លោក សម រង្ស៊ី បដិសេធថា មិនបានចុះហត្ថលេខាកាត់ដីឲ្យវៀតណាមទេ!
លោក សម រង្ស៊ី ប្រធានចលនាសង្គ្រោះជាតិ បានបដិសេធថា លោកមិនបានចុះហត្ថលេខាកាត់ដីឲ្យទៅវៀតណាមឡើយ។ ការបដិសេធយ៉ាងដូច្នេះ ធ្វើឡើងបន្ទាប់ពីមានការចោទប្រកាន់លោក សម រង្ស៊ី ថា បានចុះហត្ថលេខាកាត់ខេត្តចំនួន៤ទៅឲ្យវៀតណាមសេរីនៅក្នុងឯកសារចាស់កាលពីឆ្នាំ២០១៣ ពេលដែលគណបក្សសង្គ្រោះជាតិឈ្នះឆ្នោតឈានទៅដឹកនាំប្រទេស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
នៅក្នុងអ៊ីមែលដែលអ្នកសារព័ត៌មានទទួលបាននៅថ្ងៃទី៧មីនា លោក សម រង្ស៊ី បានគូសបញ្ជាក់ថា លោកមិនបានចុះហត្ថលេខាកាត់ដីឲ្យវៀតណាមឡើយ។ បើតាមលោក សម រង្ស៊ី ឯកសារដែលលោកចុះហត្ថលេខាជាមួយលោក Kok Ksor មេដឹកនាំចលនាម៉ុងតាញ៉ា នៅឆ្នាំ២០១៣នោះ មែនទែនទៅ មានខ្លឹមសារចង់ឲ្យមានការទទួលស្គាល់សិទ្ធិស្របច្បាប់របស់ជនជាតិភាគតិចម៉ុងតាញ៉ា ដែលរស់នៅខេត្តភាគឦសានប្រទេសកម្ពុជា ដូចជាខេត្តមណ្ឌលគិរី រតនគិរី ក្រចេះ និងស្ទឹងត្រែង។
ចំពោះការលើកឡើងពី «សិទ្ធិស្វ័យភាពនៃជនជាតិដើមភាគតិច» នៅក្នុងកិច្ចព្រមព្រៀងឆ្នាំ២០១៣វិញ ប្រធានចលនាសង្គ្រោះជាតិពន្យល់ថា វាគឺជាការអនុវត្តជាក់ស្ដែងនៃអំណាចវិមជ្ឈការ តែប៉ុនណោះ។ ការផ្ទេរអំណាចនេះ ត្រូវបានលោក សម រង្ស៊ី អះអាងថា ជាផ្នែកមួយនៃដំណើរការលទ្ធិប្រជាធិបតេយ្យ ដែលមិនដែលមាននៅក្រោមការដឹកនាំរបស់គណបក្សប្រជាជនកម្ពុជាដឹកនាំដោយលោក ហ៊ុន សែន ឡើយ។ នេះបើតាមលោក សម រង្ស៊ី។
យ៉ាងណាក៏ដោយ សម្រាប់ក្រសួងមហាផ្ទៃ ករណីចុះកិច្ចព្រមព្រៀងរបស់លោក សម រង្ស៊ី ជាមួយមេដឹកនាំចលនាម៉ុងតាញ៉ានៅឆ្នាំ២០១៣នេះ គឺជាទង្វើក្បត់ជាតិ ខុសនឹងច្បាប់រដ្ឋធម្មនុញ្ញ ដែលមិនអាចអត់ឱនឲ្យបានឡើយ។ ថ្លែងប្រាប់វិទ្យុបារាំងអន្ដរជាតិ លោក ខៀវ សុភ័គ អ្នកនាំពាក្យក្រសួងមហាផ្ទៃ បានប្រៀបប្រដូចករណីលោកសម រង្ស៊ី ទៅនឹងករណីលោក កឹម សុខា ដែលសហការជាមួយបរទេស បំផ្លាញផលប្រយោជន៍ជាតិសាសន៍ឯង។
គួរកត់សម្គាល់ដែរថា ការចោទប្រកាន់ពីបទក្បត់ជាតិនេះ មិនបានធ្វើឲ្យលោក សម រង្ស៊ី ភ្ញាក់ផ្អើលទេ។ នៅក្នុងអ៊ីមែលដដែល លោក សម រង្ស៊ី ចាត់ទុកការចោទប្រកាន់នេះជារឿងគួរឲ្យអស់សំណើច និងជាលេសដើម្បីបង្ក្រាបលើការប្រឆាំងតាមបែបប្រជាធិបតេយ្យ ពីសំណាក់របបផ្ដាច់ការតែប៉ុនណោះ។ នេះបើតាមការអះអាងរបស់ប្រធានចលនាសង្គ្រោះជាតិ ដែលកំពុងរស់នៅនិរទេសខ្លួនឯបរទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ