លោកសម រង្ស៊ី រងបណ្តឹងបរិហាកេរ្តិ៍លោកហោ ណាំហុង ជាថ្មី នៅក្នុងតុលាការប្រទេសបារាំង
លោកសម រង្ស៊ី ប្រធានគណបក្សសង្រ្គោះជាតិ ដែលកំពុងគេចខ្លួនពីការជាប់ពន្ធនាគារនៅប្រទេសកម្ពុជា បានរងបណ្តឹងបរិហាកេរ្តិ៍ជាថ្មី ពីលោកឧបនាយករដ្ឋមន្រ្តីហោ ហាំហុង រដ្ឋមន្រ្តីក្រសួងការបរទេសកម្ពុជា នៅក្នុងតុលាការប្រទេសបារាំង។ ជាសំណុំរឿងចាស់ តែជាពាក្យបណ្តឹងថ្មី ក្រោយពីលោក សម រង្ស៊ី បានបន្តលើកឡើងជាថ្មីថា លោក ហោ ណាំហុង គឺជាអតីតប្រធានគុកបឹងត្របែកក្នុងសម័យខ្មែរក្រហម។
ចុះផ្សាយនៅថ្ងៃ៖
ស្តាប់ - ០២:៥៩
ពាក្យបណ្តឹងបរិហាកេរ្តិ៍ថ្មីនេះ ទំនងជាបានដាក់ទៅកាន់តុលាការទីក្រុងប៉ារីសប្រទេសបារាំងកាលពីខែវិច្ឆិកាឆ្នាំ២០១៥ បន្ទាប់ពីលោក សម រង្ស៊ី បានបន្តលើកឡើងជាថ្មីទៀត អំពីការទទួលខុសត្រូវរបស់លោកឧបនាយករដ្ឋមន្រ្តីហោ ណាំហុង ក្នុងនាមជាអ្នកគ្រប់គ្រងមន្ទីរឃុំឃាំងបឹងត្របែកនៅក្នុងសម័យខ្មែរក្រហម។
នៅក្នុងសំណុំរឿងចាស់តែពាក្យបណ្តឹងថ្មីនេះ លោកសម រង្ស៊ី ត្រូវបានតុលាការទីក្រុងប៉ារីសប្រទេសបារាំង កោះហៅឲ្យចូលខ្លួនទៅឆ្លើយបំភ្លឺកាលពីថ្ងៃទី៧មីនា ប៉ុន្តែលោកមិនបានចូលខ្លួននោះទេ។ ប៉ុន្តែមេធាវីតំណាងរូបលោក និងមេធាវីតំណាងឲ្យលោកឧបនាយករដ្ឋមន្រ្តី ហោ ណាំហុង បានចូលរួមនៅក្នុងសវនាការនោះ ហើយថា សវនាការមួយទៀត ក៏គ្រោងនឹងធ្វើឡើង នៅក្នុងខែឧសភាខាងមុខនេះទៀត។ លោក កា សាវុធ មេធាវីតំណាងឲ្យលោកឧបនាយករដ្ឋមន្រ្តីហោ ណាំហុង មិនបានដឹងពីពាក្យបណ្តឹងថ្មីនេះទេ ព្រោះវាមិនស្ថិតនៅក្នុងដៃរបស់លោក។
ប៉ុន្តែយ៉ាងណាក៏ដោយ បើតាម លោកសម រង្ស៊ី ប្រធានគណបក្សសង្រ្គោះជាតិដែលកំពុងរស់នៅដោយនិរទេសខ្លួន ដើម្បីគេចចេញពីការជាប់ពន្ធនាគារនៅក្នុងប្រទេសកម្ពុជា បានលើកឡើងតាមរយៈសារអ៊ីម៉េលមួយនៅក្នុងកាសែត The Cambodia Daily ថា “ពាក្យបណ្តឹងថ្មីនេះ គឺជាប់ពាក់ព័ន្ធនឹងការបង្ហោះសារតាមទំព័រហ្វេសបុករបស់លោកកាលពីថ្ងៃទី២០ខែវិច្ឆិកាឆ្នាំ២០១៥”។ សារដែលធ្វើឲ្យលោកសម រង្ស៊ី ជាប់បណ្តឹងជាថ្មីនេះ គឺបន្ទាប់ពីលោកហោ ណាំហុង បានអំពាវនាវឲ្យលោកសម រង្ស៊ី សូមអភ័យទោសចំពោះការអះអាងដែលធ្វើឲ្យ លោកហោ ណាំហុង បានដាក់ពាក្យបណ្តឹងកាលពីឆ្នាំ២០០៨។ ប៉ុន្តែលោកសម រង្ស៊ី បានអះអាងថា លោកគ្មានបំណង ឬគម្រោង ដើម្បីសុំទោសលោក ហោ ណាំហុង រដ្ឋមន្រ្តីក្រសួងការបរទេសកម្ពុជានោះទេ បើទោះការសុំទោសនោះ អាចធ្វើឲ្យរូបលោកបានវិលត្រឡប់ចូលមកប្រទេសកម្ពុជាវិញក៏ដោយ។
ផ្ទុយទៅវិញ លោក សម រង្ស៊ី បានបន្តលើកឡើងថា លោក ហោ ណាំហុង គួរសុំទោសដល់វិញ្ញាណក្ខន្ធ និងក្រុមគ្រួសារនៃជនរងគ្រោះ ដែលត្រូវបានសម្លាប់ ដោយខ្មែរក្រហម នៅមន្ទីរឃុំឃាំង (K-17) រឺមន្ទីរឃុំឃាំងបឹងត្របែក នាចុងទសវត្សរ៍ឆ្នាំ១៩៧០ ដោយសារ តែលោកបានដើរតួជាមន្រ្តីឃុំឃាំងនេះ។ ប៉ុន្តែលោក ឡុង ដានី ប្រធានក្រុមស្រាវជ្រាវជំរុញឲ្យមានការទទួលខុសត្រូវនៃមជ្ឈមណ្ឌលឯកសារកម្ពុជា (DC-Cam) បញ្ជាក់ថា លោក ហោ ណាំហុង នៅពេលនោះ មិនមែនជាប្រធានមន្ទីរឃុំឃាំង (K-17) នៅបឹងត្របែកនេះទេ។
សូមបញ្ជាក់ថា នៅក្នុងសំណុំរឿងនេះ តាំងពីឆ្នាំ២០០៨មក លោកហោ ណាំហុង បានប្តឹងលោកសម រង្ស៊ី ប្រធានគណបក្សប្រឆាំង ទៅកាន់តុលាការនៅក្នុងប្រទេសបារាំង និងតុលាការកម្ពុជា បន្ទាប់ពីលោកសម រង្ស៊ី បានអះអាងថា លោកហោ ណាំហុង គឺជាប្រធានមន្ទីរបឹងត្របែកក្នុងសម័យខ្មែរក្រហម។ ប៉ុន្តែក្រោយមក តុលាការកំពូលប្រទេសបារាំង បានសម្រេចដកសំណុំរឿងនេះវិញកាលពីថ្ងៃទី២៧ ខែមេសា ឆ្នាំ២០១១។ ចំពោះការចោទប្រកាន់ពីការទទួលខុសត្រូវរបស់លោកហោ ណាំហុង ជាប្រធានមន្ទីរបឹងត្របែកនេះ លោកហោ ណាំហុង ក៏ធ្លាប់ឈ្នះក្តីលើសម្តេចព្រះនរោត្តមសីហនុ នៅក្នុងតុលាការប្រទេសបារាំង កាលពីដើមទស្សវត្សន៍ឆ្នាំ១៩៩០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ