លោក សម រង្ស៊ី អំពាវនាវជាថ្មីកុំអោយមន្រ្តីអតីតបក្សប្រឆាំងទាំង១១៨នាក់ស្នើសុំសិទ្ធិធ្វើនយោបាយឡើងវិញ
អតីតប្រធានអតីតគណបក្សសង្រ្គោះជាតិ លោកសម រង្ស៊ី កាលពីយប់មិញបានចេញសារអំពាវនាវដល់មន្រ្តីអតីតបក្សប្រឆាំងទាំង១១៨នាក់កុំឲ្យចាញ់បោកលោកនាយករដ្ឋមន្រ្តីហ៊ុន សែន តាមរយៈការស្នើសុំសិទ្ធិធ្វើនយោបាយឡើងវិញ។ ការអំពាវនាវនេះ ធ្វើឡើងស្របពេលដែលវិសោធនកម្មច្បាប់បើកផ្លូវឲ្យមន្រ្តីអតីតបក្សប្រឆាំងអាចធ្វើនយោបាយឡើងវិញបាន ទើបត្រូវបានព្រះមហាក្សត្រឡាយព្រះហស្តលេខាប្រកាសឲ្យប្រើប្រាស់ជាផ្លូវការ។
ចុះផ្សាយនៅថ្ងៃ៖
ស្តាប់ - ០១:៥៨
តាមរយៈទំព័រហ្វេសប៊ុក លោកសម រង្ស៊ី តាំងនាមជាប្រធានស្តីទីអតីតគណបក្សសង្គ្រោះជាតិ បានអំពាវនាវទៅមន្ត្រីអតីតបក្សប្រឆាំងទាំង១១៨ រូប កុំទន់ជ្រាយ កុំចាញ់បោក លោកនាយករដ្ឋមន្រ្តីហ៊ុន សែន កុំចូលទៅបម្រើអំណាចផ្តាច់ការ ដោយមិនដឹងខ្លួន។ មិនតែប៉ុណ្ណោះ លោកសម រង្ស៊ី បានជំរុញឲ្យពួកគេយកគម្រូតាមយុវជនអតីតគណបក្សសង្គ្រោះជាតិដែលទើបតែចេញពីពន្ធនាគារ ដែលលោកអះអាងថា យុវជនទាំងនោះបានប្តេជ្ញាបន្តការតស៊ូតទៅទៀត។
ជាការកត់សម្គាល់ សាររបស់លោកសម រង្ស៊ីនេះ ធ្វើឡើងស្របពេលវិសោធនកម្មច្បាប់ស្តីពីគណបក្សនយោបាយទើបត្រូវបានព្រះមហាក្សត្រឡាយព្រះហស្តលេខាប្រកាសឲ្យប្រើប្រាស់ជាផ្លូវការកាលពីថ្ងៃទី ០២ ខែមករា ឆ្នាំ២០១៩។ ច្បាប់ស្តីពីគណបក្សនយោបាយនេះ ត្រូវកែមកថា បុគ្គលដែលត្រូវបានតុលាការសម្រេចហាមឃាត់សិទ្ធិធ្វើនយោបាយ នឹងអាចទទួលបាននូវសិទ្ធិមកវិញ បន្ទាប់ពីផុតរយៈពេលនៃការហាមឃាត់ ដែលកំណត់ដោយសាលដីការបស់តុលាការកំពូល ឬក្នុងករណីដែលបុគ្គលនោះ ត្រូវបានផ្តល់នីតិសម្បទាឡើងវិញដោយព្រះមហាក្សត្រ តាមសំណើរបស់នាយករដ្ឋមន្រ្តី តាមសេចក្តីស្នើសុំរបស់រដ្ឋមន្រ្តីក្រសួងមហាផ្ទៃ។
ប៉ុន្តែគិតមកដល់ថ្ងៃអង្គារ៍នេះ ក្រសួងមហាផ្ទៃពុំទាន់ទទួលបាននូវសំណើណាមួយពីមន្រ្តីអតីតគណបក្សសង្រ្គោះជាតិទាំង១១៨នាក់នៅឡើយទេ។ នេះបើតាមបញ្ជាក់របស់លោកខៀវ សុភ័គ អ្នកនាំពាក្យក្រសួងមហាផ្ទៃកម្ពុជា។ លោកខៀវ សុភ័គ បានអះអាងបន្ថែមថា នៅពេលនេះ ក្រសួងមហាផ្ទៃកំពុងរង់ចាំសំណើរបស់ពួកគេ ដើម្បីពិនិត្យ និងពិចារណា ដើម្បីស្នើសុំលើកលែងការហាមឃាត់ធ្វើនយោបាយឡើងវិញ។ លោកសង្កត់ធ្ងន់ថា លោកខៀវ សុភ័គ ក្រសួងមហាផ្ទៃមិនអាចស្នើអ្វីបានទេ បើសិនពួកគេមិនដាក់សំណើមកនោះ។
តាមលោកខៀវ សុភ័គ ការស្នើលើកលែងការហាមឃាត់សិទ្ធិធ្វើនយោបាយអាចធ្វើទៅបាន លុះត្រាណាពួកគេគោរពទៅតាមសាលដីការបស់តុលាការកំពូលកម្ពុជា។ និយាយដល់ចំណុចនេះ លោកបង្ហើបថា លោកអេង ឆៃអ៊ាង និងលោកស្រីមួរ សុខហួរ ដែលសុទ្ធតែជាអនុប្រធានអតីតគណបក្សប្រឆាំង ប្រហែលមិនអាចត្រូវស្នើលើកលែងការហាមឃាត់សិទ្ធិធ្វើនយោបាយបានឡើយ ព្រោះពួកគេបានប្រឆាំងនឹងសាលដីការបស់តុលាការនាពេលកន្លងមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ