។ បើនិយាយជាទូទៅ មិនត្រឹមតែការកំសាន្តដោយងូតទឹកសមុទ្រតែមួយមុខប៉ុណ្ណោះទេ គឺតំបន់ទេសចរណ៍ទឹកសាប និងទឹកជ្រោះជាច្រើនទៀត កម្រនឹងមានការត្រៀមលក្ខណៈបង្ការទុកជាមុននូវមូលដ្ឋានជួយសង្គ្រោះ អ្នកលង់ទឹកណាស់។ ជាការពិតការបង្កើតឲ្យមានឆ្មាំសមុទ្រ សម្រាប់ជួយសង្គ្រោះអ្នកលង់ទឹកនៅតំបន់ទេសចរណ៍កន្លងមក តំបន់ខ្លះក៏មាន ហើយតំបន់ខ្លះក៏មិនមាន។
ដោយឡែកតំបន់ដែលមានឆ្មាំសមុទ្រ ក៏មានមិនគ្រប់គ្រាន់សម្រាប់ឆ្លើយតបទៅនឹងបរិមាណភ្ញៀវទេសចរ ដែលទៅកំសាន្តដូចជាតាមឆ្នេរកម្សាន្ត នានានៅខេត្តព្រះសីហនុជាឧទាហណ៍។ មើលទៅលើសម្ភារៈ បរិក្ខា សម្រាប់សង្គ្រោះវិញក៏មិនបានគ្រប់គ្រាន់នោះដែរ។ ហើយភ្នាក់ងារជួយសង្គ្រោះ មួយចំនួននៅមិនទាន់យល់ដឹងពីវិធី និងបច្ចេកទេសនៃការសង្គ្រោះបន្ទាន់ ឬសង្គ្រោះបឋមបានច្បាស់លាស់នៅឡើយ។
សរុបមក ប្រសិនបើអាជ្ញាធរខ្មែរ មិនមានវិធានការច្បាស់លាស់ទាក់ទងទៅនឹងការបង្ការ និងទប់ស្កាត់ហានិភ័យ ដែលអាចកើតមានឡើងបន្ថែមទៀតលើការកំសាន្តដោយការងូតទឹកសមុទ្រនេះ ឲ្យបានជាក់លាក់ទេ នោះសោកនាដកម្មនៃការបាត់បង់សាច់ញាតិគ្រួសារ នៅកន្លែងកំសាន្តសប្បាយនឹងក្លាយទៅជាទុក្ខបន្តទៀត។
កាលពីពេលថ្មីៗនេះ រូបភាពវីដេអូឃ្លីបពីឆ្នេរសមុទ្រអូឈើទាល នៃខេត្តព្រះសីហនុជុំវិញការបាត់បង់សមាជិកគ្រួសារមានស្ថានភាពសង្វេគមែនទែន។ តាមរយៈរូបភាព និងការផ្សាយពីដំណឹងនេះ ចង់មិនចង់បានជះឥទ្ធិពលទៅដល់ទេសចរជាតិនិងអន្តរជាតិ នៅក្នុងមូលដ្ឋានពិចារណាមួយ ចោទសួរថា តើកន្លែងកម្សាន្តឆ្នេរសមុទ្រកម្ពុជា មានសុវត្ថិភាពកម្រិតណា?
គ្រាន់តែសំណួរនេះមួយ អាចធ្វើឲ្យព្រួយតគ្នា ជាសេរី ពីសង្វាក់សេវាកម្មផ្សេងៗទៀតដូចជាផ្នែកដឹកជញ្ជូនទេសចរណ៍ អាជីវកម្មវត្ថុអនុស្សាវរីយ៍ ដែលទទួលចំណូលពីភ្ញៀវទេសចរ សេវាកម្មស្នាក់នៅនិងភោជនីយដ្ឋានជាដើម។
ដើម្បីឆ្លើយតបទៅនឹងកង្វល់ទាំងនេះ អាជ្ញាធរនិងផ្នែកពាក់ព័ន្ធខាងសេវាកម្មទេសចរណ៍គួរបង្កើតយន្តការការពារ និងទប់ស្កាត់ជាមុន ដោយក្នុងនោះត្រូវមានភ្នាក់ងារឬឆ្មាំសមុទ្រគ្រប់គ្រាន់ និងគ្រប់កន្លែងកម្សាន្តមិនថាឆ្នេរសមុទ្រ តំបន់កម្សាន្តទឹកសាប ឬទឹកជ្រោះនោះទេ។ សម្ភារៈសង្គ្រោះ និងការឃ្លាំមើលជាប់ជានិច្ច ត្រូវតែមានសកម្មភាពជាប់លាប់ និងប្រុងប្រយ័ត្ន។ ផ្តល់ការហ្វឹកហាត់ និងបំពាក់បំប៉នជំនាញដល់ភ្នាក់ងារជួយសង្គ្រោះ និងវិធីសង្គ្រោះបឋម ឲ្យបានគ្រប់គ្នា។ ជារួមប្រសិនបើមិនមានការបង្ការទុកជាមុន និងការដាក់វេនគ្នាប្រចាំការរបស់ឆ្នាំសមុទ្រទេ ពិតជាមិនអាចជួយសង្គ្រោះទាន់ទេ ប្រសិនបើមានករណីគ្រោះថ្នាក់លង់ទឹកសមុទ្រ។
ឆ្នាំសមុទ្រ ឬភ្នាក់ងារសង្គ្រោះភ្ញៀវទេសចរណ៍តាមតំបន់កម្សាន្តឯទៀត ចាំបាច់ត្រូវតែមានការទំនុកបំរុង និងឧបត្ថម្ភថវិកាឲ្យបានគ្រប់គ្រាន់ ដែលថវិកានេះគួរតែទទួលបានពីចំណូលទេសចរណ៍ ដែលជាផ្នែកមួយនៃចំណូលដ៏សំខាន់របស់ជាតិ ឬផ្តល់ដោយមូលដ្ឋានដោយផ្ទាល់។ មួយវិញទៀត ស្លាកសញ្ញាផ្សេងៗ និងការណែនាំត្រូវតែមានដាច់ខាត ដូចជាតំបន់ទឹកជ្រៅ តំបន់ហាមលេងទឹក តំបន់គ្រោះថ្នាក់ តំបន់ដែលមានបរិស្ថានមិនល្អ។ល។ ការលើកឡើងដូច្នេះ ក៏ព្រោះតែកន្លងមកដ៏ដូចជាពេលថ្មីៗនេះ នៅតែមានអ្នកគ្រោះថ្នាក់ដោយសារតែអន្លង់ទឹកជ្រៅ បណ្តាលមកពីការបង្ហូរទឹកកខ្វក់ពីផ្នែកខាងលើចូលទៅសមុទ្រ រុញឲ្យស្រុតខ្សាច់ ជាពិសេសនៅតំបន់ឆ្នេរអូត្រេះ។
ដូច្នេះដើម្បី ឆ្លើយតបទៅនឹងការផ្តល់ពិន្ទុពីអន្តរជាតិ ថាឆ្នេរសមុទ្រកម្ពុជាជាឆ្នេរសមុទ្រស្អាតជាងគេនោះ ត្រឹមតែភាពស្អាតមិនគ្រប់គ្រាន់ទេ គប្បីម្ចាស់ឆ្នេរត្រូវតែមានសេវាកម្មរួមផ្សំជាច្រើនទៀតដូចដែលបានរៀបរាប់ខាងលើ ធ្វើយ៉ាងម៉េចឲ្យគេលាន់មាត់ថា«ឆ្នេរក៏ស្អាត សេវាកម្មក៏ល្អ សុវត្ថិភាពខ្ពស់» នោះទើបជាការល្អ និងជាមោទនភាពពិតប្រាកដរបស់កម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ