លោក សម រង្ស៊ី និងអ្នកគាំទ្រមួយចំនួននាំគ្នាដាក់សម្ពាធលើព្រះមហាក្សត្រ
លោក សម រង្ស៊ី ប្រធានស្តីទីអតីតគណបក្សសង្រ្គោះជាតិ នាប៉ុន្មានថ្ងៃជាប់ៗគ្នាមកនេះ តាមបទសម្ភាសជាមួយវិទ្យុអាស៊ីសេរី និងVOA ក៏ដូចជានៅលើទំព័រហ្វេសប៊ុករបស់លោក គឺជំរុញឲ្យព្រះមហាក្សត្ររបស់ប្រទេសកម្ពុជាដាក់រាជ្យសម្បត្តិ។ ការទាមទាររបស់មេដឹកនាំបក្សប្រឆាំងរូបនេះ ដោយលោកចោទថា ព្រះមហាក្សត្របច្ចុប្បន្ន ធ្វើអ្វីៗតាមតែការបញ្ជារបស់ លោក ហ៊ុន សែន។ ក៏ប៉ុន្តែទាំងខាងព្រះបរមរាជវាំង និងទាំងខាងមន្រ្តីរដ្ឋាភិបាលកម្ពុជា បានចាត់ទុកសកម្មភាពរបស់លោក សម រង្ស៊ី ថាកំពុងតែប្រមាថយ៉ាងធ្ងន់ធ្ងរដល់ព្រះមហាក្សត្រ ហើយតុលាការកំពុងតែចាត់វិធានការច្បាប់។
ចុះផ្សាយនៅថ្ងៃ៖
ស្តាប់ - ០១:៤៤
នៅលើទំព័រហ្វេសប៊ុកថ្ងៃទី២១កញ្ញា លោក សម រង្ស៊ី បានសរសេរចំៗដោយដាក់សម្ពាធឲ្យព្រះមហាក្សត្រសព្វថ្ងៃ គួរតែដាក់រាជ្យចុះ ព្រោះមិនអាចជួយរាស្ត្របានទេ គឺធ្វើតាមតែការបញ្ជារបស់លោក ហ៊ុន សែន។ មេដឹកនាំបក្សប្រឆាំងរូបនេះ បានអះអាងថា លោកបានទទួលព័ត៌មានថា លោក ហ៊ុន សែន ត្រៀមបញ្ជាមហាក្សត្រឲ្យធ្វើសេចក្តីអំពាវនាវមួយទៀត ដែលមានបំណងទប់ស្កាត់មិនឲ្យប្រជារាស្ត្រ ទៅទទួលស្វាគមន៍ លោក សម រង្ស៊ីនៅថ្ងៃ ០៩ វិច្ឆិកា ខាងមុខនេះ គឺដូចអ្វីដែលព្រះមហាក្សត្របានអំពាវនាវឲ្យពលរដ្ឋចេញទៅបោះឆ្នោតកាលពីថ្ងៃទី២៩កក្កដាឆ្នាំ២០១៨ ខណៈលោក សម រង្ស៊ី កាលណោះ អំពាវនាវកុំឲ្យពលរដ្ឋទៅចូលរួមការបោះឆ្នោតដែលគ្មានគណបក្សសង្គ្រោះជាតិចូលរួម។
មិនមែនតែលោក សម រង្ស៊ី ម្នាក់ទេ ដែលដាក់សម្ពាធឲ្យព្រះមហាក្សត្រដាក់រាជ្យ គឺអ្នកគាំទ្រលោកមួយចំនួននៅក្រៅប្រទេសក៏ចេញមុខជំរុញឲ្យព្រះអង្គដាក់រាជ្យដែរ។ នេះបើតាមហ្វេសប៊ុករបស់ លោក ហៃ វណ្ណា សកម្មជនបក្សប្រឆាំងដែលលេចធ្លោម្នាក់ប្រចាំប្រទេសជប៉ុន។ លើសពីនេះទៀត បើគេចូលទៅមើលការបញ្ចេញមតិនៅលើទំព័រហ្វេសប៊ុក លោក សម រង្ស៊ី ក៏មានការជំរុញឲ្យព្រះមហាក្សត្រដាក់រាជ្យផងដែរ។
ក៏ប៉ុន្តែទាំងខាងព្រះបរមរាជវាំង និងទាំងខាងមន្រ្តីរដ្ឋាភិបាលកម្ពុជា បានចាត់ទុកសកម្មភាពរបស់លោក សម រង្ស៊ី ថាកំពុងតែប្រមាថយ៉ាងធ្ងន់ធ្ងរដល់ព្រះមហាក្សត្រ។
លោក អង្គ វង្សវឌ្ឍនា រដ្ឋមន្រ្តីក្រសួងយុត្តិធម៌ បានចេញអធិបញ្ជាឲ្យព្រះរាជអាជ្ញា ចាត់ការប្រឆាំងនឹងលោក សម រង្ស៊ី មួយករណីថ្មីទៀត ទាក់ទងនឹងការប្រមាថព្រះមហាក្សត្រ។ រីឯមន្រ្តីរដ្ឋាភិបាលនៅតាមក្រសួងនានា ជាពិសេសមេទ័ពជាច្រើននាក់ នាំគ្នាចេញសេចក្តីថ្លែងការណ៍ជាបន្តបន្ទាប់ ដោយថ្កោលទោសលោក សម រង្ស៊ី ចំពោះការនិយាយប៉ះពាល់ដល់ព្រះមហាក្សត្រ ដែលក្រុមមន្រ្តីរដ្ឋាភិបាលចាត់ទុកថា លោក សម រង្ស៊ី បានប្រមាថយ៉ាងធ្ងន់ធ្ងរដល់ព្រះមហាក្សត្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ