លោក សម រង្សី ថាតុលាការខ្មែរក្រហមមិនមានយុត្តិធម៌ពេញលេញ តែមន្ត្រីសាលាក្តីយល់ថាជាការញុះញង់នយោបាយ
មន្ត្រីសាលាក្តីខ្មែរក្រហម លោក នេត្រ ភត្រ្តា បានហៅការលើកឡើងរបស់លោក សម រង្ស៊ី ថាមានលក្ខណៈញុះញង់ មិនយល់ពីដែនយុត្តាធិការរបស់តុលាការខ្មែរក្រហម ហើយមានរបៀបវារៈនយោបាយបែបសងសឹក។ ការលើកឡើងរបស់ប្រធានផ្នែកកិច្ចការសាធារណៈសាលាក្តីខ្មែរក្រហមដូចនេះ បានធ្វើឡើងបន្ទាប់ពីបទអន្តរាគមន៍របស់លោកសម រង្សី អតីតប្រធានអតីតគណបក្សសង្គ្រោះជាតិ នៅឯព្រឹទ្ធសភាបារាំង បានចោទប្រកាន់ថាតុលាការកូនកាត់នេះ មិនបានផ្តល់យុត្តិធម៌ពេញលេញជូនរាស្ត្រខ្មែរទេ។
ចុះផ្សាយនៅថ្ងៃ៖
ប្រធានកិច្ចកិច្ចការសាធារណៈ និងជាអ្នកនាំពាក្យសាលាក្តីខ្មែរក្រហម លោក នេត្រ ភត្រ្តា បានចាត់ទុកថា លោក សម រង្ស៊ី កំពុងតែប្រមាថព្រលឹងជនរងគ្រោះខ្មែររាប់លាននាក់ ដែលបានស្លាប់បាត់បង់ជីវិត និងមិនឱ្យតម្លៃលើការលះបង់ របស់ជនរងគ្រោះដែលនៅរស់រានមានជីវិតដែលបានចូលរួមក្នុងដំណើរការជំនុំជម្រះក្តីប្រកបដោយជំនឿទុកចិត្ត។ លោក នេត្រ ភត្រ្តា បន្តថា លោក សម រង្ស៊ី ក៏កំពុងប្រមាថសហគមន៍អន្តរជាតិ ដែលជួយជ្រោមជ្រែងបង្កើតតុលាការខ្មែរក្រហម ជាមួយរាជរដ្ឋាភិបាលកម្ពុជា និងគាំទ្រទាំងថវិកា និងបច្ចេកទេសដើម្បីតុលាការទទួលបានជោគជ័យ។
ជុំវិញការកាត់ទោសមេដឹកនាំខ្មែរក្រហម នៅចំពោះមុខតុលាការខ្មែរក្រហម នៅទីក្រុងភ្នំពេញលោក សម រង្ស៊ី នៅឯព្រឹទ្ធសភាប្រទេសបារាំងកាលពីសប្តាហ៍មុន បានបញ្ជាក់ថា តុលាការនេះ មិនបានផ្តល់យុត្តិធម៌ពេញលេញ ជូនប្រជារាស្ត្រខ្មែរទេ ពីព្រោះរដ្ឋអំណាច លោក ហ៊ុន សែន រារាំងមិនឲ្យតុលាការធ្វើការស៊ើបអង្កេត ចំពោះជនឧក្រិដ្ឋ មួយចំនួន ដែលបានរួចខ្លួន ដោយសារតែជាអ្នកមានអំណាចសព្វថ្ងៃ។ ក្នុងនោះមានទាំងលោក ហេង សំរិន និង លោកហ៊ុន សែន ផងដែរ ដែលមានបាតដៃប្រឡាក់ឈាម។ នេះបើតាមលោក សម រង្ស៊ី សរសេរនៅក្នុងហ្វេសប៊ុករបស់លោក នៅថ្ងៃអង្គារនេះ។ លោក សម រង្ស៊ី បន្តថា ជនទាំង២ នាក់នេះ បានបម្រើរបប ប៉ុល ពត យ៉ាងសកម្ម ពីឆ្នាំ ១៩៧៥ ដល់ឆ្នាំ ១៩៧៧-១៩៧៨។
នៅមិនទាន់មានការឆ្លើយតបពីមន្ត្រីគណបក្សប្រជាជននៅឡើយទេ ក៏ប៉ុន្តែលោក នេត្រ ភត្រ្តាបានលើកឡើងថា ពលរដ្ឋខ្មែរ និងសហគមន៍អន្តរជាតិបានវាយតម្លៃខ្ពស់ចំពោះសមិទ្ធផលការងារក្នុងការស្វែងរកយុត្តិធម៌ជូនដល់ជនរងគ្រោះនៃរបបខ្មែរក្រហម។ ជនរងគ្រោះជាង ៩០%បានថ្លែងក្នុងរបាយការណ៍ស្ទង់មតិថា សាលាក្តីខ្មែរក្រហមបានផ្តល់យុត្តិធម៌ដល់ខ្លួន ស្វែងរកការពិត ការផ្សះផ្សាជាតិ និងផ្សះផ្សាផ្លូវចិត្តជនរងគ្រោះ និងការចងចាំក្នុងចំណោមពលរដ្ឋ ដើម្បីបង្ការ និងទប់ស្កាត់ការវិលត្រឡប់មកវិញនៃឧក្រិដ្ឋកម្មសាហាវឃោរឃៅដូចក្នុងរបបខ្មែរក្រហម។
សូមរំលឹកថា កាលពីថ្ងៃទី១៦ ខែវិច្ឆិកា កន្លងទៅ សាលាក្តីខ្មែរ ក្រហមបានប្រកាសសាលក្រមលើសំណុំរឿង ០០២/០២ ប្រឆាំងនឹងអតីតមេដឹកនាំជាន់ខ្ពស់ខ្មែរក្រហមគឺនួន ជា និងខៀវ សំផន ដោយផ្តន្ទាទោសម្នាក់ៗជាប់ពន្ធនាគារអស់មួយជីវិត ក៏ប៉ុន្តែប៉ុន្មានថ្ងៃក្រោយមក លោកខៀវ សំផន បានធ្វើការប្តឹងសារទុក្ខ ខណៈ នួន ជា នៅស្ងាត់ស្ងៀមនៅឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ