រាជវាំងថ្កោលទោស លោក សម រង្ស៊ី ដែលបានប្រមាថព្រះមហាក្សត្រថាជា អាយ៉ង លោក ហ៊ុន សែន
ក្រសួងព្រះបរមរាជវាំង នៅថ្ងៃទី១៣ ខែកញ្ញា ឆ្នាំ២០១៩នេះ បានចេញសេចក្តីថ្លែងការណ៍មួយ ថ្កោលទោស លោក សម រង្ស៉ី ប្រធានស្តីទីអតីតគណបក្សសង្គ្រោះជាតិ ដែលបានពោលពាក្យប៉ះពាល់ដល់ អង្គព្រះមហាក្សត្រ។ ប្រតិកម្មរបស់ព្រះបរមរាជវាំងដូច្នេះ ធ្វើឡើងបន្ទាប់ពីលោក សម រង្សី បានថ្លែងតាមកិច្ចសម្ភាសមួយជាមួយវិទ្យុអាស៊ីសេរីកាលពីយប់ថ្ងៃទី១២ ខែកញ្ញា ម្សិលមិញ។
ចុះផ្សាយនៅថ្ងៃ៖
ស្តាប់ - ០១:៣៦
នៅក្នុងសេចក្តីថ្លែងការណ៍មួយទំព័រ នៅថ្ងៃនេះ រាជវាំងកម្ពុជា បានសរសេរថា ក្រសួងព្រះបរមរាជវាំង សូមប្រកាសដាច់អហង្កាថ្កោលទោសចំពោះលោក សម រង្សី ដែលមានចរិតជាជនក្បត់ជាតិ តែងតែពោលពាក្យប៉ះពាល់ដល់ព្រះកិត្តិនាម ព្រះករុណា ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ដែលព្រះអង្គ កំពុងគង់ប្រថាប់បំពេញព្រះរាជតួនាទីដ៏ឧត្តុង្គឧត្តម ជានិមិត្តរូបនៃឯកភាពជាតិ និងនិរន្តរភាពជាតិ។
ប្រតិកម្មរបស់ព្រះបរមរាជវាំងដូច្នេះ គឺបន្ទាប់ពី លោក សម រង្ស៊ី កាលពីយប់ថ្ងៃទី១២ ខែកញ្ញា កន្លងទៅ ឆ្លើយតបទៅកិច្ចសម្ភាសជាមួយវិទ្យុអាស៊ីសេរីជុំវិញតួនាទីរបស់តួអង្គខ្មែរក្នុងការសម្របសម្រួលនយោបាយកម្ពុជា ដោយលោក សម រង្ស៊ី លើកឡើងថាមិនមានអ្នកណាអាចប្រៀបធៀបទៅនឹងសម្តេចព្រះនរោត្តម សីហនុបានទេ។ លោក សម រង្ស៊ី ថាមានតែសហគមន៍អន្តរជាតិទេ ពីព្រោះអ្នកដែលនៅលើទឹកដីប្រទេសកម្ពុជាគឺជាចំណាត់ខ្មាំងរបស់លោក ហ៊ុន សែន រួមទាំងព្រះមហាក្សត្រផងដែរ។ ក្រៅពីនេះ លោក សម រង្ស៊ី ក៏បានហៅព្រះមហាក្សត្រកម្ពុជាបច្ចុប្បន្ន ថាជាអាយ៉ងរបស់ លោក ហ៊ុន សែន។
ដោយឡែក រដ្ឋាភិបាលកម្ពុជា ក៏ដូចជាខុទ្ទកាល័យលោកនាយករដ្ឋមន្ត្រី ហ៊ុន សែន នៅមិនទាន់មានប្រតិកម្មផ្លូវការយ៉ាងណានៅឡើយទេ ចំពោះការលើកឡើងរបស់លោក សម រង្ស៊ី នៅពេលនេះ។
ក៏ប៉ុន្តែ រដ្ឋធម្មនុញ្ញកម្ពុជា បានការពារដល់ព្រះមហាក្សត្រសោយរាជ្យ ដោយចាត់ទុក «អង្គព្រះមហាក្សត្រ គឺជាបុគ្គល មិនអាចនរណារំលោភបំពានបានឡើយ»។ យោងមាត្រា៨ បានចែងថា «ព្រះមហាក្សត្រ ព្រះអង្គទ្រង់ជានិមិត្តរូបនៃឯកភាពជាតិ និងនិរន្តរ៍ភាពជាតិ។ ព្រះមហាក្សត្រ ទ្រង់ជាអ្នកធានាឯករាជ្យជាតិ អធិបតេយ្យ និងបូរាណភាពទឹកដីនៃព្រះរាជាណាចក្រកម្ពុជា ទ្រង់ជាអ្នកធានាការគោរពសិទ្ធិ និងសេរីភាពរបស់ប្រជាពលរដ្ឋ និងការគោរពសន្ធិសញ្ញាអន្តរជាតិ»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ