លោកអេង ឆៃអ៊ាង៖ ២២មិថុនា១៩៩៥ គឺជាថ្ងៃចាប់ផ្តើមការតស៊ូនយោបាយរបស់លោកសម រង្ស៊ី
លោក សម រង្ស៊ី អតីតប្រធានគណបក្សសង្រ្គោះជាតិ ត្រូវបានគេបណ្តេញចេញពីរដ្ឋសភាកម្ពុជាចំនួន៤លើក ក្នុងរយៈពេលជាង២០ឆ្នាំនៃការតស៊ូនយោបាយរបស់លោកនៅកម្ពុជា។ នៅថ្ងៃនេះ កាលពីឆ្នាំ១៩៩៥ លោក សម រង្ស៊ី ត្រូវបានគេបណ្តេញចេញពីរដ្ឋសភាជាលើកដំបូង ក្នុងនាមជាតំណាងរាស្រ្តជាប់ឆ្នោតរបស់គណបក្សហ្វ៊ុនស៊ិនប៉ិច។ ប៉ុន្តែបើតាមការបញ្ជាក់ពីមន្រ្តីជំនិតរបស់លោក សម រង្ស៊ី ថា ថ្ងៃទី២២ខែមិថុនានេះ ក្រៅពីការបណ្តេញលោក សម រង្ស៊ី ចេញពីរដ្ឋសភាដោយខុសច្បាប់ហើយ ក៏ជាថ្ងៃនៃការចាប់ផ្តើមតស៊ូនយោបាយរបស់លោក សម រង្ស៊ី ដើម្បីឲ្យមានការផ្លាស់ប្តូរផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
“ថ្ងៃទី២២ ខែមិថុនា ឆ្នាំ១៩៩៥ គឺជាថ្ងៃដែលរដ្ឋសភាខ្មែរបណ្តេញលោក សម រង្ស៊ី ចេញពីសមាជិករដ្ឋសភាដោយខុសច្បាប់ ហើយក៏ជាថ្ងៃចាប់ផ្តើមនៃការតស៊ូនយោបាយអហិង្សា ដើម្បីឲ្យមានការផ្លាស់ប្តូរនៅកម្ពុជា” នេះគឺជាការរំលឹករបស់លោក អេង ឆៃអ៊ាង មន្រ្តីជំនិតរបស់លោក សម រង្ស៊ី នៅថ្ងៃទី២២ មិថុនា ឆ្នាំ២០១៧នេះ។
លោក អេង ឆៃអ៊ាង ដែលបច្ចុប្បន្នមានតួនាទីជាអនុប្រធានគណបក្សសង្រ្គោះជាតិ និងជាមនុស្សដ៏គួរឲ្យទុកចិត្តរបស់លោក សម រង្ស៊ី បានសរសេរនៅលើគណនេយ្យហ្វេសបុករបស់លោកនៅថ្ងៃនេះថា ប៉ុន្តែបីឆ្នាំក្រោយការបណ្តេញចេញនោះ គឺនៅឆ្នាំ១៩៩៨ក្នុងអាណត្តិទី២ លោក សម រង្ស៊ី បានត្រលប់មកវិញជាមួយនឹងមនុស្សចំនួន១៥រូប ចូលទៅអង្គុយកៅអីរដ្ឋសភា។ លោក អេង ឆៃអ៊ាង ដែលបានបង្ហោះសារនេះ អមដោយវីដេអូឃ្លីបប្រមាណជិត៣នាទី ស្តីពីព្រឹត្តិការណ៍បណ្តេញលោក សម រង្ស៊ី ចេញពីសមាជិករដ្ឋសភាកាលណោះ លោក សម រង្ស៊ី បានផ្តល់បទសម្ភាសន៍ដល់អ្នកកាសែតដោយបានប្តេជ្ញាចិត្តថា “លោកនឹងវិលត្រលប់មកកាន់ទីនេះម្តងទៀត”។
លោក អេង ឆៃអ៊ាង ដែលបានសរសេរនៅលើគណនេយ្យហ្វេសបុករបស់លោកថា កាលណោះ គឺជាការចាប់ផ្តើមនៃការតស៊ូនយោបាយដោយអហិង្សារបស់លោក សម រង្ស៊ី ដើម្បីឲ្យមានការផ្លាស់ប្តូរនៅកម្ពុជា។ ពោលគឺ នៅឆ្នាំ១៩៩៨ គណបក្សប្រឆាំងបានអាសនៈរដ្ឋសភាចំនួន១៥កៅអី បន្តមកនៅឆ្នាំ២០០៣ បានកើនដល់២៤កៅអី, ឆ្នាំ២០០៨កើនដល់២៦កៅអី និងចុងក្រោយកាលពីឆ្នាំ២០១៣ កើនដល់៥៥កៅអី។
គួរជំរាបជូនថា ក្នុងរយៈពេល២២ឆ្នាំមកនេះ លោក សម រង្ស៊ី ត្រូវគេបណ្តេញចេញពីរដ្ឋសភាកម្ពុជាចំនួន៤លើករួចមកហើយ គឺនៅឆ្នាំ១៩៩៥, ឆ្នាំ២០០៥, ឆ្នាំ២០១១, និងឆ្នាំ២០១៥។ នៅមុននេះ លោក សម រង្ស៊ី ដែលកំពុងស្ថិតនៅឯសហរដ្ឋអាមេរិក បានប្រកាសពីបំណងចង់វិលត្រលប់មកកាន់ប្រទេសកម្ពុជាម្តងទៀត ដើម្បីចូលរួមប្រកួតប្រជែងតំណែងនាយករដ្ឋមន្រ្តីជាមួយលោក ហ៊ុន សែន នៅឆ្នាំ២០១៨ខាងមុខ។ ប៉ុន្តែរដ្ឋាភិបាលរបស់លោកនាយករដ្ឋមន្រ្តី ហ៊ុន សែន បានប្រកាសជាមុនថា លោក សម រង្ស៊ី ដែលកំពុងមានទោស នឹងត្រូវចាប់ខ្លួន ប្រសិនវិលត្រលប់មកកាន់ប្រទេសកម្ពុជាវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ