លោក សម រង្ស៊ី ចាត់ទុកសមាជិកដែលចុះចូលបក្សកាន់អំណាចថា សម្រេចចិត្តខុស
ជាថ្មីម្ដងទៀត លោក សម រង្ស៊ី អតីតប្រធានគណបក្សសង្គ្រោះជាតិ បានបន្តអំពាវនាវ កុំឲ្យសមាជិកក្រុមប្រឹក្សា រាជធានីខេត្តក្រុង ស្រុកខណ្ឌ និងឃុំសង្កាត់ នៃគណបក្សសង្គ្រោះជាតិ ចុះចូលជាមួយគណបក្សប្រជាជនកម្ពុជា។ នៅក្នុងវីដេអូ ចេញផ្សាយនៅយប់ថ្ងៃសៅរ៍ ទី៤វិច្ឆិកា លោក សម រង្ស៊ី បានចាត់ទុកថា ការចុះចូលរបស់សមាជិកបក្សប្រឆាំងទៅកាន់គណបក្សកាន់អំណាច ជាការសម្រេចចិត្ត អ័កហ្សឺ ឬជាការសម្រេចចិត្តខុស។
ចុះផ្សាយនៅថ្ងៃ៖
ស្តាប់ - ០២:១៣
ការសម្រេចចិត្តចុះចូលជាមួយគណបក្សប្រជាជនកម្ពុជា តាមការអំពាវនាវរបស់លោកនាយករដ្ឋមន្ដ្រី ហ៊ុន សែន មិនត្រឹមតែខុសចំពោះឧត្តមគតិប៉ុណ្ណោះទេ សូម្បីតែចំពោះផលប្រយោជន៍ផ្ទាល់ខ្លួនក៏ខុសដែរ។ នេះគឺជាការលើកឡើងរបស់លោក សម រង្ស៊ី នៅក្នុងជំនួបតាមវីដេអូ Conference រវាងលោក ជាមួយតំណាងរាស្ត្របក្សសង្គ្រោះជាតិជាង២០នាក់ នៅយប់ថ្ងៃទី៤វិច្ឆិកា។ ជាការសម្រេចចិត្តខុស ព្រោះលោក សម រង្ស៊ី យល់ថា គណបក្សសង្គ្រោះជាតិ នឹងមិនអាចត្រូវរំលាយដូចការលើកឡើងរបស់លោកនាយករដ្ឋមន្ដ្រី ហ៊ុន សែន ឡើយ។ ហើយអ្នកដែលជ្រុលចុះចូលជាមួយបក្សប្រជាជន នឹងពិបាកត្រឡប់មករួមរស់ជាមួយបក្សសង្គ្រោះជាតិវិញណាស់ នៅពេលបក្សសង្គ្រោះជាតិមិនត្រូវបានគេរំលាយ។ នេះបើតាមលោក សម រង្ស៊ី។
ការលើកឡើងរបស់លោក សម រង្ស៊ី អតីតប្រធានបក្សប្រឆាំងដូច្នេះ ធ្វើឡើងបន្ទាប់ពីលោកនាយករដ្ឋមន្ដ្រី ហ៊ុន សែន ថ្លែងអំពាវនាវតាមវីដេអូឃ្លីបនៅថ្ងៃទី៤វិច្ឆិកា ឲ្យមន្ដ្រីជាប់ឆ្នោតបក្សប្រឆាំង បន្តចុះចូលជាមួយគណបក្សកាន់អំណាច ឲ្យបានមុនថ្ងៃទី១៦វិច្ឆិកា។ លោក ហ៊ុន សែន ហ៊ានភ្នាល់ដាក់ជីវិតថា គណបក្សសង្គ្រោះជាតិ នឹងត្រូវរំលាយនៅក្នុងពេលអនាគតដ៏ខ្លីខាងមុខនេះ។ ប្រមុខបក្សកាន់អំណាច បានបញ្ជាក់បន្ថែមថា បក្សប្រជាជន ស្វាគមន៍ចំពោះមន្ដ្រីបក្សប្រឆាំងដែលចង់ចុះចូលនៅពេលនេះ ជាពេលដែលផ្លូវនៅបើកទូលាយ។ ប៉ុន្តែបើការចុះចូលធ្វើឡើងក្រោយថ្ងៃទី១៦វិច្ឆិកា ផ្លូវនឹងរួមតូចជាងមុន។ ចុះចូលជាមួយបក្សកាន់អំណាច បើតាមប្រមុខបក្សប្រជាជន គឺជាការធានាថា សមាជិកបក្សប្រឆាំងជាប់ឆ្នោត អាចរក្សាបាននូវមុខតំណែងនិងតួនាទីរបស់ខ្លួន។
យ៉ាងណាក៏ដោយ ការធានារបស់លោក ហ៊ុន សែន យ៉ាងដូច្នេះ ត្រូវបានលោកសម រង្ស៊ី ចាត់ទុកថាជាការកុហកបោកប្រាស់សុទ្ធសាធ។ លោក សម រង្ស៊ី បានអំពាវនាវផ្ទុយពីលោកហ៊ុន សែនវិញ គឺកុំឲ្យសមាជិករបស់ខ្លួនចុះចូល កុំឲ្យចាញ់បោកលោកហ៊ុន សែន។
អតីតប្រមុខបក្សប្រឆាំងក៏បានឆ្លៀតឱកាសនេះ ដៀមដាមដល់សម្ដេចក្រុមព្រះ នរោត្តម រណឬទ្ធិ ផងដែរ ដែលកំពុងត្រៀមខ្លួនទទួលយកអាសនៈនៅសភារបស់គណបក្សសង្គ្រោះជាតិ។ លោកសម រង្ស៊ី ថា បន្តិចទៀត គណបក្សហ្វ៊ុនស៊ិនប៉ិចនឹងរងការអាម៉ាស ហើយត្រូវគេសើចចម្អក ព្រោះបក្សសង្គ្រោះជាតិមិនអាចត្រូវគេរំលាយឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ